ƆKƆNDƆ 94

Nde mbokaka ana w’akɛnda ngandji

HƐNYI Yeso lanɛ okime ɔna dikɛnda. Mɛtɛ, wɛ kokaka mbuta ɔnɛ Yeso mbokaka ana w’akɛnda ngandji. Apami wawenda ango wekɔ apɔstɔlɔ ande. Kakɔna kawatɛ Yeso na? Tênde dikambo diakɔ.

Yeso nde l’apɔstɔlɔ ande mala ndja oma lo lɔkɛndɔ l’otale. Lam’akiwɔ l’atei a mboka, apɔstɔlɔ wakayadjanaka tamu lam’asawɔ. Ɔnkɔnɛ, l’ɔkɔngɔ wa lɔkɛndɔ lawɔ, Yeso akawambola ate: ‘Kakɔna kambonyoyadjanaka tamu lo mboka na?’ Mɛtɛ, Yeso akeyaka dikambo diakawayadjanaka tamu. Koko nde akawambola dimbola sɔ dia mɛna kana apɔstɔlɔ wayowohonolɛ dikambo diakɔ.

Apɔstɔlɔ kokadimola, nɛ dia lam’akiwɔ lo mboka, vɔ wakayadjanyaka tamu lo dikambo di’ɔnɛ loleki woke l’atei awɔ. Apɔstɔlɔ amɔtshi wakalangaka ndeka akina weke. Woho akɔna akawatɛ Yeso ɔnɛ ekɔ kɔlɔ kombola dia ndjâla onto loleki woke na?

Nde akelɛ ɔna dikɛnda, ko akôkitsha la ntondo kawɔ vɔ tshɛ. Nde akatɛ ambeki ande ate: ‘Dimi nangaka nyu mpotɔ dikambo nɛ ɔnɛ: Naka nyu hanyokadimwe ko ndjâla oko tɔkɛndakɛnda, kete hanyɔtɔki pondjo lo diolelo diaki Nzambi. Ɔnɛ loleki woke lo diolelo ele ɔnɛ lele oko kiɛndakɛnda nyɛ.’ Onde wɛ mbeyaka lande na kakate Yeso ɔsɔku?

Eelo, ana w’akɛnda hawoyakiyanya dia ndeka akina weke. Ɔnkɔnɛ, apɔstɔlɔ wakahombe mbeka dia ndjâla oko ana w’akɛnda lo yoho shɔ koko aha lo salaka ewanu dia mbeya onto loleki woke.

Ndo lo tena dikina, Yeso akɛnya woho wakandokaka ana w’akɛnda ngandji. L’ɔkɔngɔ wa ngɔndɔ mɔtshi, anto amɔtshi wakela anawɔ oya le Yeso. Apɔstɔlɔ wakahembe mbatshanya. Koko Yeso akawatɛ ate: ‘Nyotshike ana w’akɛnda waye le mi, tanyâshimbake, nɛ dia diolelo diaki Nzambi diekɔ le anto wele oko vɔ.’ L’etena kakɔ, Yeso akɔshi ana w’akɛnda l’anya ande, ko akawatshɔkɔla. Onde ɔsɔ kema dikambo di’ekeketshelo dia mbeya ɔnɛ Yeso akokaka ana w’akɛnda ngandji?

Mateu 18:​1-4; 19:​13-15; Mako 9:​33-37; 10:​13-16.