Tobukubuku: Dihomɔ di’Amɛna Efula L’Olimu
1 Otshudi w’oshika mbelaka dihomɔ dia weoho la weoho, ko ehomɔ l’ehomɔ kekɔ la lotumu latɔ shikaa. Sho wanɛ wele apandjudi wa Diolelo, tekɔ la lemba la tobukubuku tatokimanyiya dia kotsha ehomba wa lo nyuma w’anto wasambishaso l’ɔlɔlɔ tshɛ. (Tuk. 22:29) Ondo sho mbeyaka pomana l’onto ɔmɔtshi lambɔkɔmɔ. Kana onto lakombola lowandji la losembwe, kânga layambola dia kana lɔsɛnɔ lekɔ l’oyango ɔmɔtshi. Ngande ayotokamba olimu la tobukubuku taso dia mbâkimanyiya?
2 Lam’ɛnyanyaso biukubuku “Onde na Nzambi tokaneka mete ondo?” sho kokaka mbuta ɔnɛ:
◼ “Anto amɔtshi wɛna pâ la wɛngiya wele l’andja ɔnɛ toyangaka mbisha Nzambi ɛkɔmɔ. Vɔ mbutaka ɔnɛ, nɛ dia Nzambi ekɔ Kanga-Wolo Tshɛ, otondotokanɛka mɛtɛ tshike nde amboshidiya pâ yaso. Ko wɛ akanayɛ lo dikambo sɔ na? [Tshikɛ onto akɔ dihole akadimole.] Osambu 72:12-14 mɛnyaka ɔnɛ Nzambi tokanɛka mɛtɛ. Nde kema l’ɛkɔmɔ lo dikambo dia pâ la wɛngiya. Nde ekɔ lo ndaka ɔnɛ kem’edja atshi w’akambo wa kɔlɔ wayolanyema. Biukubuku nyɛ, Onde na Nzambi tokaneka mete ondo?, nembetshiyaka kɛnɛ kayondosala ndo woho wokokiso kondja wâhɔ lo dikambo diakɔ.” Ondo sho kokaka tetemala la sawo la mbisha kɔmatɛrɛ lo odingɔ 22, lɛkɛ 27.
3 Naka biukubuku “But de la vie”, mbakamba la so, kete sho kokaka tatɛ sawo ɔnkɔnɛ:
◼ “L’edja l’edja, onto tshɛ kana suke la tshɛ ndjoyambolaka dikambo di’oyango a lɔsɛnɔ. Onde ekɔ paka dia sɛna ɛnɔnyi 70 kana 80 ko l’ɔkɔngɔ ntshɔ lo diombo? Ko kana lɔsɛnɔ lekɔ la kitshimudi mɔtshi? Wɛ akanayɛ [Tshikɛ onto akɔ etena akadimole.] L’Osambu 37:29, sho mɛnaka ele sangwelo dia diambo diaki Nzambi lo dikambo di’onto ndo dia nkɛtɛ.” L’ɔkɔngɔ a mbala divɛsa diakɔ, towɛnya osato wele lo lɛkɛ 31, ndo tôlembetshiya woho wa lɔsɛnɔ layonga la so lo Paradiso.
4 Sho kokaka tatɛ sawola l’onto lo biukubuku “Voici” lam’awɛnyaso osato w’otondo wele lo lohoso ko mbombola ɔnɛ:
◼ “Oko le yɛ, ahombama dia kadimola nkɛtɛ ɔnkɔnɛ na? [Tshikɛ onto akɔ dihole asha kɔmatɛrɛ kɛmɔtshi.] L’osato ɔnɛ, onto tshɛ ekɔ la luudu ndo olimu wa dimɛna efula. Wɔladi wekɔ, mbo ya ndɛ yekɔ efula ndo nkɛtɛ kema l’edinga wa kɔlɔ. Kânga mbahetahetawɔ la mbidja weolo, mbolamatadi mbeyaka dia vɔ hawotokoka konya andja nganɛ. Koko, Bible toshikikɛka ɔnɛ Nzambi ‘ayetɛ diangɔ tshɛ eyoyo.’ [Fola biukubuku yakɔ lo lɛkɛ 30, ndo ala Enyelo 21:3, 4.] Biukubuku nyɛ yayokɛnya kɛnɛ kahombayɛ sala dia sɛna l’andja ɔsɔ w’oyoyo.” Naka onto akɔ ekɔ lo mɛnya saki mɛtɛ, tofole biukubuku lo lɛkɛ 3, ko sho mbɛ̂nya woho watotekaka l’onto Bible.
5 La Biukubuku “Nyudjase pundju l’ongenongeno la kete!” sho kokaka ndjela yoho nyɛ:
◼ “Anto efula kanaka ɔnɛ vɔ pombaka ntshɔ l’olongo dia toyala la lɔsɛnɔ la pondjo, ko ayoyota lo dikambo dia sɛna pondjo la nkɛtɛ na? [Tshikɛ onto akɔ dihole akadimole.] Bible toshikikɛka ɔnɛ: lɔsɛnɔ la pondjo kokaka monga, ndo tɔ totɛka woho wokokiso kotsha oyango ɔsɔ.” Ala Joani 17:3. L’ɔkɔngɔ diko tɛnya ɔtɛkɛtshi aso osato No. 49, ko mbombola ɔnɛ: “Onde wɛ kombolaka mbidjasɛ l’andja wele oko wɔnɛ?” Tɔ̂lɛkɛ biukubuku yakɔ ndo tôlake dia ndjowenda nto.
6 Tobukubuku tɛkɛtaka akambo wasalema nshi nyɛ, tɔ kadimolaka wembola wayambola anto ndo mbishaka ekeketshelo. Lam’ayotokambaka olimu la dihomɔ sɔ la kiɔmi, tayokimanyiyaka anto w’etema ɛlɔlɔ ‘dia vɔ koma lo ewo k’oshika ka mɛtɛ.’—1 Tim. 2:4.