Shɛngiya yakɔna yele la tshulatshula lo diwala diayɛ?
Wadi l’omi koka nkeketsha dimama diawɔ naka vɔ nkamba dimɛna la tshulatshula. Ɛnyɛlɔ, diɔ kokaka nkimanyiya atshukanyi dia vɔ sawolaka dimɛna lushi l’otondo.
Koko, atshukanyi amɔtshi kambaka la telefɔnɛ kana tablɛtɛ lo yoho ya kɔlɔ. Dui sɔ mbeyaka ndjaakonya l’ekakatanu wayela ɛnɛ . . .
diɔ mbeyaka ndjashishɛ wenya w’amɛna wahombawɔ mbetshaka kaamɛ.
diɔ mbeyaka ndjakonya dia mbetshaka wenya efula l’olimu ndo nsala akambo wele bu ohomba.
diɔ koka ndjowaekola timba ndo kaanga mbakonya diaha monga la kɔlamelo lam’asawɔ.
KƐNƐ KAHOMBAYƐ MBEYA
MBETSHA WENYA KAAMƐ
Pami kɛmɔtshi kelɛwɔ Michael mbutaka ɔnɛ: “Tena dimɔtshi etena kodjashiso dimi la wadɛmi kaamɛ, mongaka wate kana mɛtɛ nde bu lawɔ. ‘Nde ekɔ lo ndjasha tshɛ paka lo telefɔnɛ kande ndo nde mbutaka ate ekɔ oko talakambe la telefɔnɛ polo ndo wonya ɔnɛ.’” Pami kɛmɔtshi kelɛwɔ Jonathan mbutaka dia l’awui wele oko wasɔ “kokaka mɛnama dia wadi l’omi wekɔ lo dihole diaamɛ etena kele wekɔ lo ndjaoka dia vɔ mangana etale.”
DIMBOLA DIA NKANA LA DIƆ YIMBA: Wenya engana watoyɔsaka dia nsawola, tomanɛ mesajɛ kana menda dui dimɔtshi lo telefɔnɛ kana tablɛtɛ etena kele wɛ pombaka mbetshaka wenya kaamɛ l’olonganyi ayɛ?—ƐFƐSƆ 5:33.
OLIMU
Anto amɔtshi kambaka elimu walɔmba dia mongaka la telefɔnɛ wonya tshɛ dia kadimolaka lo ambola kana ntoma mesajɛ polo ndo l’otsho. Anto akina wele hawokambe elimu waalɔmba dia nsala awui asɔ, koka ntetemala monga l’okakatanu wa mimɔ oma l’elimu awɔ l’ɔkɔngɔ wa wenya w’olimu nshila l’ekomelo ka lushi. Pami kɛmɔtshi kelɛwɔ Lee mbutaka ɔnɛ: “Mongaka okakatanu diaha menda waa apɛlɛ kana mesajɛ walongolami wendana l’olimu lo wenya wakatakongɛ dia mbetshaka kaamɛ la wadɛmi.” Womoto ɔmɔtshi lelɛwɔ Joy mbutaka ɔnɛ: “Dimi kambaka oma la ngelo, diakɔ diele mongaka wolo efula le mi dia mbeya etena kahombami memɛ olimu. Nɔmbamaka mbidja welo efula dia monga la wɛdimo.”
DIMBOLA DIA NKANA LA DIƆ YIMBA: Onde wɛ pokamɛka la yambalo tshɛ olonganyi ayɛ etena kakotɛnde dui dimɔtshi?—LUKA 8:18.
KƆLAMELO
Ɔkɔnya ɔmɔtshi wakasalema wakɛnya dia okambelo wa kɔlɔ wa la rɛzo sɔsio mbele lo kiɔkɔ ya ata watomba lam’asa wadi l’omi. Pursa dikumi ya wanɛ wakawakɔnya mbetawɔka dia wakadje awui amɔtshi lo woshɛshɛ l’Ɛtɛrnɛtɛ wele elonganyi awɔ haweye.
Anto efula mbutaka dia rɛzo sɔsio koka monga waale efula le atshukanyi ndo mongaka wɔdu efula dia vɔ ndjɔkɔ kaanga “lo loseka.” Aha la taamu, avɔka wele tomanyi lo kɛnɛ kendana la odiakelo w’awala mbutaka dia rɛzo sɔsio mbele lo kiɔkɔ y’odiakelo w’awala efula ɛlɔ kɛnɛ.
DIMBOLA DIA NKANA LA DIƆ YIMBA: Onde wɛ toshɛka olonganyi ayɛ asawo watoyosawolaka l’onto lotshikitanyi la yɛ tenyi dia demba lo telefɔnɛ?—TOKEDI 4:23.
KƐNƐ KAKOKAYƐ NSALA
SHIKIKƐ AWUI WOLEKI OHOMBA
Onto latona ndɛ hatongaka la demba dia dimɛna. Woho wakɔ waamɛ mbele, onto lahetsha wenya kaamɛ l’olonganyi ande ayonga l’ekakatanu lo diwala diande.—Ɛfɛsɔ 5:28, 29.
TƆNDƆ DIA LO BIBLE: “Nshikikɛ akambo woleki ohomba.”—FILIPƐ 1:10.
Kɛtshanya l’olonganyi ayɛ alako wayela anɛ, walanganyu nkamba la wɔ kana mfunda tokanyi tayɛ hita dia nshimba diaha tshulatshula ndjonga la shɛngiya lo diwala dianyu.
Yadjɛ oyango wa ndɛɛka kaamɛ kaanga mbala ɔtɔi lushi tshɛ
Shikikɛ tena dienyu hanyotokambaka la telefɔnɛ yanyu
Kongɛ datɛ dimɔtshi diahombanyu mbetshaka diaaso dia laande kaamɛ
Dimaka telefɔnɛ yanyu l’otsho, ndo ndjikitsha lo dihole dimɔtshi etena koshaminyu
Ɔsaka minitɛ 15 lushi tshɛ dia nyu sawolaka kaamɛ, aha monga suke la telefɔnɛ
Shikikɛ wonya shikaa wahanyatokambaka l’Ɛtɛrnɛtɛ