ƆKƆNDƆ 59
Lande na akahombe Davidi ndawɔ
L’ƆKƆNGƆ a Davidi ndjaka Ngɔliyatɛ, owandji w’alembe w’Isariyɛlɛ le Abinɛrɛ akawela le Saulo. Saulo akangɛnangɛna Davidi efula. Nde akawodje owandji ɔmɔtshi w’alembe ande ndo akawɔshi dia nde ndjodjasɛ lo luudu la nkumekanga.
L’ɔkɔngɔ diko, lam’akakalola alembe oma la tɔlɔ l’Ase Filistiya, amato wakayembaka vate: ‘Saulo akadiake kinunu kinunu, koko Davidi nunu dikumi dikumi.’ Dikambo sɔ diakotsha Saulo kandjema nɛ dia Davidi akôleke lokumu. Koko Jɔnata, ɔn’aki Saulo la pami, kondjala la kandjema. Nde akalangaka Davidi efula, ndo Davidi akôlangaka nde lawɔ. Ko vɔ ahende wakɔtɔ ɔngɛnyi wa pondjo pondjo.
Davidi akeyaka poma lɔngɔmbi efula, ndo Saulo akalangaka mishiki wakandahomaka. Koko lushi lɔmɔtshi, kandjema kaki Saulo akokumiya lo sala dikambo dimɔtshi dia mamba. Etena kakahomaka Davidi lɔngɔmbi, Saulo akɔshi dikɔnga diande ko nde mbôka ata ate: ‘Layomamanya Davidi l’ehele!’ Koko Davidi akasandjɔ ko dikɔnga komonda. L’ɔkɔngɔ, Saulo akahandja Davidi nto la dikɔnga. Omalɔkɔ, Davidi akayeyaka dia nde pombaka ndjâla la yewo efula.
Onde wɛ akôhɔ daka diakasha Saulo oka? Nde akasha daka dia mbisha onto layodiaka Ngɔliyatɛ ɔnande la omoto oko wadi. Saulo akayotɛka Davidi l’ɔkɔngɔ diko ɔnɛ: nde ayowosha Mikalɛ, ɔnande la omoto, koko ntondo Davidi akahombe ndjaka atunyi 100 w’Ase Filistiya. Kânga dakɔ sɔ! Saulo akalongamɛka dia Ase Filistiya wayodiaka Davidi. Koko vɔ kombodiaka, ɔnkɔnɛ Saulo akakimɔ ɔnande la omoto dia nde ndjâla wadiaki Davidi.
Lushi lɔmɔtshi Saulo akewoya Jɔnata l’ekambi ande tshɛ dia nde nangaka ndjaka Davidi. Koko Jɔnata akatɛ she ate: ‘Tosalɛke Davidi kɔlɔ. Nde atakosalɛka ndoko dui dia kɔlɔ. Kɛnɛ tshɛ kakandasale aki ohomba leyɛ. Nde akahande shisha lɔsɛnɔ lande lushi lakandadiake Ngɔliyatɛ, ndo lam’akayɛnyi dikambo diakɔ, wɛ akangɛnangɛna.’
Saulo akôke awui w’ɔnande ko nde akalake dia nde hatosalɛ Davidi kɔlɔ. Davidi akakalola ndo akatatɛ kambɛ Saulo lo luudu lande nto oko akandasalaka ntondo. Ko lushi lɔmɔtshi, lam’akahomaka Davidi mishiki, Saulo akawôke dikɔnga nto. Davidi akasandjɔ, ko dikɔnga tokama l’ehele. Ɔsɔ aki mbala ka sato! Davidi akeye kakianɛ dia nde akahombe ndawɔ.
Davidi akatshu lo luudu lande hita l’otsho. Ko Saulo akatome apami amɔtshi dia vɔ todiaka. Mikalɛ akeyaka lokanyi la she. Omalɔkɔ, nde akatɛ omende ate: ‘Naka wɛ halawe l’otsho ɔnɛ, kete lui wɛ ayonga odo.’ Ko l’otsho akɔ Mikalɛ akalawoya omende lo didishi. Ɛnɔnyi esambele w’etondo, Davidi akahombe talawɔlawɔka l’ahole l’ahole di’aha Saulo mboshola.