ƆKƆNDƆ 95
Woho waketshaka Yeso
LUSHI lɔmɔtshi, Yeso akatɛ pami kɛmɔtshi dia nde pombaka mboka onyande ngandji. Pami kakɔ akambola Yeso ate: ‘Akɔna ele onyami na?’ Mɛtɛ, Yeso akeyaka kɛnɛ kakakanyiyaka pami kakɔ. Nde akakanaka ate paka anto wa lo dioho diande ato la wa l’ɔtɛmwɛlɔ ande mbele anyande. Koko tênde kɛnɛ kakawotɛ Yeso.
Mbala mɔtshi, Yeso aketshaka anto oma l’ekimanyielo k’ɔkɔndɔ ɔmɔtshi. Ɔsɔku mbakandasale l’etena kɛsɔ. Nde akakɔndɔla ɔkɔndɔ w’Ose Juda nde l’Ose Samariya. Tamboshilaka mbeka dia Ase Juda kombokanaka l’Ase Samariya. Ɔkɔndɔ wa Yeso v’ɔnɛ:
Lushi lɔmɔtshi, Ose Juda ɔmɔtshi akatatshɔka otsha la Jeriko lo mboka ka lo dikona. Ko nde akɔtɔ l’anya w’apɔtɔdi. Vɔ wakɔkɔsɔla falanga yande ko wakokule ludî la suke la nyɔi.
L’ɔkɔngɔ diko, ɔlɔmbɛdi ɔmɔtshi w’Ose Juda akayayaka lo mboka kakɔ. Nde akɛnyi pami kakɔ kakakɔmama ludî. Oko akanyiyɛ, kakɔna kakandasale na? Nde akɛtɔla lo wedi okina a mboka ko akakɔlamela la lɔkɛndɔ lande. Ko ondjashi Nzambi ɔmɔtshi akayayaka ndo nde lawɔ lo mboka kakɔ kâmɛ. Ose Lɛwi mbakinde. Onde nde akemala? Kema, ndo nde lawɔ komemala dia kimanyiya pami kakawakule ludî. Hɛnyi ɔlɔmbɛdi nde l’Ose Lɛwi waya tshalola watakɔlamela lɔkɛndɔ lawɔ.
Ko ohênda pami kele kâmɛ l’ɔnɛ lakawakule ludî. Ose Samariya mbende. Nde ekɔ lo kimanyiya Ose Juda. Nde ekɔ lo mbôdja ekanga ɛmɔtshi lo mpota ndo ekɔ lo mbɔ̂mba mpota yakɔ. Ko l’ɔkɔngɔ, nde akɔshi Ose Juda akɔtɔlɛ lo dihole diakandakoke tomuya ndo tokalangana.
L’ɔkɔngɔ wa nde shidiya ɔkɔndɔ ande, Yeso akatɛ pami kakawoke dimbola ate: ‘L’atei w’anto asɔ asato, akɔna akanyiyɛ akayala ɔngɛnyi waki onto lakɔtɔ l’anya w’apɔtɔdi? Onde ɔlɔmbɛdi, Ose Lɛwi kana Ose Samariya?’
Pami kakɔ akakadimola ate: ‘Ose Samariya. Nde mbakôsalɛ ɔlɔlɔ.’
Yeso akawotɛ ate: ‘Kam’otshiyɛ asɔ mbediɔ. Ɔnkɔnɛ, tshɔka tosale anto akina popo.’
Onde wɛ hangɛnangɛna woho waketshaka Yeso? Sho kokaka kondja wetshelo efula w’ohomba naka tayohokamɛka kɛnɛ kata Yeso l’atei a Bible, shi mɛtɛ?