“Tosambisha dimɛna dimɛna” akambo wendana la Diolelo dia Nzambi
1. Dibuku diakɔna diayekama l’ɛtɛkɛta woshidiso engo lo Wekelo wa Bible wa l’etshumanelo ntatɛ lomingu la Ngɔndɔ ka sato 14?
1 Lo lomingu la Ngɔndɔ ka sato 14, 2011, tshumanelo diasala nsanganya lo Angɛlɛ, lo Falase, lo Kisahidi ndo lo Tshibɛmba diayotatɛ mbeka dibuku “Tosambisha dimɛna dimɛna” akambo wendana la Diolelo dia Nzambi (lo Falase) lo Wekelo wa Bible wa l’etshumanelo. Dibuku sɔ kɔndɔlaka awui wele lo dibuku di’Etsha lo yoho yakoka mbisha ɔnɛ ladia awui akɔ ɔngɛnɔngɛnɔ lo menda woho wakawayasalemaka. Dibuku Tosambisha dimɛna dimɛna hadiolembetshiya divɛsa la divɛsa, koko mɛnyaka wetshelo wakondjaso oma lo dibuku di’Etsha ndo tokimanyiyaka dia menda woho wakokaso nkamba l’awui akɔ.—Romo 15:4.
2. Lembetshiya akambo amɔtshi wele lo dibuku Tosambisha dimɛna dimɛna.
2 Akambo wele lo dibuku: Mbɔtwɛlɔ kele lo lɛkɛ 2 kekɔ la mukanda wasalanganya otema w’oma le Olui-walɔmbɔla wɛnya woho wakombolawɔ dia sho nkondja wahɔ oma lo dibuku diakɔ. Ntatɛ oma lo tshapita 2, etatelo ka tshapita tshɛ kekɔ la etelo kele la lokanyi layɔmbwama lo tshapita yakɔ ndo divɛsa diɛnya etenyi ka dibuku di’Etsha kayɔkɛtshanyema. Totshapita efula tekɔ la tokombo tele l’awui wendana la anto, ahole kana awui wakasalema. Diɔ diekɔ l’emamu wa weke wa sho fundaka nɔtɛ yaso. Dibuku diakɔ di’otondo diekɔ la esato w’akambo wakasalema lo nshi yakafundamaka Bible dia tokimanyiya dia sho monga oko anto wɛna awui akɔ ndo lɛkɛ l’ekomelo lekɔ la listɛ l’esato walembetshiya kɛnɛ kosangemi. Ledia ka lohoso la lâdiko ndo ka lohoso la la koma ekɔ kartɛ yatokimanyiya dia monga oko anto wɛna ahole wakatatshɔka anyaso atɛmɔdi wa lo ntambe ka ntondo etena kakawatatɛ dianganya lokumu l’ɔlɔlɔ ‘polo ndo lo tokoma ta nkɛtɛ.’—Etsha 1:8.
3. Ambola akɔna w’ohomba wayokadimwama lo wekelo aso wa dibuku di’Etsha?
3 Ekadimwelo lo ambola w’ohomba: Ɔsɛdingwelo wa dibuku di’Etsha ayotokimanyiya dia sho nkondja ekadimwelo wokɛma hwe lo ambola w’ohomba wendana l’olimu w’Akristo. Ɛnyɛlɔ, ambeki wa mɛtɛ wa Yeso Kristo mbeyamaka oma l’olimu ndo losango lakɔna? Olimu w’esambishelo ka l’andja w’otondo nɔmbwamaka oma le waa na, ndo ngande? Ɔlɔshamelo ndo ɔhɛnyɔhɛnyɔ mbishaka esambisha wa lokumu l’ɔlɔlɔ waaso akɔna? Ngande watokimanyiya nyuma k’ekila l’olimu aso w’esambishelo?
4. Ngande wakokaso nkondja wahɔ tshɛ lo tshɛ oma lo ɔsɛdingwelo wa dibuku nɛ?
4 Dia wɛ nkondja wahɔ tshɛ lo tshɛ oma lo dibuku diakɔ, eka awui wa lɔkɔ la ntondo ndo yalɔngɔsɔla dia tosha kɔmatɛrɛ lo ɔkɛtshanyelo wa l’etshumanelo. Koyalake lo losanganya tshɛ ndo nkana yimba lo woho wakokayɛ nkamba la kɛnɛ kamboyeka l’olimu ayɛ w’esambishelo. Ɔsɛdingwelo wa dibuku dia dimɛna efula nɛ watokeketsha dia nsambisha dimɛna dimɛna akambo wendana la Diolelo dia Nzambi!—Etsha 28:23.