Onde wɛ akeyaka?
Lande na kele aki dimɛna dia Jehowa mbetawɔ di’ase Isariyɛlɛ nambolaka benga ndo tokudumba oko olambo?
LO Ɛlɛmbɛ dikumi, waketawɔka dia nambola Jehowa benga ndo tokudumba oko olambo. L’ɛlɛmbɛ wendana l’elambo, mbala tshɛ vɔ tɛkɛtaka dia tofudu tohende tɔsɔ kaamɛ ndo onto akakokaka nkamba la fudu kɛmɔtshi lo dihole dia kekina. (Lɛw. 1:14; 12:8; 14:30) Lande na kele dui sɔ diaki la wahɔ? Ɔkɔkɔ ɔmɔtshi ele, aha tena tshɛ mbakatanemaka benga esadi eto. Lande na?
Enga
Nɛ dia benga diakadjasɛka lo bɛtshi dia nkɛtɛ dia l’Isariyɛlɛ lo ngɔndɔ yakawalɛka yanyi. Lo ngɔndɔ ka dikumi tshɛ, tɔ takatshɔka lo wedja wakawalɛka yanyi ndo tɔ takakalolaka lo Isariyɛlɛ lo nshi yakawalɛka yanyi. (Lem. 2:11, 12; Jɛr. 8:7) L’Isariyɛlɛ w’edjedja, ase Isariyɛlɛ waki l’okakatanu dia nkimɔ benga oko olambo lo nshi y’amvula.
Kudumba ele lo wooko
Lo wedi okina, tokudumba takɛnamaka tena tshɛ l’Isariyele l’edja k’ɔnɔnyi. Kɛnɛ koleki ele, tokudumba tekɔ tofudu talonga anto. (Ɛdika la Joani 2:14, 16.) Lo ndjela dibuku dimɔtshi (Bible Plants and Animals), “ngelo ndo esomba tshɛ wa lo Palestinɛ wakalongaka tokudumba. Onto tshɛ aki la lokoto kana wosho ɔmɔtshi l’ehele wakadjasɛka tokudumba.”—Ɛdika la Isaya 60:8.
Kudumba ele lo lokoto
Ɔnkɔnɛ, Jehowa akɛnya dia nde mbokanaka ngandji ndo ekɔ l’ekanelo k’ɔlɔlɔ etena kakandetawɔ dia tofudu takatanemaka esadi eto l’Isariyɛlɛ l’edja k’ɔnɔnyi kimɔmaka oko olambo.