ƆKƆNDƆ 6

Ɔna l’ɔlɔlɔ l’ɔna la kɔlɔ

OHENDA Kɛna la Abɛlɛ kakianɛ. Vɔ akɔ ahende wambôla. Kɛna akayala okambi a dikambɔ. Nde akonɛka nɔnɔ, elowa ndo akatshikatshi.

Abɛlɛ akayala olami w’ɛkɔkɔ. Nde akalangaka kokɛ ɛkɔkɔ a totshitshɛ. Vɔ mbolaka esadi eto ndo komaka ɛkɔkɔ a weke, ko esadi eto kete Abɛlɛ aya la lemba la woke l’ɛkɔkɔ la namaka.

Lushi lɔmɔtshi Kɛna la Abɛlɛ wakela Nzambi olambo ɔmɔtshi. Kɛna akela mbo ya ndɛ mɔtshi yakandonɛ. Abɛlɛ nde lawɔ akela ɔkɔkɔ w’olangala efula waki lande. Jehowa akangɛnangɛna Abɛlɛ la olambo ande. Koko nde kɔngɛnangɛna Kɛna la olambo ande. Onde wɛ mbeyaka lande na?

Aha dikambo di’ɔnɛ olambo waki Abɛlɛ akaleke waki Kɛna dimɛna. Ekɔ dikambo dia Abɛlɛ aki ɔna l’ɔlɔlɔ. Nde akalangaka Jehowa ndo ɔnango. Koko Kɛna aki ɔna la kɔlɔ; nde konangaka ɔnango.

Omalɔkɔ, Nzambi akatɛ Kɛna dia nde tshikitanya lɔkɛwɔ lande. Koko Kɛna konanga. Nde akomala hakoke nɛ dia Nzambi akaleke nanga Abɛlɛ. Omalɔkɔ, Kɛna akatela Abɛlɛ ate: ‘Totshu l’ekambɔ.’ Lɛkɔ, etena kakiwɔ paka vɔ ahende ato, Kɛna akakɔmɔla Abɛlɛ w’ɔnango. Nde akokule efula ko l’ekomelo nde akayodiakaka. Onde ɔsɔ komonga onongo a woke wakakongola Kɛna oka?

Kânga mbakavu Abɛlɛ, Nzambi ekɔ lo mbôhɔ. Abɛlɛ aki ɔna l’ɔlɔlɔ, ndo Jehowa hakoke mbohe onto la ngasɔ. Omalɔkɔ, lushi lokina, Jehowa Nzambi ayolola Abɛlɛ. L’etena kɛsɔ, Abɛlɛ hatokoka mvɔ nto pondjo. Nde ayoyala l’akoka wa monga la lɔsɛnɔ la pondjo lanɛ la kɛtɛ. Shi ayonga dimɛna dia mbeya anto wele oko Abɛlɛ?

Koko Nzambi hangɛnangɛna anto wele oko Kɛna. Diɔ diakɔ diele, l’ɔkɔngɔ wa Kɛna ndjaka ɔnango, Nzambi akawosha dilanya lo mbowanganya etale efula l’anto akina a l’atei a nkumbo kawɔ. Etena kakatatshɔka Kɛna dia todjasɛ lo lɛkɛ lokina la kɛtɛ, nde akatshu la kadiyɛnde kɛmɔtshi, ndo ɔsɔ akɔ mbakatongaka wadiɛnde.

L’edjedja ka wonya, Kɛna la wadiɛnde wakayotatɛka mbota ana. Ana akina w’apami ndo wa amato waki Adama la Eva wakayotshukanaka lam’asawɔ, ko ndo vɔ lawɔ wakayotaka ana. Tatɛ oma l’etena kɛsɔ, anto wakafulanɛ la kɛtɛ. Tênde yema y’akambo w’endana l’amɔtshi a l’atei awɔ.

Etatelu 4:​2-26; 1 Joani 3:​11, 12; Joani 11:⁠25.