Eshikikelo ka dimɛna efula k’oma lo dɛta dioleki tshitshɛ dia lo Hɛbɛru

Onde sho koka monga l’eshikikelo dia alaka tshɛ waki Nzambi wayokotshama? Yeso akonge l’eshikikelo lo dikambo sɔ ndo wetshelo ande wakakeketsha mbetawɔ k’ampokami ande. Tɔsɛdingole ɛnyɛlɔ kakandasha lo Dako diande dia lɔɔka dia lo Dikona diatanema lo Mateo 5:18, lɛnɛ akandate ate: “Lo mɛtɛ kanyotɛmi nte: Oyadi kaanga olongo la nkɛtɛ wayeta, ndooko vuiwui yoleki tshitshɛ ya lo Ɛlɛmbɛ kana fushi ya kɛnɛ kakatama lo Ɛlɛmbɛ yahatokotshama, kɛnɛ tshɛ kakatama lɔkɔ kayokotshama.”

Dɛta dioleki tshitshɛ dia lo alfabɛtɛ wa lo Hɛbɛru ekɔ י (yod), diɔ mbele dɛta dia ntondo dia lo Tetragramɛ, lokombo l’ekila laki Nzambi, mbuta ate Jehowa.a Laadiko dia tɔtɛkɛta ta mɛtɛ ndo alɛta wa lo Ɛlɛmbɛ wa Nzambi, afundji la Afarisɛ wakɔsaka oyadi “fushi ya kɛnɛ kakatama lo Ɛlɛmbɛ” la nɛmɔ di’efula.

Yeso akataka dia oyadi kaanga olongo la nkɛtɛ ketaka, ndooko kaanga vuiwui yoleki tshitshɛ ya lo Ɛlɛmbɛ yahatokotshama. Koko Afundelo toshikikɛka dia olongo ndo nkɛtɛ ka mɛtɛ mɛtɛ kayotshikala pondjo. (Osambo 78:69) Ɔnkɔnɛ, ɛtɛkɛta wa diambo ɛsɔ mɛnyaka dia ndooko kaanga vuiwui yoleki tshitshɛ ya lo Ɛlɛmbɛ yahatokotshama.

Onde Jehowa Nzambi mbidjaka yimba lo vuiwui ya tshitshɛ? Eelo. Tɔsɛdingole dui nɛ: Wakatɛ ase Isariyɛlɛ w’edjedja diaha ntɛta kaanga weka ɔtɔi wa ɔna ɔkɔkɔ w’Elekanelo. (Etombelo 12:46) Ondo ɔsɔ aki vuiwui ya tshitshɛ. Ko onde vɔ wakashihodia lande na kakiwɔ kopombaka ntɛta kaanga weka ɔtɔi? Ondo bu. Koko, Jehowa Nzambi akeyaka dia dui sɔ aki dui dia prɔfɛsiya diakɛnya mɛtɛ dia ndooko kaanga weka ɔtɔi wa Mɛsiya wakahombe mbɔkɔma etena kakawodiake lo otamba w’asui.​—Osambo 34:20; Joani 19:31-33, 36.

Kakɔna katetsha ɛtɛkɛta waki Yeso ɛsɔ? Sho lawɔ koka monga la eshikikelo tshɛ lo tshɛ ɔnɛ alaka tshɛ waki Jehowa Nzambi wayokotshama lo oseka kiambokambo tshɛ. Ande eshikikelo ka dimɛna katanaso oma lo dɛta dioleki tshitshɛ dia lo Hɛbɛru lee!