ƆKƆNDƆ 9
Nɔa ambɔsɛla wâto a luudu
NƆA aki la wadi ɔtɔi l’ana asato w’apami. Nkombo yawɔ nyɛ: Shɛma, Hama la Jafɛta. Ndo ɔna l’ɔna aki la wadi ɔtɔi. Omalɔkɔ, nkumbo kaki Nɔa aki l’anto enanɛi.
Kakianɛ Nzambi ambosha Nɔa olimu a diambo. Nde akawotɛ dia nde sɛla shaka ya wâto a luudu. Wâto akɔ aki woke efula oko masuwa, koko vɔ wakaleke fɔna l’ɔshɛtɛ a woke. Nzambi akawotɛ ate: ‘sɛlawɔ etagɛ esato ndo atolawɔ lo mvudu ya l’etei.’ Mvudu yakɔ yaki dikambo dia Nɔa la nkumbo kande, wa nyama ndo mbo ya ndɛ yaki ohomba le wɔ.
Nzambi akatɛ Nɔa nto dia nde kakatanya wâto a luudu akɔ dimɛna di’aha ashi mbɔtɔ lɔkɔ. Nzambi akate ate: ‘Dimi layanga ndɔsha Mvula k’Elola ndo nanya andja w’otondo. Anto tshɛ wayonga l’andja a wâto a luudu wayovɔ.’
Nɔa l’anande wakakitanyiya ɛtɛkɛta waki Jehowa ndo wakatatɛ la sɛla. Koko anto akina wakawaɔlaka paka mbaɔla tsho. Wakatetemala la ndjâla paka atshi wa kɔlɔ. Ndoko onto laketawɔ Nɔa lam’akandawatɛka dia kɛnɛ kakayange Nzambi ntsha.
Akahombe nshi efula dia sɛla wâto nɛ dia vɔ waki woke efula. Ekomelo ko, l’ɔkɔngɔ w’ɛnɔnyi efula, wâto akɔ akashile. Etena kakɔ Nzambi akatela Nɔa dia mbɔtshiya nyama lɔkɔ. Nzambi akate dia mbɔtshiya nyama hiende hiende, lo ndjela weoho ɛmɔtshi, omi la wadi, omi la wadi. Koko dia weoho ekina a nyama, Nzambi akatɛ Nɔa dia nde ndjiɔtshiya esambele esambele. Nto, Nzambi akatɛ Nɔa dia nde mbɔtshiya weoho wa tofudu tshɛ. Nɔa akatshe kɛnɛ tshɛ kakawotɛ Nzambi.
L’ɔkɔngɔ diko, Nɔa la nkumbo kande wakɔtɔ lo wâto a luudu. L’etena kɛsɔ mbakayodihaka Nzambi lokuke. Nɔa la nkumbo kande wakakongɛka paka kongɛ tsho l’etei. Ohokanyiya di’oko ndo wɛ mbaki lo wâto a luudu akɔ, akongɛ. Onde mɛtɛ, Mvula k’Elola kaki la dia ndɔ oko akate Nzambi?