Ekambi w’Akristo pombaka nɔmbaka
1. Kakɔna kalɔmbama dia sho nkamba olimu w’esambishelo?
1 Hatokoke nkamba olimu w’esambishelo l’akoka aso hita nɛ dia Jehowa mbatosha wolo wa mbokamba. (Fil. 4:13) Nde kambaka l’andjelo ande dia tokimanyiya woho wa sho ntana anto wele oko ɛkɔkɔ. (Eny. 14:6, 7) Jehowa mbasala dia ntɔngɔ y’akambo wa mɛtɛ yonɛso ndo yatɛso ashi mbola. (1 Kor. 3:6, 9) Ekɔ ohomba efula dia ekambi w’Akristo ndjaɛkɛ le Shɛso lele l’olongo lo dɔmbɛlɔ.
2. Naa akambo amɔtshi wakokaso nɔmbaka?
2 Dia wahɔ aso hita: Sho pombaka nɔmbaka lo diaaso tshɛ diasambishaso. (Ef. 6:18) Naa akambo amɔtshi wakokaso nɔmbaka? Sho kokaka nɔmba dia mɛnaka anto wa l’ɛtshi kaso ka nkɛtɛ la sso di’ɔlɔlɔ ndo dia monga la dihonga. (Etsha 4:29) Lâdiko dia lâsɔ, sho kokaka nɔmba Jehowa dia nde tɔlɔmbɔla otsha le anto w’etema ɛlɔlɔ woho wa sho teka la wɔ Bible. Naka ompokami aso ambotoka dimbola, sho kokaka nsala dɔmbɛlɔ dia lo tshena pe l’etei k’otema dia nɔmba Jehowa woho wa nde tokimanyiya dia sho mbokadimola dimɛna. (Neh. 2:4) Ndo nto, sho mbeyaka mbɔlɔmba lomba dia sho ntetemala mbetsha olimu w’esambishelo lo dihole dia ntondo. (Jak. 1:5) Dia nkomiya, tatohɛke dia Jehowa ngɛnangɛnaka ɛtɛkɛta wa lowando wawotɛso lo diɛsɛ diele la so dia monga ekambi ande.—Kol. 3:15.
3. Ngande wakimanyiya alɔmbɛlɔ walɔmbɛso apandjudi akina di’esambishelo ntshɔ otsha la ntondo?
3 Dia wahɔ w’anto akina: Sho pombaka nto ‘nɔmbanɛka’ ndo nimolaka nkombo ya wanyaso ekambi lo dɔmbɛlɔ naka kokaka. (Jak. 5:16; Etsha 12:5) Onde hemɔ yele la so toshimbaka dia sho ndjasha l’esambishelo lo yɛdikɔ yɛdimi l’akoka aso? Naka ngasɔ, kete tɔlɔmbɛ wanyaso ekambi wele la demba dia wolo. Tatɔnyɔlake pondjo shɛngiya yakoka monga l’alɔmbɛlɔ aso le anto akina. Ekɔ nto dimɛna sho nɔmbaka di’ewandji wa lɛɛta mɛna esambishelo la sso di’ɔlɔlɔ di’anangɛso “ndjala la lumu la memakana ndu ki.”—1 Tim. 2:1, 2.
4. Lande na kahombaso ntetemala nɔmba?
4 Nsambisha lokumu l’ɔlɔlɔ lo nkɛtɛ k’otondo koludi l’anto ekɔ olimu wahatakoke nkamba la wolo aso hita. Naka sho ‘ntetemala nɔmba,’ kete Jehowa ayotokimanyiya dia sho nkotsha olimu aso.—Romo 12:12.