ƆKƆNDƆ 15

Wadi a Lɔta akɛwɔ l’ɔkɔngɔ

LƆTA la nkumbo kande wakadjasɛka kâmɛ l’Abarahama lo kɛtɛ ya Kanana. Lushi lɔmɔtshi Abarahama akatɛ Lɔta ate: ‘Adiyo kema efula lo kɛtɛ nyɛ lo dikambo dia wa nyama yakiso. Lam’alangɛ, tokakitɔne. Naka wɛ ntshɔ lo lɛkɛ lɔnɛ, ko dimi ntshɔ lo lɛkɛ lokina.’

Lɔta akedia asho, akende kɛtɛ yakɔ. Nde akɛnyi ɛtshi ka dimɛna ka wodja kaki l’ashi ndo l’adiyo w’amɛna lo dikambo dia wa nyama yande. Aki lɛtshi la kɛtɛ la Jɔrɔdana. Omalɔkɔ, Lɔta akonula nkumbo kande la wa nyama otsha lɛkɔ. Ko l’ɔkɔngɔ diko, vɔ wakatodjasɛka l’osomba wa Sɔdɔmɔ.

Ase Sɔdɔmɔ waki anto wa kɔlɔ efula. Dikambo sɔ diakakiyanyaka Lɔta, nɛ dia nde aki onto ɔlɔlɔ. Ndo Nzambi akayakiyanyaka. L’ɔkɔngɔ diko, Nzambi akatome andjelo ahende dia têwola Lɔta ɔnɛ nde ayanga nanya Sɔdɔmɔ la Ngɔmɔrɔ ndo osomba wosukanyi latɔ, dikambo dia kɔlɔ yawɔ.

Andjelo wakatɛ Lɔta vɔate: ‘Sala esadi! Ɔsa wadiɛyɛ l’anayɛ ahende wa amato kele nyotombe oma lanɛ!’ Lɔta la nkumbo kande wâkatshimbatshimba ko andjelo ndjâkimɛ lo lonya ko vɔ mbâtondja l’andja w’osomba. Ko ondjelo ɔmɔtshi akate ate: ‘Nyutshu nyoyashimbele! Tanyɛwɔke l’ɔkɔngɔ. Nyulawɔ otsha l’akona di’aha nyu mvɔ.’

Lɔta l’anande wa amato wakakitanyiya ndo wakalawɔ oma la Sɔdɔmɔ. Vɔ komemala kânga yema ndo kɔmbɛwɔ l’ɔkɔngɔ. Koko wadi a Lɔta akɔnyɔla. L’ɔkɔngɔ wa vɔ mangana tshalola la Sɔdɔmɔ, nde akemala ndo akɛwɔ l’ɔkɔngɔ. Ko wadi a Lɔta akahilɔ ekundji ka lɛhɔ. Wɛ hawɛnyi l’osato?

Sho kokaka kondja wetshelo wa dimɛna oma lo dikambo sɔ. Diɔ diekɔ lo tɛnya dia Nzambi mbitshaka wanɛ wawokitanyiya, kele wanɛ wahokitanyiya wayoshisha nsɛnɔ yawɔ.

Etatelu 13:​5-13; 18:​20-33; 19:​1-29; Luka 17:​28-32; 2 Petero 2:​6-8.