ƆKƆNDƆ 22
Yɔsɛfu ambodjama lo lokanu
YƆSƐFU aki paka l’ɛnɔnyi 17 eto etena kakandatɔlama l’Edjibito. Wakatosondjaka lɛkɔ le pami kɛmɔtshi lokombo lande Pɔtifara. Pɔtifara akakambaka laka owandji wa l’Edjibito lakawelɛka Farawɔ.
Yɔsɛfu akakambɛka nkumɛnde le Pɔtifara l’ɔlɔlɔ tshɛ. Omalɔkɔ, lam’akole Yɔsɛfu, Pɔtifara akawosha ɔkɛndɛ wa luudu lande l’otondo. Ko lande na kele Yɔsɛfu lo lokanu lanɛ na? Toko dikambo dia wadi a Pɔtifara.
Yɔsɛfu akayala pami k’olangala efula lam’akandole, ko wadi a Pɔtifara akalangaka mbeyana lande. Koko Yɔsɛfu akeyaka di’ekɔ kɔlɔ, ko nde konangaka sala ɔsɔku. Wadi a Pɔtifara akomala hakoke. Omalɔkɔ, lam’akaye omɛnde nde akamamatanyiya Yɔsɛfu ata ate: ‘Yɔsɛfu ya kɔlɔ nyɛ akayangi mbeyana lami!’ Pɔtifara aketawɔ awui a wadiɛnde ko nde momala efula. Omalɔkɔ, nde akatowodja lo lokanu.
Kem’edja owandji wa lokanu akɛnyi dia Yɔsɛfu ekɔ onto ɔlɔlɔ. Ɔnkɔnɛ nde akawodje kapita k’ase lokanu akina tshɛ. L’ɔkɔngɔ a nshi mɔtshi, Farawɔ akoke kapita kande k’amangudi a wanu la kɛnɛ k’ekatshi wa mma kɛlɛ, ko nde akawadje lo lokanu. L’otsho ɔmɔtshi, vɔ wakɛnyi onto l’onto dɔ diaki la kitshimudi yadiɔ, koko vɔ kombeya tokitshimudi takɔ. La wedi a pindju Yɔsɛfu akawatɛ ate: ‘Nyosakwele alɔ anyu.’ Ko etena kakawasale ɔsɔku, Yɔsɛfu lakakimanyiyama oma le Nzambi, akâlembetshiya tokitshimudi t’alɔ awɔ.
Yɔsɛfu akatɛ kapita k’amangudi a wanu ate: ‘L’ɔkɔngɔ a nshi shato wɛ ayotomba oma lo lokanu, ko wɛ ayototetemala l’olimu ayɛ wa mangolɛka Farawɔ wanu.’ Ko Yɔsɛfu akakotsha ate: ‘Lam’ayotomba, kototele Farawɔ dikambo diami, ndo okimanyiya dia dimi tomba oma lo dihole nɛ.’ Koko Yɔsɛfu akatela kapita k’akatshi wa mma ate: ‘L’ɔkɔngɔ a nshi shato Farawɔ ayokohembola ɔtɛ.’
L’ɔkɔngɔ a nshi shato, awui wakasalema paka oko akate Yɔsɛfu. Farawɔ akahembola kapita k’akatshi wa mma ɔtɛ. Kapita k’amangudi a wanu akatombe oma lo lokanu ndo akatatɛ kambɛ owandji nto. Koko kapita k’amangudi a wanu akohɛ kɛnɛ k’endana la Yɔsɛfu! Nde kombitɛ Farawɔ awui w’endana lande, ko Yɔsɛfu akatshikala paka lo lokanu.