Ekadimwelo Lo Wembola Anyu

◼ Onde sunganaka dia Okristo ndɔta ohele wa wɛma lo nshi y’ata?

Lo nshi y’ata w’oma la tomba lo wodja aso, anto k’anto efula wakalɔtɛ ehele wa wɛma l’anya kana l’ɔtɛ. Lande na? Lo dihole dimɔtshi, wanɛ wakalɔtɛ ehele wa wɛma wakɛnyaka oma lo tshelo shɔ ɔnɛ vɔ sukɛka lɛkɛ lɛnawɔ ɔnɛ ayodja otshumba. Tena dimɔtshi, ɔlɔtɛlɔ w’ohele wa wɛma aki djembetelo y’ohekwelo. Koko, l’ahole akina, ɔlɔtɛlɔ w’ohele wa wɛma akɔsamaka oko yoho mɔtshi ya ndjâshimbela. Anto wakalɔtaka dia ndjâkokɛ.

Okristo akandahombe ntsha na? Naka ɔlɔtɛlɔ w’ohele wa wɛma mɛnyaka ɔnɛ onto akɔ sukɛka lɛkɛ lɔmɔtshi kana lokina, kete ɔnɛ lɔlɔtshi honga lomange. Ko naka ohele wa wɛma ekɔ djembetelo y’ohekwelo, kete ɔnɛ lalɔta mɛnyaka ɔnɛ nde aki ɔndɔshi. Lo tena dia ngasɔ, Okristo pombaka mbohɔ ɛtɛkɛta wa Yeso wele lo Joani 17:16 wata ɔnɛ ambeki ande ‘hawonga wa l’andja ɔnɛ.’ Nde la dia mbohɔ nto woho wahomba monga atɛmɔdi wa Jehowa w’eshika lo ndjela pɔlɔfɛsi ka lo Isaya 2:​2-4. Avɛsa asɔ tokimanyiyaka dia sho monga la lokanyi la Nzambi l’akambo watomba lo nshi ya ta.

Ko kayotota dia lɛnɛ akawalɔtaka dia ndjâshimbela, ko onto akalɔtɛ di’aha vɔ mbôkanda asashi na? L’etena kɛsɔ, Okristo ndamɛ mbahomba mbɔsa yɛdikɔ dia ndɔta ohele wa wɛma kana kema. Naka nde akalɔtɛ lɛnɛ ɔsawɔ ohele akɔ oko yoho ya ndjâshimbela, kete ndoko onto lahomba mbɔ̂nyɔla.a Dikumanyi hawohombe nyanga dia mbeya kana nde ekɔ lomange kana bu. Koko vɔ la dia menda awui watawɔ lo Romo 14:4: ‘Wɛ na, lalomboya okambi w’onto okina? Koyanga nde kemadi, koyanga nde kɔkwɛ, ɔsɔ ele dikambo dia owandji ande.’ Ayotohomba fɔnya naka anto tshɛ hawosange lolemi lo kɛnɛ kendana la kitshimudi y’ohele wa wɛma? L’etena kɛsɔ, onto l’onto ayɔsa yɛdikɔ yande hita la ntondo ka Jehowa Nzambi, kana nde ayɔlɔta kana bu.​—⁠Ngal. 6:⁠5.

Ngande wakokaso nɔngɔsɔla nsanganya lo nshi ya ata naka nsɛnɔ y’anangɛso kokaka monga lo wale? Sho tanaka alako w’amɛna efula lo dikambo sɔ lo dibuku Organisés pour bien remplir notre ministère, lɛkɛ 167, odingɔ 1-3. Pombaka mbadia alako asɔ dimɛna.

Oko wadieyaso sho tshɛ, ta ekɔ kiɔkɔ y’ewanu efula ndo konyaka Akristo la ntondo ka tɔfwɛfwɛ ta mamba. Tena efula, tongaka ohomba mɛtɛ dia ‘sɛnaka ndo ndjalaka la yimba y’ɔlɔlɔ.’ (1 Tes. 5:⁠6) Djekoleko dikumanyi pombaka mbokaka dui esadi ndo mbidjaka yimba lo wahɔ wa lo nyuma w’anangɛso ndo mbâlɔmbɔla dimɛna lo kambaka l’awui wa lo Bible la wɛdimo.​—⁠Is. 32:⁠2.

[Footnote]