Onde wɛ aakohɔ?
Onde wɛ akadia la yambalo tshɛ numɛlɔ ya Tshoto y’Etangelo y’ɔnɔnyi ɔnɛ? Naka ngasɔ, kete enda kana wɛ koka nkadimola ambola wayela anɛ:
Kakɔna kahombaso nsala dia ‘nɔngɔsɔla timba taso’? (Rɔmɔ 12:2)
Dui sɔ nɔmbaka awui efula oleki ndodia lɔsɛnɔ layɛ la etsha w’ɛlɔlɔ. Dui sɔ mendanaka ndo la nsɛdingola lonto laso la l’etei k’otema ndo nsala etshikitanu tshɛ wahombama dia sho nkitanyiya atɔndɔ wa Nzambi lo yɛdikɔ yakoka.—w23.01, lk. 8-9.
Ngande wakokaso mɛnya wɛdimo etena kasɛdingolaso awui weta l’andja?
Tekɔ lo ndjasha efula lo woho watakotsha awui weta nshi nyɛ prɔfɛsiya. Sho pombaka mbewɔ dia mfɔnya kɛnɛ kayotomba, nɛ dia dui sɔ koka ndjotondja diatɔnelo lam’asaso, sho salaka la wolo di’awui watɛkɛtaso ntomba oma lo kɛnɛ kakatondja okongamelo wa Jehowa. (1 Kɔr. 1:10)—w23.02, od. 16.
Ngande wotshikitanyi batisimu ka Yeso la batisimu k’ambeki ande?
Nde komonga l’ohomba wa ndjakimɔ le Jehowa oko wasalaso, nɛ dia wodja wakandotɔ wakayakimɔ le Nzambi. Yeso aki kokele, kosala pɛkato. Nde komonga l’ohomba wa ndjatshumoya oma lo pɛkato yande.—w23.03, od. 5.
Ngande wakokaso nkimanyiya anto akina dia mbishaka kɔmatɛrɛ lo nsanganya?
Sho koka ntetemala mbisha kɔmatɛrɛ ya tomondo, dia nyomoleka mbisha anto akina diaaso dia vɔ lawɔ mbisha kɔmatɛrɛ. Sho koka nto mbewɔ ntɛkɛta awui efula. Ekɔ awui akina wakoka anto akina mbisha kɔmatɛrɛ.—w23.04, od. 23.
“Mboka k’Ekila” kɔtɛkɛtami lo Isaya 35:8 mendanaka la na?
Mboka ka woke ka didjidji kɛsɔ kakendanaka ntondotondo la mboka kakande ase Juda lɔkɛndɔ lɔkɔ oma la Babilɔna otsha lo wodja awɔ. Kayotota dia “Mboka k’ekila” ɛlɔ kɛnɛ? Ntambe efula la ntondo ka 1919, elimu wɔlɔngɔswɛlɔ wakasalema, l’atei w’awui akina wakasalema mbele ndo okadimwelo ndo otondjelo wa Bible. Ekambi waki Nzambi wambotatɛka minda lɔkɛndɔ lo “Mboka ka woke k’ekila” katɔla lo paradiso ka lo nyuma, kakonya l’ɛtshɔkɔ wayotela Diolelo.—w23.05, lk. 15-19.
Tokedi tshapita 9 mbishaka alako akɔna wakeketsha lo dikambo dia wamato ahende wa didjidji?
Tokedi tɛkɛtaka dia “womoto l’enginya” lele leeta lande konyaka lo “Diombo” ndo dia “lomba la mɛtɛ,” lele dijdidji dia womoto, lele leeta lande konyaka “lo mboka ka yimba” ndo ka lɔsɛnɔ. (Tok. 9:1, 6, 13, 18)—w23.06, lk. 22-24.
Ngande wakɛnama okitshakitsha waki Nzambi ndo ekanelo kande k’ɔlɔlɔ lo woho wakandasalɛ Lɔta akambo?
Jehowa akatɛ Lɔta dia mimɔ oma la Sɔdɔma ko ndawɔ otsha lo lɛkɛ l’akona. Lɔta akasɛngasɛnga Nzambi dia nde ntshɔ la Zɔara, ko Nzambi aketawɔ kɛnɛ kakandɔlɔmbɛ.—w23.07, od. 21.
Kakɔna kakoka wadi nsala naka olonganyi ande ekɔ lo menda awui wɛnyawɔ anto etakataka?
Nde hakoke ndjaɛndja onongo. Nde pombaka nsala la wolo dia ndeka ndjasha lo diɔtɔnganelo diasande la Nzambi ndo nde pombaka kanaka yimba l’ɛkɔndɔ wa lo Bible wa wamato waki l’ekakatanu ndo wakatane esambelo le nde. Nde kokaka nkimanyiya omɛnde dia nde mbewɔ awui wakoka ndjokonya lo menda awui wɛnyawɔ anto etakataka.—w23.08, lk. 14-17.
Etena kɔtɔ dietawɔ diaso l’ohemba, ngande wakoka shɛnɔdi tokimanyiya dia monga la yimba y’ɔlɔlɔ?
Sho koka mbɔsa dimbola kana okakatanu akɔ oko dui diatokimanyiya dia mbeya kɛnɛ kafɔnya anto akina kana lo dihole dia mfɔnya dia dimbola diande ekɔ yoho mɔtshi ya tɔnyɔla, nkana yimba lo woho wele dimbola diande koka kokimanyiya dia wɛ nkondja wetshelo oma lo kɛnɛ koleki ohomba le nde. Ngasɔ mbayotoyalɔngɔsɔla dia nkadimola la memakana.—w23.09, od. 17.
Wetshelo akɔna wakondjaso oma le Mariya lo nkondja ekeketshelo?
Lam’akandeye dia nde ayanga nkoma nyango Mɛsiya, Mariya akakondja ekeketshelo oma le anto akina. Ngabriyɛlɛ nde la Elizabɛtɛ wakasha Mariya ekeketshelo k’oma l’Afundelo. Sho la wɔ koka keketshama oma le asekaso ambetawudi.—w23.10, od. 15.
Ngande ondo wakadimola Jehowa alɔmbɛlɔ aso?
Nde tolakaka dia nde ayoka alɔmbɛlɔ aso ndo nde sɛdingolaka dia kana alɔmbɛlɔ wɔlɔmbaso mbɔtɔnɛka la lolango lande. (Jɛr. 29:12) Nde mbeyaka nkadimola lo alɔmbɛlɔ akɔ waamɛ lo toho totshikitanyi, koko nde tosukɛka mbala tshɛ.—w23.11, lk. 21-22.
Rɔmɔ 5:2 tɛkɛtaka dikambo dia “elongamelo,” laasɔ lande na katɛkɛtamadiɔ nto lo divɛsa 4?
Etena kahokamɛnde lokumu l’ɔlɔlɔ, onto ɔmɔtshi mbeyaka ngɛnangɛna l’elongamelo kaya la nde ka nsɛna lo paradiso ka la nkɛtɛ. Koko etena kalɔshanande l’asui, kawakikɛnde ndo ketawɔmande le Nzambi, ondo elongamelo kande kayoleka nkeketala wolo ndo kayoleka monga dui dia mɛtɛ le nde.—w23.12, lk. 12-13.