Diulelu ne diayela Paradisu
Lam’akinde la kete, Jesus aketsha ambeki ande dia vo nomba okone dia Diulelu dia Nzambi: “Diulelu diaye diaye! Lulangu laye latshame la kete uku atshamalo l’ulungu”. (Matthieu 6:9, 10) Ntu, nde kupeko mvuta dia “lukumu l’ololo la diulelu”. (Matthieu 4:23) Nde akanyumuta ntu dia Diulelu, ndeka dia awui akina ane tshe. Dikambukuna? Nedia Diulelu mbele etshina ka dikambu kayutsha Nzambi dia nde nshidiya ekakatanu tshe wambete lumu pika elo kene. La Diulelu, Nzambi ayukumiya ata, ndjala, hemo, dakatanelu, ku ayela dukanelu ndu kî.
We kumbulaka mbidjase lu andja wa wuhu oso? Naka elu, kawo we mbala biukubuku nye. We ayumana nfundu wate Diulelu mbele luwandji, kuku luwandji lako ndeka ewandji tshe walombola antu. We ayushihudia yema yema wuhu walembitshiya Nzambi adjangu wendana la Diulelu diande utsha le ekambi ande. Ntu, we ayushula diese diukuki kusha Diulelu uma kakiane.
Uma laso, mbayuyukuka ndjaete otoi omotshi wa lu Diulelu. Ntundu ka we mbeya nsonola, eko uhumba dia mbeka efula. Diako mbakenyasu dia we mbala biukubuku nye. Kene tshe kayuketsha biukubuku nye dia Diulelu eko paka awui w’uma lu Bible.
Kawo ndjambula bunde kesu la uhumba wa Diulelu dia Nzambi.
Uma k’etatelu k’okondo w’etungelu k’untu, Nzambi akatunge pami ka kukele (parfait) ku nde akûkitsha lu paradisu. Lu nshi sho, nde takiko la uhumba wa Diulelu.
Eya wate, Adam la Eve, ambutshi asu w’etatelu, waketawo awui wa Satana, undjelu wa kolo. Nde akâkese lu mbate kashi ku vo wakatombokwe Nzambi. Diako mbakiwo la dia mvo, nedia “difutu di’akambu wa kolo diele nyoi”. — Romains 6:23.
Untu la kema kukele (imparfait) ndu utshe wa kolo hakuke mbuta ona la kukele (parfait). Diako mbele ana tshe w’uma le Adam ndu Eve mbutoka aha la kukele, weko atshe wa kolo ndu vo mvoka. — Romains 5:12.
Uma kaso, mbakahumbe antu Diulelu dia Nzambi dia dio mbakimanyia dia vo ntumba uma lu pekatu ka nyoi. Diulelu kayusha lukumu le Nzambi dia kashi nye yakahandjula Satana dia lukumbu lande.
Jehovah Nzambi akalake “kanula” (posterite) ya shikâ yayuto dia ndjutshungula antu uma lu pekatu. (Genese 3:15) Kanula yako nye mbayuyala Khumekanga (Roi) lu Diulelu dia Nzambi.
Kanula yakona yatawo?
Ndeka mvula 2.000 yakete l’okongo wa munga kakatshe Adam, akiko untu laki la mbetawo k’efula lukumbu lande Abraham. Jehovah akate Abraham dia ntshika usumba (ville) wakanduto ndu ntsho dia tudjase lu mvudu y’apema la Palestine.
Abraham akatshe kene tshe kakawute Jehovah, ndu aketawo ntu ntsha dikambu diuleki so wuke. Jehovah akawute dia nde mbulambula on’ande Isaac lu ediakelu (autel).
Lu mvuta mete, Jehovah kunangaka dia vo mbulambula ulambu wa mbudiake untu. Kuku nde akalange mbeya wuhu akona wakûlangaka Abraham. Abraham akalange dia ndjaka Isaac kuku Jehovah akûseke.
Lu menda mbetawo ka wuke k’Abraham, Jehovah akûlake dia mbisha wudja wa Palestine le tukanula tande; ndu akûlake ntu ate tukanula ta daka tayutumba uma le nde ndu uma le on’ande Isaac. — Genese 22:17, 18; 26:4, 5.
Isaac akute ana a wasa ahende w’apami, Esaü la Jacob. Jehovah akashikike dia kanula ya daka yayutumba uma le Jacob. — Genese 28:13-15.
Jehovah akole Jacob lukumbu lukina letawo Israël, nde kakute ana 12 ndu ana ako wakute ana akina ntu. Wuhu oso mbakafulane tukanula t’Abraham. — Genese 46:8-27.
Lam’akayala ndjala ka wulu lu wudja, Jacob la khumbu kande wakatshu utsha l’Egypte lene akawaete Pharaon, uwandji a wuke wa l’Egypte. — Genese 45:16-20.
L’Egypte kakawateyaka dia kanula ya daka yayutumba uma lu diuhu dia Juda, on’aki Jacob. — Genese 49:10.
L’okongo wa nyoi ka Jacob, an’ande wakutana efula ku wakayala wudja wa wuke. Uma lu dikambu so ase Egypte wakuke woma ku wakawadje lu lohombo dia mbasuya. — Exode 1:7-14.
L’okongodiku, Jehovah akatume Moïse, pami k’etete ndu ka kolamelu, dia nde mvute uwandji pharaon ka l’etena keso dia nde mbetawo nkimo ase Israël. — Exode 6:10, 11.
Lam’akatune Pharaon awui aso, Jehovah akatume asui dikumi le ase Egypte. Sui di’ekumelu ele, nde akatume undjelu wa nyoi dia ndjudiaka ana wa nundu tshe wa l’Egypte. — Exode chapitres 7 à 12.
Nzambi akate ase Israël dia ndjaka (mpembula kingu) ka on’okoko dia nde la ma diawo dia dikolo ku vo nkita dikila di’okoko l’eshingiti wa kuke yawo, ku undjelu wa Nzambi akafumbo l’adiku dia mvudu yawo. Osoku mbakake ana wa nundu w’ase Israël. — Exode 12:1-35.
L’ekumelu, Pharaon akadjanga dia ase Israël mune uma lu wudja ande. Kem’edja ntu, nde akayatshumuya ku akawatapanye dia mbâkaluya ntu la wulu uya l’Egypte.
Jehovah akadihula mbuka ka ntenyanya ashi wa Bela (mer Rouge) dia nde mbitsha ase Israël. Lam’akoto Pharaon la asalayi ande l’atei w’ashi, vo tshe wakadinde l’ashi wakavu. — Exode 15:5-21.
Jehovah akalombola ase Israël lu use wa shenga utsha lu dikuna dietawo Sinaï. Leko, kakandatuwasha elembe ande. Utuwulama elembe ako, tshiki ase Israël wutuyala khumbu ka luwandji (royaume de pretres) ndu wudja w’usantu (nation sainte). L’edjedja unya, ase Israël wakayuyala la diasu dia nkundja dihule dia wuke lu Diulelu dia Nzambi. — Exode 19:6; 24:3-8.
Lam’akashidiya ase Israël mbidjase uku mvula utundu lu dikuna dia Sinaï, Jehovah akâlombola utsha la Palestine, wudja wakandalake tshewo Abraham.
Lu wudja wa Palestine, Nzambi aketawo dia ase Israël nombwama uma le ewandji (rois). Lu nshi sho, vo waki la diulelu (royaume) la kete.
Khumekanga ka hende k’ase Israël aki David, otoi omotshi w’uma lu diuhu dia Juda. David akalembia atunyi tshe w’ase Israël, ku akete Jerusalem usumba (capitale) wa wuke wa lu wudja.
Akambu a weke wakayala l’etena kakule David menyaka ate naka Jehovah ambosonola khumekanga, nduku uwandji w’untu wukuki mbolembia.
Uku awui wakate Jehovah, Kanula ya daka ayutumba uma le David. — 1 Chroniques 17:7, 11, 14.
Salomon, ona David, akukite lu diulelu. Nde aki khumekanga ka yimba, ku ase Israël wakakundje etshoko efula lu diulelu diande.
Lu wedi ukina, Salomon kakahike tepelo ka yak’ende kaki Jehovah la Jerusalem. Engenongeno wakayala lu wudja w’Israël lu diulelu dia Salomon menyaka djembetelu y’etshoko wayela Nzambi le antu lu nshi yayaye. — 1 Rois 4:24, 25.
Eya wate, efula ka wa khumekanga nye yakayukamba l’okongo wa Salomon kundjala la kolamelu.
Lam’akuleka diuhu dia David la Jerusalem, Jehovah akatume prophete Esaïe dia mbewuya di’eyelu k’ona David layuyala la lusembwe ndu layukuka mbule kete k’utundu tshe. Nde ako kele Kanula ya daka. — Esaïe 9:6, 7.
Prophete Esaïe akenya dia diulelu diande diayuhama wuke efula ndeka ne dia Salomon.
— Esaïe chapitres 11 ndu 65.
Uma kaso, ekambi wa Nzambi wakayambulaka efula dia mbeya akona ayuyala Kanula sho.
Ntundu k’eyelu ka Kanula sho, khumekanga y’Israël yakaleke ndjala kolo, ku Jehovah akakimo lu lohombo le ase Babylone l’ononyi wa 607 ntundu k’etena kesu kene. Efula k’antu wa lu wudja awo kakatolama lu lohombo le ase Babylone. Kuku Nzambi kumbuhe daka diande. Kanula yakahumbe ntumba paka uma lu diuhu dia David. — Ezechiel 21:25-27.
Okondo wa wudja w’Israel menyaka ate naka khumekanga k’untu kukaka mbisha waese, waese ako weko paka etinyi ketu. Nedia antu wa lusembwe mvoka ku akitanyi awo hawutshikala tena tshe to. Engo kakona kaki la antu uhumba mete? Waki l’uhumba wa Kanula ya daka.
L’ekumelu, l’okongo wa nungame mvula nunu la nunu, ku Kanula akayuya. Nde akona aki Kanula yako?
Le ona umuntu la use Israël letawo Marie kakasha undjelu wa Nzambi ekadimwelu ka umbula one. Nde akawute ate we ayuta ona ndu lukumbu lande layuyala Jesus. Lane ele awui wakate undjelu:
“Nde ayuyala wuke, wayuweta vate Ona-Khum’Ulungu (Fils du Tres-Haut); ku Jehovah Nzambi ayuwusha diulelu diaki David, she, ku nde ayule.” — Luc 1:32, 33.
Eko mete! Jesus kaki Kanula ya daka ndu, pundju la pundju, nde kayuyala Khumekanga ka lu Diulelu dia Nzambi. Bunde kakatshikitana Jesus la antu w’ololo wakiko la kete ntundu kande na?
Nedia Jesus akuto uma lu dihindu di’uma le Nzambi. Nyangu aki ona umuntu laki kumbeyana ntundu la pami, okone nde taki la she k’uma l’atei w’antu. Edjedja, Jesus akadjaseka l’ulungu. Uma leko, ku nyuma ka Nzambi (esprit saint de Dieu), wulu wakinde, akakadimula Jesus dia nde mbuto uma lu dikundju diaki Marie. Jesus kumbuto la sangu dia pekatu k’Adam ndu lu nshi ya lumu lande tshe nde kutsha pekatu. — 1 Pierre 2:22.
Lam’akinde la mvula 30, Jesus akalungula batiza.
Nde akateketa dia Diulelu dia Nzambi ndu akayaenya l’ekumelu uku Khumekanga ka Diulelu diako. — Matthieu 4:23; 21:4-11.
Jesus ntu akatshe akambu efula wa mamba.
Nde akakonola akanga wa hemo. — Matthieu 9:35.
Nde akalesha ma diakandahindula le wane tshe waki la ndjala. — Matthieu 14:14-22.
Ntu nde akûlula antu wakavu. — Jean 11:38-44.
Akambu wa mamba aso tshe menyaka ate Jesus ayunyumela antu etshoko efula ntu lam’ayunduyala Khumekanga ka lu Diulelu dia Nzambi.
Nyu mbuhoka kene kakatshe David dia nde mbete Jerusalem ayale usumba wa diulelu diande. Jesus akalembetshiya ate Diulelu dia Nzambi hadiuyala la kete, kuku diayuyala l’ulungu. (Jean 18:36) Diako mbetasu Diulelu “Jerusalem ya l’ulungu”. — Hebreux 12:22, 28.
Jesus akenya elembe ene wahumba nkitanyia wane walanga mboto lu Diulelu diako. Elembe ako weko lu Bible. Elembe wuleki wake vo ene: Diele laye nanga Nzambi ndu nanga unyaye untu. — Matthieu 22:37-39.
Jesus akate ate nde hule ndame utu. Antu amotshi wayosonama dia ntsho l’ulungu dia tule la nde kame. (Luc 12:32; Jean 14:3) Efula kawo to na? Revelation 14:1 kadimulaka umbula oso ate 144.000.
Naka eko paka antu 144.000 atu mbayutsho l’ulungu dia tule kame la Jesus, ku antu akina ane elungamelu kakona kele la wo na?
Bible mvutaka ate: “Antu w’ololo wayukita kete, ndu wayudjase loko pundju.” — Psaumes 37:29.
Wane wayudjase la kete pundju vo mbetawo “ekoko ekina”. — Jean 10:16.
Dungamelu pende mbeko. Jehovah Nzambi akasonola antu 144.000 dia vo ntsho l’ulungu dia tule kame la Jesus-Christ. Ku nunu la nunu dikina di’antu ne dieko l’elungamelu ka mbidjase pundju la kete uku antu wa lu Diulelu diande. — Revelation 5:10.
Satana akahetsha Jesus ndu akayaete utunyi ande. Lam’akashidiya Jesus nsambisha mvula shatu l’etenyi, Satana akawundamia pulu ndu mbudiaka: Jesus wakuhane l’usungu ndu wakokola aseti. Bunde kaketawo Nzambi dia vo mbudiaka osoku la ukunda?
Jesus
Eya wate shu teko tukanula takuto uma le Adam, ndu uma lu dikambu diako, shu mungaka ndu diako mbavosu. — Romains 6:23.
Uho ntu wate lu wuhu wakanduto uma lu dihindu di’uma le Nzambi, Jesus aki tshe kukele (parfait) ndu nde kukuka dia mvo. Kuku, Nzambi aketawo dia Satana ‘numata Jesus lu tshindji’ dia mbudiaka. Diako mbakawulula Nzambi uku esprit wahayuvo. Nedia Jesus eko nshi tshe la lumu l’untu la to, nde akakuke nsala la lo ulemu dia nde tutshungula uma lu kolo. — Genese 3:15; Romains 5:12, 21; Matthieu 20:28.
Dia mana nfundu ndu nembete ndjakimo ka Jesus, Bible tetshaka l’ekimanyelu k’esatu w’alaka wa Nzambi (images prophetiques).
We mbuhoka wate Jehovah akahembe ngandji k’Abraham lam’akandawute dia nde mbudiake on’ande?
Ungu aki usatu w’alaka a Nzambi, dia nyoi kakayuyakimo Jesus. Dikambu so menyaka ngandji ka mamba ka Jehovah le antu wa lu andja w’utundu. Diako, mbakandetawo on’ande tuvwe, dia shu kuka nkundja lumu. — Jean 3:16.
Nyu mbuhoka wuhu wakatshungula Jehovah ase Israël uma l’Egypte ndu akatsha an’awo wa nundu lam’akete undjelu a nyoi l’ete a mvudu yawo? — Exode 12:12, 13.
Aki ntu usatu w’alaka a Nzambi. Uku dikila di’ona okoko akalembetshiyaka lumu le ana wa nundu w’ase Israël, wuhu ako mbele dikila dia Jesus nembetshiyaka lumu le antu wele tô wawetawo. Uku aki akambu wakete l’utshu ako akasha etshungwelu le ase Israël, mbele ntu nyoi ka Jesus tshungulaka andja w’utundu uma lu pekatu ndu uma lu nyoi.
Dia dikambu so Jesus mbelameka “On’okoko a Nzambi latunyaka pekatu y’antu.” — Jean 1:29.
Lam’akinde la kete nye, Jesus akatshumanya ambeki ande ndu akawaetsha dia vo mbeya nsambisha lukumu l’ololo la Diulelu, osoku mbakandatshe ntu l’okongo a nyoi kande. — Matthieu 10:5; Luc 10:1.
Ambeki ande mbaki antu wa ntundu wakasonama uma le Nzambi dia vo tule kame la Christ lu Diulelu diande. — Luc 12:32.
We mbuhoka dia daka diakasha Nzambi le ase Juda. “Utuwulama olembe ande, vo wutuyala diuhu di’elohe w’uwandji (royaume de pretres)”. Laso, kutuwukundja diasu dia mboto lu Diulelu dia Nzambi ndu mbukambe uku wa pretres l’ulungu, utunduyala vo waketawo awui wa Jesus. Kuku efula l’atei awo wakatune awui ande, vo kûmbetawo.
Uma k’etena keso, ase Juda wakashisha diese dia mbelame diuhu diakasonwama uma le Nzambi. Elo kene Palestine kema ntu Kete ka daka. — Matthieu 21:43; 23:37, 38.
Tate uma lu nshi sho yaki Jesus pulu ndu elo kene, Jehovah akatate ntshumanya wane wayule la Jesus kame l’ulungu. Atoi amotshi wa nunu diakiwo weko la su la kete. Vo mbelesu atoi w’atshikadi, akitami w’eso (le reste oint). — Revelation 12:17.
We ambulembete kakiane kene ketawo Diulelu dia Nzambi. Eko luwandji l’uma l’ulungu lele la Khumekanga Jesus Christ, ndu lo leko la elohe 144.000 w’antu w’uma lu kete wayule la nde. Luwandji lande layaheme antu w’ololo ndu nde kele la dia nkaluya ntu kî la kete nye.
Uma l’okongo a nyoi kande, Jesus akulwama uma lu nyoi kako ku nde akade utsha l’ulungu. Leko nde akatukunga dia Nzambi awushikike etena kayundukuka ntate la mbule uku Khumekanga ka lu Diulelu dia Nzambi. (Psaumes 110:1) Etena kakona kakahumbe dikambu so ndjala?
Jehovah akenyaka alo tena dimotshi le antu, dia mbashihudia awui amotshi wendana la Diulelu diande.
Lu nshi ya Daniel, Jehovah akenya do dia wuhu oso le Nebucadnezzar, khumekanga k’ase Babylone. Lu do diako ne nde akenyi wema utamba a wuke. — Daniel 4:10-37.
Utamba akanyukwama ku ehekele kato kakakelekama mvula esambele.
Utamba mbaki uku Nebucadnezzar. Uku akakelekama ehekele mvula esambele, wuhu ako mbele Nebucadnezzar akashisha yimba mvula esambele y’etundu. L’okongodiku ku Nebucadnezzar akayukundja yimba.
Akambu aso tshe waki usatu w’alaka a Nzambi (image prophetique). Nebucadnezzar akenyaka luwandji l’andja w’utundu laki Jehovah. Uma l’etatelu, lo laki le tukanula ta khumekanga David la Jerusalem. Lam’akalembia ase Babylone ase Jerusalem lu 607 ntundu k’etena kesu kene, luwandji la khumekanga keso lakashile. Takahumbe ntu ndjala khumekanga kekina k’uma lu tukanula ta David “edja ndu lam’ayuya one lele la luwandji la mete.” (Ezechiel 21:27) Nde kaki Jesus-Christ.
Enonyi engana wakete lasa 607 ntundu k’etena kesu kene (av.n.e.) pulu ndu l’etena kakahumbe Jesus mbule? Mvula esambele y’alaka a Nzambi (sept annees prophetiques), kana mvuta ate mvula 2.520 (Revelation 12:6, 14). Mvula nye 2.520 tateka uma lu 607 ntundu k’etena kesu kene ndu kumeka l’ononyi one wa 1914.
Jesus akatate mbule l’ulungu l’ononyi wa 1914. Dikambu so atenyadio na? Bible tewuyakadio uma l’enyelo kakenyi apôtre Jean.
Jean akenyi umuntu udjashi l’ulungu ndako kakute ona pami. — Revelation 12:1-12.
Umuntu kedikedi etshumanelu ka l’ulungu kaki Nzambi, etshumanelu kako keko l’ekambi waki Nzambi wa l’ulungu wetawo andjelu. Ona pami kedikedi Diulelu dia Nzambi. Diulelu diako so diakuto l’ononyi wa 1914.
Kakona kakatumbe l’okongodiku? Ulemu a ntundu wakatshe Jesus uku Khumekanga ele mbitshanya uma l’ulungu Satana la andjelu wane wakatomboko la nde kame. Jesus akawatshanya uma l’ulungu uya la kete. — Revelation 12:9.
Bible kondolaka awui ako ate: “Ulungu le, ongenengene, ndu wane wudjashi loko! Fono kayuyala la kete ndu l’ashi a wuke, nedia Diabulu ambuya uya le nyu, udane la kele ka mamba, lam’eyande ate nshi yande yambusukana.” — Revelation 12:12.
Lawo kele, lam’akatate Jesus mbule l’ulungu, atunyi ande wakatate nkamba ulemu wulu la kete. Uku akadite Bible ntundu, Jesus akatate mbule l’atei w’atunyi ande. — Psaumes 110:1, 2.
Wehu akona wa pa la ekakatanu wayuyala l’andja w’utundu na?
Jesus akasha ekadimwelu kene ate: ata, ndjala, hemo, adidimu wa kete. — Matthieu 24:7, 8; Luc 21:10, 11.
Tate uma k’ononyi wa 1914, teko la shoko la pâ dia asui aso. Oso kele djembetelu yatenya ate luwandji la Diulelu lakatate l’ononyi ako ungu.
Ntu, ‘Fono k’ase wedja kayuyala la kete. Vo wayukanana nedia luhelu l’ashi a wuke la asuku. Antu wayuka yimba-tshimba nedia woma la elungamelu k’akambu wayaye la kete, nedia diango dia wulu dia l’ulungu diayusutshasutshama.’ Luc 21:25, 26) Unde tatenyi akambu aso tate uma l’ononyi wa 1914?
Apôtre Paul akayukutshanya ntu ate “antu wayuyalanga, wayulanga ukundji, wayosema, wayutakula, wayotengana, wayutuna awui w’ambutshi, hawukana lusaka, waha ololo. Vo wayuyala waha la ngandji ka mete, akanga w’ududu, amamanyishi, wahayakime, akanga w’usehe, atunyi w’akambu w’ololo. Vo wayuyala afungi, akanga a puke, akanga a ndjambiya, anangi wa engenongeno lu dihule dia vo nanga Nzambi. Vo wayuyala l’efanelu ka ololo a Nzambi, kele wayutuna wulu ande. Umo l’atei w’antu aso”. — 2 Timothee 3:1-5.
We ambulembete bunde kele lumu lambuleka pika efula nshi nye? Satana ataheko ulemu ande wa ntsha kolo. Kuku Diulelu dieko ntu lu ntsha ulemu adio.
Kem’edja lam’akakuke ononyi wa 1914, atshikadi wa wane wele la elungamelu ka tule l’ulungu kame la Jesus, wakatate mbewuya lukumu l’ololo la Diulelu diambuyala. Ulemu ako wambuhandjo lu kete k’utundu, uku akatatshi Jesus. — Matthieu 24:14.
Bunde kele esambishelu keso keko lu ntshama?
Ka ntundu, dia antu weke dia nembete Diulelu dia Nzambi.
Ka hende, dikambu so mbakimanyiaka dia vo nsonola dia ndjala antu wa lu Diulelu diako.
Jesus akate di’etena kesu kene ate antu wayukahanyema lu beke pende: letshi lomotshi “ekoko”, ndu lukina “mbudi”. — Matthieu 25:31-46.
“Ekoko” weko la ngandji le nde ndu utsha le anangewo. “Mbudi” kema la ngandji.
“Ekoko” wayukundja lumu la pundju lako lele wa “mbudi” hawulukundja.
Ulemu ako w’ekahanyelu k’ekoko la mbudi weko lu ntshama kakiane lu esambishelu ka lukumu l’ololo la Diulelu.
Lane ele otoi omotshi w’esakwelu ka alaka a Nzambi wakate Esaïe:
“Lu nshi yayaye, lu etena k’ekumelu, ukungu wa ludu la Jehovah ayushikikala ladiku di’ekungu, vo wayediama ladiku dia akuna; ku wedja tshe wayokelaka utsha leko.” — Esaïe 2:2.
Andja weko elo kene lu “etena k’ekumelu”.
“Ludu” la otemwelo waki Jehovah “lambediama” ladiku dia etemwelo wa kashi.
“Ku wedja efula wayuneka wayutaka vate: ‘Nyuye tude lu ukungu wa Jehovah, utsha la ludu la Nzambi ka Jacob; nde ayutetsha akambu ande, ku shu tayokendakenda lu mbuka yande.’ ” — Esaïe 2:3.
Diako mbenasu, antu w’uma lu wedja tshe waya dia ndjotemola Jehovah ndu weko lu mbele ntu wanyawo dia ndjotemola la wo kame. Vo mbekaka dia ntsha lulangu la Jehovah.
“Vo wayutshula tombo tawo kungu, la akonga awo tukuwa ta loho. Wudja omotshi hawembe wudja ukina tombo, nduku untu layeka akambu wa ta ntu.” — Esaïe 2:4.
Atemodi wa Jehovah vo wambutshumana kame ului otoi ndu wambudjase la kı ka mamba l’asawo.
Wulu wa Diulelu dia Nzambi ambushila nkundja kakiane suke la millions shatu y’antu dia mbaule.
Vo tshumanaka ului otoi la atshikadi a wane wele la elungamelu ka ntsho l’ulungu dia tule kame la Christ.
Etshumanelu kaki Nzambi mbâshaka ma dia lu nyuma. — Matthieu 24:45-47.
Vo wambutunga khumbu k’anangu wa lu andja w’utundu wele la ngandji ka mete l’asawo. — Jean 13:35.
Vo weko la kî ka lu nyuma ndu weko la elungamelu. — Philippiens 4:7.
Kem’edja lukumu l’ololo lambusambishama ndu “ekoko” wambutshumanyema. Diulelu ayudiutsha ntu na?
Uhoke wate: khumekanga David akalembia atunyi tshe wa wudja a Nzambi. Osoku mbayutsha Khumekanga Jesus ntu.
Aya edja, khumekanga Nebucadnezzar akenyi do di’usatu a wuke waki enyelo ka waulelu tshe wa l’andja, uma lu nshi yakinde pulu ndu lu nshi y’elo.
Nde akenyi dive diakahano uma lu dikuna ku diakahandjula usatu tshe voa. Dive so menyaka Diulelu dia Nzambi.
Keso tshe nembetshiyaka ehandjwelu ka andja one wa kolo. — Daniel 2:44.
Atoi amotshi wa danyelu diayela Diulelu dio ne:
Otemwelo wa kashi wayushisho, uku dive di’ohelo dia wuke diutambiyishawo lu ndjale. — Revelation 18:21.
Diako mbele wane tshe walanga Nzambi wambukeketshama dia vo ntumba KAKIANE uma l’otemwelo wa kashi. — Revelation 18:4.
L’okongodiku Khumekanga Jesus ‘ayokomola wedja, ndu ayuwaule la ukalemba a luwulu.’ — Revelation 19:15.
Lawo kele, wa Temoins de Jehovah hawoto lu politique, kuyanga mbele vo futaka elambu wa l’etat ndu kitanyiaka elembe wa lu wudja awo.
L’ekumelu, Satana ndame, “ului a wuke w’edjedja” (grand dragon) ayukadjema lu difuku diaha la ekumelu. — Revelation 20:2, 3.
Paka “ekoko” etu, kana mvuta ate wane tshe wakitanyia Khumekanga Jesus, mbayuka lu ta dia elanyelu kayaye. — Matthieu 25:31-34, 41, 46.
Apôtre Jean akenyi enyelo “k’ekoko” wakake lu ta dia kundu-ku.
“Dimi lakende ku lakenyi ului a wuke w’antu waheyama mbala, uma lu wedja tshe, ndu uma lu wauhu tshe ndu uma lu weuhu w’antu tshe, ndu w’eteketa tshe, wemadi la ntundu ka kosa ka diulelu ka Ona-Okoko, wolotshi ahondo a wema, la wanga w’atuku l’anya awo”. — Revelation 7:9.
“Ului a wuke” (grande foule) eko etshumanelu ka wane tshe wetawo esambishelu ka lukumu l’ololo.
Vo mbele “wane wambuya uma lu pâ ka wulu” (grande tribulation). — Revelation 7:14.
“Wanga” (les palmes) menyaka dia vo wambetawo Jesus uku Khumekanga kawo.
Vo mbolotshi “ahondo a wema” (robes blanches) nembetshiyaka ate vo weko la mbetawo lu ulambu wakayakimo Jesus lu nyoi dia mbâshimbela.
“Ona-Okoko”, (l‘Agneau) ele Jesus Christ ndame.
Etshoko akona wewo la wo na? Uho okone waki ase Israël l’ongenongeno lu diulelu dia khumekanga Salomon. Oso aki enyelo ka tshitshe ketu kalembetshiya etshoko ene wakunge antu w’ololo lu diulelu diaki Jesus diayaye.
Kî ka shikâ kayuyala lasa antu l’antu ndu lasa antu la wa nyama, uku akadishikike Esaïe lu alaka a Nzambi. — Psaumes 46:9; Esaïe 11:6-9.
Jesus nde, uku akandakonolaka ase hemo lu nshi yakinde la kete, wuhu ako ntu mbayundunya hemo uma l’atei w’antu. — Esaïe 33:24.
Uku akandaleshaka elui w’antu, wuhu ako ntu mbayundunya ndjala uma lu andja w’utundu. — Psaumes 72:16.
Wuhu akandulula antu efula uma lu nyoi, mbayundulula ntu wane tshe wakavu waki kumbuka lukumu la Diulelu dia Nzambi. — Jean 5:28, 29.
Yema yema, ku nde ayukaluya andja w’utundu wusembwe tshe lu tshe uku akiko l’etatelu ntundu ka Adam atange.
Unde ongenongeno wayaye le, aha osoku? We kumbulaka mena ongenongeno ako? Naka we nangaka, yakimo la tshina dia Diulelu dia Nzambi ndu etawo dia ndjaete “okoko” (une brebis).
Eka Bible ndu mana nfundu etawo Jehovah ndu Jesus Christ. — Jean 17:3.
Kawo dia mbekesane la wane tshe wayakimo le Diulelu dia Nzambi. — Hebreux 10:25.
Eka dia mbeya elembe wa Diulelu ndu mbâkitanyia. — Esaïe 2:3, 4.
Kimo lumu laye tshe lu ulemu wa Jehovah ndu uyange dia nungula batiza. — Matthieu 28:19, 20.
Tuna dia ntsha kolo uku: wuvi, lukesu, luseka, wudjoki a wanu, akambu tshe wahalange Jehovah Nzambi. — 1 Corinthiens 6:9-11.
Etawo nsambisha lukumu l’ololo la Diulelu. — Matthieu 24:14.
La ekimanyelu ka Nzambi, we ayena ekalwelu ka Paradisu kakashishia Adam tukanula tande, ndu we ayena ekutshamelu ka alaka ane: “Ku lakuke diuyi dia wulu uma lu kiti ka diulelu diata ate: ‘Enda, edjaselu ka Nzambi keko l’atei w’antu, nde ayudjase la wo, ku vo wayuyala antu ande. Nzambi ndame ayuyala la wo. Nde ayukitula asoi tshe lu ashu awo, nyoi hayuyala ntu; delu hadiuyala ntu, kuyanga ndjawe, kuyanga kandji. Akambu wa ntundu wambushila.” — Revelation 21:3, 4.