Nzambi ndakaka dia nkɛtɛ kayotshikalaka pondjo

Kɛsɔ mbakate olui ɔmɔtshi w’anyangiyanyi w’oma lo wedja w’otshikitanyi lo kɛnɛ kendana la otshikitanu wa ndjungudungu. Naka wɛ ekɔ la mbetawɔ le Otungi wayakiyanya dikambo di’anto, kete kɛnɛ kakate ambeyi wa siansɛ kɛsɔ koka kohola dia Nzambi akatonge nkɛtɛ l’akoka wa ndjalɔngɔsɔla tɔamɛ.

Koko, lam’ele anto wamboleka ndanya nkɛtɛ, tɔ hatokoke ndjalɔngɔsɔla tɔamɛ. Lande na kakokaso monga l’eshikikelo ɔnɛ Nzambi ayosala dui dimɔtshi lo dikambo dia nkɛtɛ?

Sɛdingola avɛsa wele lo kiombo washikikɛ dia nkɛtɛ kayotshikalaka pondjo ndo kayonga dimɛna efula.

• Nzambi mbakatonge nkɛtɛ. “Lo etatelo, Nzambi akatonge olongo la nkɛtɛ.”—Etatelo 1:1

• Nzambi mbele kanga nkɛtɛ. “Jehowaa kakanga nkɛtɛ ndo ɛngɔ tshɛ kele lɔkɔ.”—Osambo 24:1

• Nzambi akatonge nkɛtɛ dia yɔ tshikalaka pondjo. “Nde akashikikɛ nkɛtɛ lo atshina ayɔ; yɔ hayomɔki oma lo dihole diayɔ pondjo pondjo.”—Osambo 104:5

• Nzambi ndakaka dia lɔsɛnɔ layongaka dimɛna la nkɛtɛ pondjo pondjo. “Nzambi ka mɛtɛ, ɔnɛ lakasale nkɛtɛ, . . . laki kondjitonga otongatonga, koko akayikenge dia anto mbidjasɛka lɔkɔ.”—Isaya 45:18

• Nzambi ndakaka di’anto wayɔsɛnaka la nkɛtɛ pondjo pondjo. “Anto w’ɛlɔlɔ wayokita nkɛtɛ, ndo wayodjasɛka lɔkɔ pondjo pondjo.”—Osambo 37:29

Nzambi akatonge nkɛtɛ di’anto ngɛnangɛnaka la lɔsɛnɔ lɔkɔ aha la kilanya. Bible kakate dia l’etena kakandashikikɛ, Jehowa Nzambi ayolanya akanga wa lokaki walanya nkɛtɛ. —Ɛnyɛlɔ 11:18

Bible mɛnyaka dia Nzambi ndakaka dia nde ayanga nkadimola nkɛtɛ kɛnɛ paradiso ka dimɛna efula ndo ɔnɛ nde ayokukola lonya lande dia “kotshaka nsaki ka ɛngɔ tshɛ kasɛna.”—Osambo 145:16