Dibuku di’edjedja diele ohomba lo lɔsɛnɔ la nshi nyɛ
Anto efula mbɔsaka dia Bible kekɔ dibuku di’ekila. Koko, Bible bu tsho dibuku di’ekila diatotɛ woho wa ntɛmɔla Nzambi, tɔ kekɔ l’awui akina efula. Tɔ kekɔ l’alako w’eshika wendana la lɔsɛnɔ la lushi la lushi.
Tende kɛnɛ kata anto amɔtshi dia wahɔ wakawakondja oma lo wadielo wa Bible ndo woho wakambawɔ l’alako wa lɔkɔ lo nsɛnɔ yawɔ.
“Lɔsɛnɔ lami lamboleka ndowana. Woho wayaokami ndo yoho yami ya nkanyiya ambolowana. Lamboleka monga l’ɔngɛnɔngɛnɔ.”—Fiona.
“Laya l’oyango w’oshika lo lɔsɛnɔ lami diɛsɛ la wekelo wa Bible.”—Gnitko.
“Lɔsɛnɔ lami lambotshikitana efula lo yoho ya dimɛna. Handjoleka nkamba olimu efula ndo loleka mbetsha wenya efula kaamɛ la nkumbo kami.”—Andrew.
Bɛnyɛlɔ dikina dia ngasɔ diekɔ efula. Anto efula wa l’andja w’otondo wamboshola dia Bible mbishaka ɛlɔmbwɛlɔ k’oshika kendana la lɔsɛnɔ la lushi la lushi.
Tende woho wakoka Bible nkimanyiya onto dia ndowanya . . .
Yoonge ya demba
Woho wa mbahemɛ nkɛlɛ kaso
Lɔsɛnɔ la lo nkumbo ndo lɔngɛnyi
Mbeya woho wa nkamba la falanga
Lonyuma
Asawo wayela wayɛnya dia Bible kekɔ dibuku di’oma le Nzambi, diakoka kokimanyiya l’awui amɔtshi shikaa wendana la lɔsɛnɔ layɛ la lushi la lushi.