Ekadimwelo Lo Wembola Anyu

◼ Lo na ahombaso monga la yewo lam’eso l’onto laha onyaso pami kana omoto l’olimu aso w’esambishelo na?

Sho kokaka mɛtɛ mbetawɔ ɔnɛ anangɛso l’akadiyɛso nangaka monga la lɔkɛwɔ l’ɔlɔlɔ efula. Lonyangu ko, tekɔ lo sɛna l’andja wambolola l’akambo wa mindo ndo ɛlɛmbɛ wa lɔkɛwɔ l’ɔlɔlɔ waya oko bu. Diɔ diakɔ diele, oyadi kânga tekɔ la tokanyi t’ɔlɔlɔ, sho pombaka mongaka la yewo wonya tshɛ di’aha mbotshanya sɔnyi kânga kɛndakɛnda lo yoho yahasungana. Dikambo sɔ diekɔ mɛtɛ djekoleko lam’eso l’olimu w’esambishelo.

Lam’atatasambisha, sho pomanaka mbala efula l’anto wele kema anyaso apami kana amato wɛnya saki kele oko ka l’otema ɔtɔi l’akambo wa mɛtɛ. Naka wɛmɛ mbatasambisha ko ndo onto akɔ ekɔ ndamɛ lakande, kete ayoleka dimɛna mbôsambisha la soko aha mbɔtɔ lo luudu lande. Naka nde ekɔ lo mɛnya saki, kete kokaka mbɔsa tɛdikɔ di’opandjudi okina kotshindɛ dia towenda nto kana ndjotshɔ wonya wele anto akina la ngelo. Naka hakoke, kete ayoleka ɔlɔlɔ wɛ toma opandjudi okina wele onyande pami kana omoto dia nde towenda. Sho kokaka ndjela alako asɔ nto lo kɛnɛ kendana la wekelo wa Bible l’onto laha onyaso pami kana omoto.​—⁠Mat. 10:⁠16.

Sho pombaka monga la yewo nto lam’asɔnaso onto latomba la so la tosambisha. Kânga mbakoka apandjudi ahende, pami la omoto mbokana dia sambishaka kâmɛ tena la tena, ndeka dimɛna vɔ mbɔtɔ l’olui ɔmɔtshi. Lo menda mɛtɛ, monga l’onto laha onyayɛ pami kana omoto edja nyu ahende ato, ko nde bu omɛyɛ kana wadiɛyɛ, kema dikambo dia tshundju kânga nyekɔ l’olimu w’esambishelo. Omalɔkɔ, ɔnangɛso lele l’ɔkɛndɛ wa kahanya anto otsha l’olimu w’esambishelo ayohomba mbɛdikola ɔlɔlɔ ko sɔhanya apandjudi, kâmɛ ndo ɛlɔngɔlɔngɔ.

Naka tayongaka totshundju, kete ‘hatotonga otamba wa takanya’ oyadi le so shamɛ kana le anto akina.​—⁠2 Kor. 6:⁠3.