Mukanda w’oma le Olui-walɔmbɔla

Asekaso ekambi wa ngandji,

Tekɔ l’ɔngɛnɔngɛnɔ efula dia nyofundɛ mukanda ɔnɛ l’etatelo k’ɔnɔnyi wa diambo ɔnɛ. Otsha l’ekomelo k’ɔnɔnyi 2014, Yeso Kristo ayokotsha ɛnɔnyi lokama wamondolɛ oko Nkumekanga kaso ka ngandji l’atei w’atunyi ande.—Osam. 110:1, 2.

L’etatelo k’ɔnɔnyi w’oyoyo w’olimu ɔnɛ, lo losanganya la l’ɔnɔnyi laki Watch Tower Bible and Tract Society of Pennsylvania, Kɔmite k’ekadimwelo ka Traduction du monde nouveau wakatondja ekadimwelo k’oyoyo ka Bible kambovuswama koleki dimɛna lo Angɛlɛ. Jehowa akakambe la anande wa lo nyuma dia ntondja Ekadimwelo k’andja w’oyoyo ka dimɛna kɛsɔ. (Rɔmɔ 8:15, 16) Shi kaanga dui sɔ nto mbetɛka ekadimwelo kɛsɔ ekadimwelo ka laande?

Aya ɛnɔnyi efula wele Kɔmite k’ofundelo ka Olui-walɔmbɔla ekɔ lo mbetsha okadimwelo wa Bible lo dihole dia ntondo. Ɛlɔ kɛnɛ, Ekadimwelo k’andja w’oyoyo kekɔ lo tanema la tshondo kana etenyi l’ɛtɛkɛta 121. Tambonyokeketsha dia nyu mɛnya Jehowa lowando l’efula lele la nyu l’ɔtɛ wa Bible kambonyokondja. Nyokiadiake ndo nyokanake yimba l’awui wa lɔkɔ lushi tshɛ. Lo nsala ngasɔ, nyayoyasukanya la Jehowa Nzambi lele Kiɔkɔ yatɔ.—Jak. 4:8.

Sho munandemaka etena kokaso ehemba wahomana l’anangɛso ndo akadiyɛso wa ngandji. Aha la taamu, vɔ mbeyaka monga l’okakatanu dia ngɛnangɛna kaamɛ l’anangɛwɔ lo tena dimɔtshi. Ɛnyɛlɔ, atete edja kele lɔsɛnɔ la nkumbo kɛmɔtshi ka l’Asiya lakatshikitana etena kakandama mama ka nkumbo la hemɔ kɔdia asɔnga la shashimoya. Hemɔ kɛsɔ kakahandjola adɔkɔtɛlɛ wa tomanamana wɔɔngɔ ndo vɔ komonga l’akoka wa mboosakɛ. Ɔsɔ mɛtɛ aki dui dia lonyangu. L’etena kɛsɔ omɛnde akatatɛ mbolama otsho la yanyi. Ɔnawɔ la pami ndo anawɔ ahende wa wamato wekɔ lo mbisha ɛnyɛlɔ k’ɔlɔlɔ k’Akristo lo sukɛ ambutshi awɔ la ngandji tshɛ. Nkumbo k’ɔlɔlɔ kɛsɔ ndo nyu tshɛ wanɛ wakatondoya ehemba wotshikitanyi koka monga l’ɔngɛnɔngɛnɔ waya oma lo mbikikɛ ehemba wa mbetawɔ. (Jak. 1:2-4) Jehowa shikikɛka Akristo w’akitami ndo sho ɛkɔkɔ ekina ɔnɛ tayonga l’ɔngɛnɔngɛnɔ naka sho ntetemala mbikikɛ ehemba, nɛ dia nde ayotɔtshɔkɔla lo tosha woshasha wa lɔsɛnɔ la pondjo.—Jak. 1:12.

Ɔnɔnyi wetshi, anto 19 241 252 mbakɔtɔ lo Eohwelo ka nyɔi ka Yeso. Ande ekeketshelo kakondjaso lo mɛna anto efula watombola Jehowa ndo Yeso Kristo lo mbɔtɔ lo losanganya loleki ohomba la l’ɔnɔnyi l’ekambi wa Nzambi lee! Lo nshi ya Eohwelo, waelo wa lotombo wakadɛ etena kakonge miliyɔ y’anto ambatshi mboka wa tshanda lo Ngɔndɔ ka sato ndo ka nɛi. Ande ɔngɛnɔngɛnɔ lee! Onde wɛ kɔngɛnangɛna dia mbeya ɔnɛ wanɛ wakamba oko ambatshi mboka wa tshanda lo nshi ya lomingu la laande wayɔtɔka lo losanganya l’otondo layosala omendji w’otshimbedi l’ambatshi mboka oyadi wembwelo ande hosalema lo Ngɔndɔ ka sato kana ka nɛi? Akanga wa tomba lo nyuma shihodiaka ohomba wa ntetemala monga l’ohetoheto l’esambishelo ndo l’elimu wa l’etshumanelo. Monga l’akambo efula wa nsala tokimanyiyaka dia ntshikala nge ndo dia nshika tanga la ntondo k’ehemba wa Diabolo lalanga ndanya mbetawɔ kaso ndo tokonya dia nshisha oyango.—1 Kɔr. 15:58.

Ande ekeketshelo kakondjaso lo mbeya dia l’ɔnɔnyi w’olimu wetshi anto 277 344 wakabatizama l’ashi ndo wekɔ lo mboka katɔla otsha lo lɔsɛnɔ la pondjo kaamɛ la anangɛwɔ l’akadiyɛwɔ lee! (Mat. 7:13, 14) Anto w’eyoyo asɔ wekɔ l’ohomba w’ekimanyielo kaso dia vɔ ‘nshikimala lo mbetawɔ.’ (Kɔl. 2:7) Totetemale keketshana dia mbikikɛ polo l’ekomelo. (Mat. 24:13) “Nyokambe la ɛtɛkɛta w’esambelo le wanɛ wambɔkɔmɔ, nyosuke wanɛ wele wɔdu ndo nyonge la solo dia lotutsha otsha le anto tshɛ.” (1 Tɛs. 5:14) Ɔnkɔnɛ, onto tshɛ la l’atei aso “[a]tetemale nɔmba” ɔnɛ: “Diolelo diayɛ diaye.”—1 Tɛs. 5:17; Mat. 6:10.

Annuaire ɔnɛ watɔngɛnyangɛnya ndo nyeye dia sho nyokaka ngandji nyu tshɛ.

Anangɛnyu,

Olui-walɔmbɔla w’Ɛmɛnyi wa Jehowa