Wetshelo washa elongamelo

Nzambi ayonya akanga wa kɔlɔ

“Etena katomba akanga wa kɔlɔ oko adiyo ndo kangɔna atshi wa kɔlɔ tshɛ, ele dia vɔ ndanyema pondjo pondjo.”​—OSAMBO 92:7.

Oko wakatadiɛnyi lo sawo dietshi, awui wa kɔlɔ wekɔ lo tatetemala mfula. Dui sɔ hadiokoke tambiya. Laadiko wa laasɔ, Bible kakatatshi lo 2 Timɔte 3:1-5 dia lo nshi “y’ekomelo” anto wayonga la kɛwɔ ya kɔlɔ efula. Etena katɛkɛtaso dia nshi y’ekomelo, kakɔna kalembetshiya dui sɔ? Kɛsɔ mɛnyaka dia tekɔ lo ntɛkɛta dikambo dia ekomelo k’anto wahalange nkitanyiya Nzambi. Keem’edja, Nzambi ayanga minya wanɛ watona nsala etshitanu w’awui wa kɔlɔ wasalawɔ. Oma laasɔ, paka anto w’ɛlɔlɔ, mbuta ate wanɛ wakitanyiya Nzambi, mbayɔsɛna lanɛ la nkɛtɛ. “Anto w’ɛlɔlɔ wayokita nkɛtɛ, ndo wayodjasɛka lɔkɔ pondjo pondjo.”​—Osambo 37:29.

Nzambi ayolanya Satana

“Nzambi kasha wɔladi ayanga minola Satana.”​—RƆMƆ 16:20.

Etena kayolanyema Satana, ɛdiɛngɛ ndo anto wa kɔlɔ tshɛ, wɔladi wayoyala lo nkɛtɛ k’otondo. Otungi aso ndakaka ɔnɛ: “Ndo ndooko onto layowaotsha[kotsha] wɔma.”​—Mika 4:4.

Nzambi ayokomiya hemɔ ndo nyɔi

“Luudu la dipɛma laki Nzambi laya kaamɛ la anto . . . Nde ayokitola asɔyi tshɛ oma lo washo awɔ, nyɔi hatoyala nto, otanda hatoyala nto, delo hatoyala nto, kaanga kandji hatoyala nto.”​—ƐNYƐLƆ 21:3, 4.

Asui ndo hemɔ wayokomɛ nɛ dia Nzambi ayɔlɔngɔsɔla awui tshɛ wa kɔlɔ wakasale Satana, Adama, Eva ndo eongelo kaso kele keema kokele. Etombelo wayonga ele “nyɔi hatoyala nto.” Anto woka Nzambi ngandji ndo wa wokitanyiya wayɔsɛna pondjo pondjo. Ko lende ayowotɔsɛna?

Otungi aso ayokonya nkɛtɛ Paradiso

“Oswe wa shɛnga ndo nkɛtɛ y’ofumbo yayɔngɛnangɛna, ndo laandja l’oswe layonga l’ɔlɔ ndo layɔmɔnga oko dɛmbɔlɛmbɔ dia safra.”​—ISAYA 35:1.

Etena kayolanya Nzambi akanga wa kɔlɔ, nkɛtɛ kayoyala paradiso! Tɔ kayolola tɔɔ la parkɛ ndo dikambɔ di’amɛna ndo tɔ kayotondja diangɔ dia ndɛ tshavutshavu. (Osambo 72:16) Ndjale, eduwa ndo ɛkɛdi wayonga pudipudi ndo wayosala dia lɔsɛnɔ monga. Ndo ondo kaanga tshɛkɛta “mindo” yayoshishɔ l’enyɔ aso! Anto wayoka mvudu yawɔ hita ndo wayodjasɛka lɔkɔ. Ndo ndooko onto layohomba dihole dia mbidjasɛ, layotata ndjala kana layonga wola.​—Isaya 65:21, 22.

Nzambi ayolola wanɛ wakavu

‘Eolwelo kayoyala.’​—ETSHA 24:15.

Onde wɛ ayolanga nyomoyɛnana la wakiyɛ wa ngandji wakavu? Nzambi Kanga-wolo-tshɛ ayowaolola dia vɔ ndjɔsɛna lo paradiso ka la nkɛtɛ. Wɛ ayowaeya ndo vɔ wayokeya. Ohokanyiya ɔngɛnɔngɛnɔ wayonga layɛ ndo wayonga lawɔ! Lande na kakokaso mbuta dia elongamelo kɛsɔ kayokotshama? Ele nɛ dia Bible toshaka bɛnyɛlɔ di’epalanga ndo di’akɛnda wakoolɔ oma lo nyɔi ndo wakanyomoyonga nto kaamɛ la nkumbo yawɔ. Ndo nto mbala efula, Yeso akoolola anto ntondo ka nyembanyemba y’anto.​—Luka 8:49-56; Joani 11:11-14, 38-44.