EKADIMWELO LO AMBOLA W’OMA LO BIBLE

Lande na kahombaso nɔmbaka?

Jehowa Nzambi hakombola dia sho mboka wɔma dia mbotɛ ekakatanu aso mbala la mbala. (Luka 18:1-7) Nde tohokamɛka nɛ dia nde ndjashaka le so. Lam’ele Shɛso ka l’olongo mbatotɛ la ngandji tshɛ dia mbɔlɔmba, shi ayonga dui dia lomba dia mbetawɔ dui sɔ?—Adia Filipɛ 4:6.

Dɔmbɛlɔ bu tsho yoho mɔtshi ya nyanga ekimanyielo. Koko dɔmbɛlɔ tokimanyiyaka dia sho ndjasukanya la Nzambi. (Osambu 8:3, 4) Naka sho mbutɛka Nzambi tokanyi taso mbala la mbala, kete tayonga la diɔtɔnganelo dia ma ma la nde.—Adia Jakɔba 4:8.

Ngande wahombaso nɔmbaka?

Etena kalɔmbaso, Nzambi hangɛnangɛna dia sho kambaka l’ɛtɛkɛta wakotola yaambalo y’anto kana kalolɛka dɔmbɛlɔ dimɔtshi diakatakimɛ l’ɔtɛ. Hatɔlɔmbama dia monga la kiongamu mɔtshi ya laande. Jehowa tɔlɔmbaka dia sho salaka alɔmbɛlɔ w’oma k’ɛse otema. (Mateo 6:7) Ɛnyɛlɔ, lo Isariyɛlɛ w’edjedja, Hana akalɔmbɛ lo dikambo di’okakatanu ɔmɔtshi waki la nde lo nkumbo. Etena kakayokadimɔ ɔkɛyi ande ɔngɛnɔngɛnɔ, nde akɛnya Nzambi lowando lande lo nsala dɔmbɛlɔ di’oma k’ɛse otema.—Adia 1 Samuele 1:10, 12, 13, 26, 27; 2:1.

Ande diɛsɛ dia laande diele la so lee! Sho koka ndjasukanya l’Otungi aso lo mbotɛ ekakatanu aso. Sho koka nto mbotombola ndo mbookaka losaka lo kɛnɛ kasalande. Lo mɛtɛ, hatohombe pondjo mbɔsa diɛsɛ dia laande diele la so sɔ oko dui di’anyanya.—Adia Osambu 145:14-16.