ETENYI 5

Oma lo lɔhɔmbɔ la Babilɔna polo ndo lo wokelo wa dihele dia Jerusalɛma nto

Ase Isariyɛlɛ wakahembama efula lo mbetawɔ lam’akiwɔ lo lɔhɔmbɔ la Babilɔna. Shadarakɛ, Meshakɛ la Abɛdɛ-Nengo wakakadjema lo khuka ka dja yalombalomba, koko Nzambi akâtondja oma lɔkɔ la lɔsɛnɔ. L’ɔkɔngɔ diko, lâsɔ ko Ase Mediya l’Ase Pɛrɛsiya wamboshila mbɔsa Babilɔna, Danyɛlɛ akakadjema lo difuku dia dimbwe, koko Nzambi akôshimbela ndo nde lawɔ lam’akandadihe enyɔ wa dimbwe.

L’ɔkɔngɔ diko, Kuro, nkumekanga ka Pɛrɛsiya, akayotshungolaka Ase Isariyɛlɛ. Vɔ wakakalola oya lo wodja awɔ ɛnɔnyi 70 kokele l’ɔkɔngɔ wa lam’akawandama oko fumbe otsha la Babilɔna. Dikambo dimɔtshi diakawasale ntondo kam’akawakalola la Jerusalɛma aki wokelo wa tɛmpɛlɔ ka Jehowa. Koko, atunyi awɔ wakemadia olimu awɔ. Ɔnkɔnɛ, akete oko yɛdikɔ y’ɛnɔnyi 22 l’ɔkɔngɔ wa vɔ kalola oya la Jerusalɛma mbakawayoshidiyaka tɛmpɛlɔ.

Malasɔ, tayɛna awui w’endana la Ɛzɛra lakaye la Jerusalɛma dia ndjɔlɛnga tɛmpɛlɔ. Nde akayoyaka lâsɔ ko wambotashidiyaka tɛmpɛlɔ ɛnɔnyi 47 w’etondo. Ko, ɛnɔnyi 13 l’ɔkɔngɔ w’oyelo waki Ɛzɛra, Nɛhɛmiya akayakimanyiyaka l’olimu wa wokelo wa dihele dia Jerusalɛma nto. Etenyi ka TANU kɛnɛ kɔndɔlaka awui wakasalema l’edja k’ɛnɔnyi 152.