Etombelo w’ɔngɛnɔngɛnɔ w’oma lo sanganya ya weke “Wɔma wa Nzambi”
1 Sanganya ya distrikɛ “Wɔma wa Nzambi” yakasalema. Sanganya yakɔ ya weke yakatatɛ lo Loseketanya l’ɔnɔnyi w’etshi, ndo yakatetemala polo lo Kɔlɛkɔlɛ ya l’ɔnɔnyi akɔ wamɛ, yakatokimanyiya dia sho nyomoleka mbeya ele wɔma wa Nzambi ndo lande na kahombaso mɛnya wɔma akɔ.
2 Oma l’ekimanyielo ka Jehowa, sanganya ya distrikɛ “Wɔma wa Nzambi” yakônge tena di’ɔngɛnɔngɛnɔ diakatshumanya anto ndekana 245 000, nshi shato lomamatanya. L’atei awɔ, anto 3 000 mbidja ndo pigime nyɛi, wakalongola batismu, ndjembetelo ya ndjakimɔ kawɔ ka la tshondo le Nzambi. Ekakatanu wa lo lɔkɛndɔ kana ofutelo wa mituka koshimba ase losanganya dia vɔ ngɛnangɛna kâmɛ l’anto akina wakɔ̂tɔ lɔkɔ ndo dia vɔ ndɛ mma dia lo nyuma di’oshika diakashama lo sanganya yakɔ. Alapɔlɔ wekɔ lo mɛnya ɔnɛ: kânga anangɛso akanga a totshungu wakakɛndakɛnda kɛndɔ y’etale, mbala mɔtshi ndekana kilɔmɛtɛlɛ 400 dia ndjɔ̂tɔ lo sanganya shɔ ya lo nyuma yasha wetshelo wa mamba.
3 Ɔlɔngɔswɛlɔ ndo wetshelo wakashama lo sanganya ya weke “Wɔma wa Nzambi” akâmbia ase andj’ɔnɛ efula ndo angɛnyi wa lo mɛtɛ wanɛ wakɔ̂tɔ lɔkɔ. Dikitɛlɛ dimɔtshi dia kalasa akate ate: “Kɛnɛ kakamɛnyi ndo kakamalembetɛ lo dikambo dia ɔlɔngɔswɛlɔ le Ɛmɛnyi wa Jehowa akangɛnyangɛnya. Ɛtɛ w’asawo wakɔ̂mbwamaka wakasha anto wetshelo wa mamba; ondo lushi lɔmɔtshi layokoma Ɔmɛnyi wa Jehowa.” Atshukani amɔtshi wakate ndo vɔ lawɔ vɔate: “Ɔlɔngɔswamelo ɔnɛ kema ɔlɔngɔswamelo wa tshitshɛ oko akatafɔnyaka; vɔ wekɔ mɛtɛ ɔlɔngɔswamelo wa woke. Alako washawɔ lɔkɔ nɔmbɔlaka ndo mbishaka anto lomba.” Ɔngɛnyi wa lo mɛtɛ ɔmɔtshi ɔnɛ “lakahakahakaka” l’atei a tokanyi tohende, akɔ̂shi yɛdikɔ y’oshika dia nde nongola batismu lo losanganya la woke la mbala kayaye. Oko le anangɛsɔ, ɛtɛkɛta awɔ akɛnya dia wakatakalolaka otsha lo mbilo yawɔ watânɛ dia wayotɛnya wɔma wa Nzambi lo kamba olimu la lumu lawɔ tshɛ.
4 Mɛnamaka hwe dia sanganya ya distrikɛ “Wɔma wa Nzambi” yakasalema l’atei w’ekakatanu wa weoho la weoho wele lo mbilo kaso, yakônge tena di’ɔngɛnɔngɛnɔ diakasha wanɛ tshɛ wôka Nzambi wɔma ɛlɔlɔ efula. (Osam. 128:1) Lo dikambo di’endana la 1995, la Société ekɔ lo sangoya dia nɔngɔsɔla sanganya ya distrikɛ ya nshi shato l’ahole efula. Yɛdikɔ shɔ yayonyomoleka kimanyiya anto efula nto dia vɔ sangana laso dia mbeka woho wa mboka Jehowa wɔma ndo kɛndakɛnda lo mboka yande.