Ekadimwelo lo wembola anyu

◼ Kakɔna kokokiso sala dia kimanyiya tosuasua, ndo woho akɔna wokokiso kimanyiya ana la ɛlɔngɔlɔngɔ wele ambutshi awɔ hawodja dia nɔmbɔla wekelo wa Bible tena tshɛ kâmɛ lawɔ oma lo ɛkɔkɔ wa weho la weho na?

Ɔnɔnyi tshɛ, apandjudi ndjâlaka tosuasua, oma lo dikambo dia ɛhɛnyɔhɛnyɔ la ekiyanu, dikambo sɔ diekɔ djembetelo ya woke y’ohombelo wa lo nyuma. Etena kahomanaso l’anangɛso ndo l’akadiyɛso wa ngasɔ, takeketsha dia vɔ nyomoya lo Mbalasa ka Diolelo.​—Jak. 2:14; Hɛb. 5:12-14; 20:23-25.

Dikumanyi pombaka ndjâla la saki ka membola akanga a tosuasua wetawɔ mbalongola. Oma lo ɛkɛtshanyelo washa ekeketshelo, waembwelo wa lɔngɛnyi asɔ ayowaela ekimanyielo ka lo nyuma. Pombaka teyi ɔkɔkɔ wa ntondo w’ekakatanu, lasɔ mbayonyokoka mbeya mbisha ekimanyielo kakoka. Akanga a tosuasua asɔ pombaka keketshama dia mbekaka Dui dia Nzambi tena tshɛ, onto ndamɛ ndo l’atei a nkumbo. Naka vɔ nangaka, sho kokaka mbalɔmba dia mbekaka lawɔ Bible la ngelo, kana sɛdingolaka kâmɛ lawɔ artikɛlɛ wasungana wele lo La Tour de Garde dia keketsha mbetawɔ yawɔ.​—Is. 32:2; Joani 21:15-17; enda nto lo Olimu aso wa Diolelo wa Asasa a ndjoko 1988, lo artikɛlɛ “Aidons les inactifs”.

Lo kɛnɛ k’endana la ɛlɔngɔlɔngɔ wele ambutshi awɔ kema l’akoka wa nɔmbɔla wekelo wa Bible kâmɛ lawɔ, kokaka nyanga ekimanyielo k’apandjudi akina. Ndo lɛsɔ nto, dikumanyi kokaka shikikɛ wâ na wele l’ohomba w’ekongelo ka ngasɔ. Ndo nto, ambutshi kokaka vɔamɛmɛ mbewoya dikumanyi ohomba ɔsɔ, ko vɔ wayênda kakɔna kokokiwɔ sala. Lo tena dimɔtshi, oko ɛnyɛlɔ kana ambutshi weke eyoyo lo mbetawɔ, kokaka sɛngɔla apandjudi akina dia vɔ nɔmbɔla wekelo wa Bible l’ɔna ɔtɔi kana l’ana efula. Naka an’akɔ watalongola batismu, kete opandjudi walɔmbɔla wekelo kokaka mbadia wenya, ombeki la waembwelo w’eyoyo. Lo ndjela woho wele dikambo, kokaka keketsha Okristo wa dikɛnda wakashile la batizama koko ekɔ l’ohomba w’ekimanyielo, dia nde ndjâla lam’asalema wekelo akɔ.