Onde Sho Pombaka Sambisha Ahende Ahende?

¹ Lofulo l’anto la lo mbilo mɔtshi lekɔ lo tadɛ esadi esadi ndo mɛnamaka di’oko anto efula wekɔ lo tatɛkɔya nanga dia shihodia ɔkɔkɔ w’akambo weta l’andja anɛ. Tekɔ lo mɛna dia dinela diekɔ woke ndo ekambi wekɔ yema tshitshɛ dia ndjasha l’esambishelo ndo l’olakanyelo. Dimbola dimɔtshi toyɛka lo yimba: woho akɔna wokokiso sambisha anto efula wenya weso l’olimu wa Diolelo na?

² Onde nyambɛna dia l’etshumanelo kanyu apandjudi wekɔ la mbekelo ka tshɔka anto efula ndo tena dimɔtshi asato asato lo luudu la luudu? Onde nyu tɛnaka tena la tena apandjudi efula wambekesanɛ l’olimu wakamba kâmɛ? Onde nɛ dia wekɔ lo tênde anto lo mbilo ka wâle ko kana mbekelo kambongaka ɛnɔnyi k’ɛnɔnyi?

³ Afundelo mɛnyaka ɔnɛ oma ko edjedja, anto ngɛnangɛnaka kamba kâmɛ l’olimu wa Nzambi. Etena kakasɔnɛ Yeso ambeki akumi esambele dia vɔ ntshɔ la ntondo kande l’esomba ɛmɔtshi, nde akâtome ahende ahende. (Luka 10:⁠1) Etena kakatatɛ Paulo lɔkɛndɔ lande la misiɔnɛrɛ, nde akɛmbɛ Timɔtɛ oko okimanyidi. (Etsha 16:​1-3) Ndo Sɔlɔmɔna mbakɛnyi wahɔ wa ndjâla l’otshindedi; mɛtɛ nde akate ate: “Antu ahendi ndeka untu otoi, ne dia vo watulungulaka difutu di’olo uma l’ulimu awo [wa wolo.]” Dikambo sɔ halembetshiya ɔnɛ onto hakoke kamba ndamɛ l’esambishelo ka lokumu l’ɔlɔlɔ, koko ɔnɛ sho kondjaka ɛlɔlɔ efula l’otombelo wa l’anto akina ndo lo kimanyiyanaka. Lo diɛnyɛlɔ sɔ tshɛ wekɔ lo tɛkɛta dikambo dia ekambi ehende w’Akristo wakamba kâmɛ. Ko onde sho kokaka mbɔsa mbekelo ka tombaka asato asato l’olimu w’ekambɔ?

⁴ Olimu Aso wa Diolelo wa Tshaka Fudu 1991 (lo Falase), lɛkɛ 1, ekɔ lo mbisha okadimwelo lo sawo diele l’ɔtɛ a dui w’ɔnɛ: “Tokimanyiya Anto Akina l’Olimu w’Esambishelo.” Odingɔ 1 la 4 mbalemaka ɔnkɔnɛ: “Etshumanelo k’Akristo ekɔ ɔlɔngɔswamelo w’esambisha wa lokumu l’ɔlɔlɔ oma k’etatelo kawɔ. Yeso ndamɛ akalowanya ambeki ande lo dikambo di’esambishelo ndo ‘akâtome ahende ahende.’ (Mako 6:7; Luka 8:⁠1) . . . Kânga mbele aha nshi tshɛ mbeso l’ohomba wa ndjâla l’otshindedi l’olimu, efula l’atei aso nangaka onto mbatshindɛ. (Und. 4:⁠9) . . . Lam’atshindɛso onto ɔmɔtshi l’esambishelo, sho nangaka sala olimu wa l’olui. (Enda lo 1 Koreto 3:​6, 9.) Sho kokaka sho akɔ ahende sambisha, oko ɛnyɛlɔ lo sawolaka l’ɔnɔngɔ.”

⁵ Ayotosala etena kasambishaso lo dihata dia wâle? Olimu Aso wa Diolelo wa Tshaka Fudu 1991 (lo Falase) wakatatshi ntondo ekɔ lo kadimola l’odingɔ 3 ɔnɛ: “Dia ndjakokɛ, ondo ekɔ dikambo dia tshundju naka sho sambishaka l’olui l’ahata amɔtshi.” Woho akɔ wâmɛ, sho kokaka mbala lo dibuku Notre ministère (lɛkɛ 97, odingɔ 3 ndo lɛkɛ 104, odingɔ 1) ɔnɛ: “Lo wedi okina, l’ɛkɔkɔ ekina tena dimɔtshi, ekɔ dikambo dia tshundju dia toma apandjudi ahende kana ndekana dia tosambisha kâmɛ l’ahata amɔtshi.” “Naka opandjudi ɔmɔtshi pombaka kamba olimu ande lo dihata kana la ntondo ka dikambo dimɔtshi diahasungana nde ndjâla ndamɛ, ko pombamaka opandjudi okina mbotshindɛ, kete vɔ akɔ ahende wayadia wenya awɔ, endaka vɔ akɔ ahende sambisha.”

⁶ Lo menda kɛnɛ kotshiso, mɛnamaka dia apandjudi pombaka tshɔka l’asoko vamɛ kana ahende ahende. L’ahata amɔtshi wele wâle, ayoleka ɔlɔlɔ vɔ sambisha anto ahende; tena dimɔtshi mbeyaka monga dikambo dia tshundju dia ndjâla olui. Mbeyaka ndjâla ko ɔnangɛso ɔmɔtshi ambotshindɛ kadiyɛso kɛmɔtshi kele kema wadiɛnde ndo hawotɔ. L’etena kɛsɔ, mbokɛmaka di’olui akɔ mbeyaka monga w’anto asato. Onyake yema y’awui shɔ, lo ndjela ɛnyɛlɔ kakatotshikɛ Nkumɛso Yeso Kristo ndo ambeki ande wa ntondo, tayoyatshutshuyaka dia sambishaka shamɛ, kana ahende ahende, naka kokaka, lo dihole dia asato asato.​—⁠1 Pet. 2:⁠21.