ƆKƆNDƆ 115

Paradiso k’oyoyo la kɛtɛ

OHÊNDA etamba a weke engo, alɛmbɔlɛmbɔ w’amɛna ango ndo akona w’etale. Shi lanɛ ekɔ dihole dia dimɛna efula? Ohênda ɔna kawe ongo alɛ lo lonya l’ɔna dikɛnda. Ohênda ndo dimbwe dingo kâmɛ la falasa yetami l’adiyo. Onde wɛ hangɛnangɛna mbidjasɛ lo luudu lɔmɔtshi lele lo dihole dimɔtshi dia nganɛ oka?

Nzambi nangaka dia wɛ sɛna pondjo pondjo la kɛtɛ, lo paradiso. Ndo nde halange wɛ tata hemɔ ndo monga l’asui wadiɛnɛ anto ɛlɔ kɛnɛ. Bible ndakaka anto tshɛ wayodjasɛ lo paradiso k’oyoyo ɔnɛ: ‘Nzambi ayoyala kâmɛ lawɔ. Nyɔi hatoyala nto, koyanga ndjawi koyanga asui. Akambo wa ntondo wamboshila.’

Yeso ayosala otshikitanelo ɔsɔ wa diambo. Onde wɛ mbeyaka etena kakɔ? Eelo, toko l’ɔkɔngɔ wa nde mbɛdia kɛtɛ oma l’akambo wa kɔlɔ tshɛ la minya anto wa kɔlɔ. Ohɔ dia l’etena kaki Yeso lanɛ la kɛtɛ, nde akakɔnɔlaka anto waki la weoho a hemɔ tshɛ, ndo akôlola kânga anto oma l’edo. Yeso akasalaka akambo asɔ dia mɛnya kɛnɛ kayondohomba sala lo kɛtɛ k’otondo lam’ayondoyala Nkumekanga ka lo diolelo diaki Nzambi.

Ohokanyiya ɔngɛnɔngɛnɔ wayoyala lo paradiso k’oyoyo ka la kɛtɛ! Yeso kâmɛ la wanɛ wakandasɔnɔla wayolɛ l’olongo. Emboledi ɛsɔ wayokokɛ anto tshɛ wa la kɛtɛ dia vɔ ndjâla l’ɔngɛnɔngɛnɔ. Tênde kɛnɛ kahombaso sala dia shikikɛ ɔnɛ Nzambi ayotosha lɔsɛnɔ la pondjo lo paradiso kande k’oyoyo.

Enyelo 21:​3, 4; 5:​9, 10; 14:​1-3.