Ambatshi Mboka Wekɔ lo Mbisha Ɛnyɛlɔ l’Olimu w’Esambishelo

Ɔmɛnyi wa Jehowa wa ntondo wakaye dia ndjokembola aki ondo okambi wa lo tena ndo lo tena, ombatshi mboka kana misiyɔnɛrɛ ɔmɔtshi. Oko wele Ɛmɛnyi wa Jehowa kema l’ɔnɔngɔ ɔmɔtshi w’ewandji w’ɔtɛmwɛlɔ wafutama, wɛ kokaka ndjoyambola ɔnɛ: Woho akɔna wasalawɔ dia ndjasha l’olimu wa lo tena ndo lo tena na?

Ɛmɛnyi wa Jehowa tshɛ wamboyakimɔ le Nzambi ndo wambobatizama wekɔ ekambi, koko efula ka l’atei awɔ wekɔ l’ɛkɛndɛ wa lo nkumbo kana l’ɛkɛndɛ ekina wâshimba dia vɔ kimɔ wenya efula lâdiko lo lomingu l’olimu awɔ. Koko, nunu la nunu di’Ɛmɛnyi wa l’andja w’otondo wakasuse eongelo kawɔ ka lɔsɛnɔ; ɔsɔku mbakokawɔ, oma lo falanga y’ewɔ lo kondja oma l’olimu awɔ wa lo tena dimɔtshi, kotsha ehomba awɔ wele kema efula ndo mbetsha wenya 1 000 kana ndekana l’olimu.

Mɛtɛ, ambatshi mboka kema la falanga efula dia kotsha ehomba awɔ, koko le wɔ, dui sɔ diekɔ oko yoho ya nyanga Diolelo dia Nzambi ntondo. Ndo vɔ wekɔ lo kondja ɛtshɔkɔ efula. Wêtshelo wa wenya 90 lo ngɔndɔ dia mbewoya akina Dui dia Nzambi ekɔ mbekelo k’ɔlɔlɔ. Okambi wa lo tena ndo lo tena ndowanyaka akoka ande l’olimu, ndo nde ekɔ l’etena k’ɔlɔlɔ dia mondoya posa k’onto. Etombelo w’oma lɔkɔ wekɔ l’ekeketshelo efula. Vɔ wekɔ la kɛnɛ kahombama l’emunyi ndo vɔ mandolaka kɛnɛ kele lawɔ.​—⁠Mateu 6:⁠33.

Lo Yâta afusa 1943, la Société Watch Tower akâte Kalasa ka Bible ka Galadɛ. Oyango wa kalasa kakɔ aki dia ndowanya esambisha wa lo tena ndo lo tena wambohokɔ awui efula dia vɔ sala olimu wa misiyɔnɛrɛ lo wedja ekina. Wetshelo wa ngɔndɔ tshanu mbikamaka dia mbeka Bible l’ɔkɔkɔmalo, mbeka ɔkɔndɔ wa Bible, ɔlɔngɔswamelo wa Jehowa ndo asawo amɔtshi wa ngasɔ wâlɔngɔsɔla otsha l’olimu wa lo wodja okina.

La Société mbafuta akuta wa lɔkɛndɔ la misiyɔnɛrɛ polo ndo lo mbilo kande, mbawokanɛ lo elelo w’ɔlɔlɔ ndo lo edjaselo ka kiɔmi lo luudu la wâ misiyɔnɛrɛ. Nde mbishaka ndo misiyɔnɛrɛ tshɛ yema y’ekimanyielo ka tshitshɛ lo ehomba ande w’onto l’onto. Wâ misiyɔnɛrɛ salaka elimu wa la ngelo ɛnɛ onto l’onto lo londa lande: ntshɔ dia tosomba diangɔ, katɛ diangɔ dia ndɛ, ndo mɔmba ngelo. Ekongelo kɛsɔ k’oshika mbashaka diaaso dia vɔ kimɔ wenya 140 lo ngɔndɔ l’esambishelo ka luudu la luudu ndo l’olimu wa wekelo wa Bible kâmɛ l’anto walanga.

Efula ka wâ misiyɔnɛrɛ ɛsɔ wakatomama lo nunu la nunu dia kilɔmɛtɛlɛ mangana la lawâkawɔ ndo la nkumbo yawɔ. Vɔ wakahombe têkesanɛ la toho ta lɔsɛnɔ totshikitanyi, la waonga amɔtshi, la mbekelo y’elelo w’oyoyo ndo la lowawadi lotshikitanyi, ndo tɛkɛta ɔtɛkɛta w’oyoyo. Vɔ wakasale akambo asɔ oma lo ngandji kakawokaka anyawɔ ndo nɛ dia vɔ wekɔ la saki k’efula ka mbakimanyiya dia vɔ mbeya Diolelo dia Nzambi.

Oma lo 1943 polo lo 1993, Kalasa ka Bible ka Galadɛ kaki la Société Watchtower kakalowanya kalasa 96 ndo kakatome olekanyi misiyɔnɛrɛ 6 500 lo wedja ekina. Oma l’ɛlɔmbwɛlɔ kaki la Société, vɔ waki lo kiɔkɔ y’odianganelo w’olimu wa wetshelo wa Bible l’Afrika, l’Amerika wa l’atei atei ndo wa lo Suda, lo Ehotwelo ka wonya ndo lo Pacifique ka lo Suda, ndo vɔ wakasale lutumu la woke la Mputu.

Kânga mbayasha Ɛmɛnyi wa Jehowa l’olimu wa lo tena dimɔtshi kana wa lo tena ndo lo tena oko ambatshi mboka kana wâ misiyɔnɛrɛ, vɔ kambaka okamba kamba aha la nongola falanga oma lɔkɔ. Vɔ watokimɔka tena diawɔ, falanga yawɔ ndo weolo awɔ dia kimanyiya akina dia vɔ kondja ewo katɔla otsha lo lɔsɛnɔ la pondjo.​—⁠Joani 17:⁠3.

• Woho akɔna wakoka Ɛmɛnyi wa Jehowa ɛmɔtshi ndjâkimɔ l’olimu wa lo tena ndo lo tena, ndo l’ɔkɔkɔ akɔna wasalawɔ dikambo sɔ na?

• Woho akɔna walowanyema ekambi ɛmɔtshi dia vɔ sala olimu wa misiyɔnɛrɛ na?

• Naa osukɔ walongola wâ misiyɔnɛrɛ lo mbilo yawɔ ya lo wedja w’angɛndangɛnda na?

[Esato wa lo lɛkɛ 22]

Lo lonya la lɔmɔsɔ: Olui ɔmɔtshi wa Kalasa ka Galadɛ, la Brooklyn, N.Y., U.S.A.

Lo lonya l’omi: Misiyɔnɛrɛ ɔmɔtshi alakanya Dui dia Nzambi la Papouasie Nouvelle-Guinée

[Esato wa lo lɛkɛ 23]

Ekambi wele ambatshi mboka ndo wâ misiyɔnɛrɛ wasambisha Dui dia Nzambi lo wedja wotshikitanyi

Brésil

République Dominicaine

Espagne

Sierra Leone, (Afrika)