‘Lokumu l’ɔlɔlɔ lɔnɛ layosambishama’
1. Kakɔna katoshikikɛ dia ndoko ɛngɔ kakoka nshimba esambishelo ka lokumu l’ɔlɔlɔ?
1 Ndoko ɛngɔ kânga ɔtɔi kakoka nshimba Jehowa dia nde nkotsha lolango lande. (Is. 14:24) Kânga mbakadiɛnamaka dia ombadi Ngidiyɔna nde l’apami ande 300 kokoka nɛndja alembe w’ase Midiyana 135 000, Jehowa akawotɛ ate: “Tshoka, tutshunguli Isariyele uma lu anya wa Midiyana . . .; aha dimi kakutuma uka?” (Emb. 6:14) Olimu akɔna wasukɛ Jehowa ɛlɔ kɛnɛ na? Yeso akate ate: “Lukumu l’ololo lone la diulelu layusambishama lu kete tshe.” (Mat. 24:14) Ndoko onto lakoka nshimba di’olimu ɔsɔ kambema.
2. Lande na kakokaso nongamɛ ɔnɛ Jehowa ayotokimanyiya l’onto ndo l’onto l’olimu ande?
2 Jehowa tokimanyiyaka l’onto ndo l’onto: Kânga mbeso l’eshikikelo ɔnɛ Jehowa ayosala dia sho nkotsha olimu ande oko olui, onde sho kokaka nongamɛ dia nde ayotokimanyiya l’onto ndo l’onto? L’etena kakinde l’ohomba w’ekimanyielo, ɔpɔstɔlɔ Paulo akɛnyi woho wakôsukɛ Jehowa lo tshimbo y’Ɔnande Yeso. (2 Tim. 4:17) Sho kokaka monga l’eshikikelo ɔnɛ Jehowa ayɔtshɔkɔla welo wadjaso l’onto ndo l’onto dia nsala lolango lande.—1 Joa. 5:14.
3. L’akambo akɔna watokimanyiya Jehowa?
3 Onde ekakatanu wa lushi la lushi toshishɛka suke la wolo tshɛ wele la so dia nsambisha? Bible mbutaka ɔnɛ: “Ndi atushaka one lambokomo wulu.” (Is. 40:29-31) Onde wɛ ekɔ lo diɛnɛ l’ɔlɔshamelo kana l’ɔhɛnyɔhɛnyɔ? Osambu 55:22 kadimolaka ɔnɛ: “Ukitsha wutshu aye le [Jehowa], ku ndi ayukembelawo.” Onde wɛ toshishaka wɛkamu ayɛ tena dimɔtshi? Jehowa tokeketshaka ɔnɛ: “Utshu kakiane, dimi layuyala la unyo aye.” (Etum. 4:11, 12) Onde wɛ ekɔ la hemɔ yakoshimba dia wɛ ndjasha l’esambishelo lo ndjela akoka ayɛ? Jehowa mbɔsaka welo wa l’otema ɔtɔi wadjayɛ la nɛmɔ ndo nde koka nkamba la wɔ oyadi vɔ bu efula.—1 Kor. 3:6, 9.
4. Wɛkamu wele la so le Jehowa wekɔ la shɛngiya yakɔna le so?
4 Lonya la Jehowa “lambusimbo, eya lokonye na?” (Is. 14:27) Nyɛsɔ totetemale nsambisha “la dihonga lu wulu wa Khumadiondjo” aha la mpekɔ, tele l’eshikikelo k’ɔnɛ Jehowa ayotɔtshɔkɔla.—Etsha 14:3.