Tshapita 2

Ambɔlɛmiyama la ntondo ka nde mbotɔ

L’ƆKƆNGƆ w’ondjelo Ngabiriyɛlɛ mbutɛ osekaseka welɛwɔ Mariya ɔnɛ nde ayota ɔna pami layoyoyala nkumekanga ka pondjo, Mariya amboyowombola ate: “Ukundi ayuyala dikambu so lam’enaye wati: Dimi lateyana nduku la pami.”

Ngabiriyɛlɛ ambôlembetshiya ate: “[nyuma k’ekila, NW] ayuya le ye. Wulu wa Khum’Ulungu wayukukhukhume la dedi diandi. Okone vo wayole ona layuyuta vati: L’Ekila, On’a [Nzambi, NW].”

Dia nde kimanyiya Mariya woho wa nde mbetawɔ losango lande, Ngabiriyɛlɛ ambotetemala mbotɛ ate: “Ulungi, ndu umuntu luto la ye, Elisabete, ambutsho diemi l’usumbi andi. One lakawetaka vati: Ekumba, ngondo kene keli ngondo kandi ka samalu, ne dia nduku dikambu diaheyi [Nzambi, NW] ntsha.”

Mariya ambetawɔ ɛtɛkɛta waki Ngabiriyɛlɛ. Kakɔna kambondosala na? Nde ambota ate: “Ulungi, ukambi a [Jehowa, NW] mbemi, diayali le mi uku diui diaye.”

Kem’edja l’ɔkɔngɔ wa Ngabiriyɛlɛ mbotshika, Mariya amboyalɔngɔsɔla ko ambotshɔ otsha laka Elisabɛtɛ, ɔnɛ lodjashi nde l’omɛnde Zɛkariya lo ngelo ya l’akona wa la Judeya. Oma laka wa Mariya, la Nazarɛta, polo ndo lɛkɔ, ekɔ ondo lɔkɛndɔ la nshi shato kana nyɛi.

Mariya ambokoma laka Zɛkariya, nde ambɔtɔ lo luudu ko ambowasha mɔyɔ. Wonya akɔ wâmɛ, Elisabɛtɛ ambolodiama la nyuma k’ekila ko ambotɛ Mariya ate: “We eko la otshoko l’atei w’amantu, ndu ona leli l’utema aye, eko la otshoko! Uma lendi uyi dikambu ne dia nyangu Khumemi ndja le mi? Ne dia lam’akamuki moyo aye, ona akakadimwi l’utema la ongenongeno.”

Kam’okinde ɛtɛkɛta ɛsɔ, Mariya ɔnɛ akaloyande dui la lowando l’oma ka tshina di’otema ate: “[Anima ami, NW] ambutumbula [Jehowa, ndo yimba yami yambɔngɛnangɛna ɔtɛkɔya le Nzambi, NW] Ushimbedi ami. Ne dia ndi akenyi ekit[e]kitelu k’ukambi andi a umuntu. Nyulungi, nonga tshe wayumbetaka vati: Leli la otshoko. Ne dia one leli la wulu ambuntshela akambu wa mamba.” Koko, kânga mbambowowoka ngandji ka ngasɔ, Mariya ekɔ lo mbisha Nzambi lokumu l’akambo asɔ tshɛ. Nde ambota ate: “Lukumbu landi leko ekila. Ketshi kandi keko le nonga la nonga ya wane watuwukaka woma.”

Mariya ambotetemala tombola Nzambi l’osambu ɔmɔtshi wa pɔlɔfɛsi koye oma le nyuma k’ekila, ata ate: “Ndi akenya antu wulu wa lunya landi. Ndi akadianganya akanga w’etaku lu tukanyi t’etema awo. Ndi akakitshakitsha akanga [a] wulu uma lu kiti yawo ya waulelu, akambiya antu k’antu. Ndi akalutsha wane waki la ndjala diango di’ololo. Ndi akakaluya akanga w’engonyi anyanya. Ndi akakimanyia ukambi andi Isariyele, ne dia euhwelu ka ketshi kandi, uku akandatela watshesu, le Abarahama ndu le tukanula tandi pundju.”

Mariya ambodjasɛ la Elisabɛtɛ suke la ngɔndɔ shato, aha la tamu, nde ekɔ lo kimanyiya Elisabɛtɛ efula l’edja ka mingu y’ekomelo ka diemi diande. Mɛtɛ, ekɔ ɔlɔlɔ dia amato asɔ ahende wa kɔlamelo, wanɛ wambotshɔ waemi l’ekimanyielo ka Nzambi, mbidjasɛ kâmɛ l’etena kɛsɔ k’ɔngɛnɔngɛnɔ efula lo nsɛnɔ yawɔ!

Onde wɛ akalembete woho wakalɛmiyama Yeso kânga la ntondo ka nde mbotɔ? Elisabɛtɛ akawelɛ ɔnɛ: “Khumemi,” ndo kam’akɔtɔ Mariya lo luudu, ɔna laki l’otema ande akakunyɔkunyɔ l’ɔngɛnɔngɛnɔ. Koko l’ɔkɔngɔ diko, anto akina wayoyɔnyɔla Mariya nde l’ɔnande layondota, oko wayotɛna dikambo diakɔ. Luka 1:26-56.

▪ Ngabiriyɛlɛ ate na wambondotɛ Mariya dia mbokimanyiya dia nde shihodia woho wayondotshɔ diemi?

▪ Ngande wambɔlɛmiyama Yeso la ntondo ka nde mbotɔ?

▪ Kakɔna kata Mariya l’osambu ande wa pɔlɔfɛsi dia nde tombola Nzambi?

▪ Nshi ngana yodjashi Mariya kâmɛ la Elisabɛtɛ, ndo lande na kasunganadiɔ dia Mariya nde la Elisabɛtɛ mbidjasɛ kâmɛ l’etena kɛsɔ?