Tshapita 4

Ambotshɔ diemi koko atatshukama

DIEMI dia Mariya diaya ngɔndɔ shato. Wɛ ekɔ lo mbohɔ dia nde aketsha ngɔndɔ y’etatelo ka diemi diande laka Elisabɛtɛ, koko kakianɛ, nde ambokalola lakawɔ la Nazarɛta. Kem’edja, diemi diande diayoyeyama le anto tshɛ wa l’osomba awɔ. Mɛtɛ, nde ekɔ l’okiyanu w’efula!

Kɛnɛ koleki tshɛ kɔlɔ ele, Mariya ekɔ omambedi waki otshudi w’abaya welɛwɔ Yɔsɛfu. Ndo nde mbeyaka ate: lo ndjela Ɛlɛmbɛ wa Nzambi wakandasha Isariyɛlɛ, omoto lamambemɛ oma le pami kɛmɔtshi, ko ambeyana la pami kekina pombaka mbokama ave dia ndjakema. Ngande wakokande nembetshiya Yɔsɛfu woho wotshwende diemi na?

Oko wakatshu Mariya edja ka ngɔndɔ shato y’etondo, sho kokaka mbuta ɔnɛ asolo wa Yɔsɛfu wekɔ lo nomɔlomɔ dia mɛnana la nde. Lam’akawɛnana, ondo Mariya akatɛ Yɔsɛfu losango lakɔ. Nde akasale la weolo ande tshɛ dia mbolembetshiya ɔnɛ: oma lo tshimbo ya nyuma k’ekila kaki Nzambi mbotshwemi diemi. Koko, oko akokayɛ kanyiya, ekɔ wolo Yɔsɛfu mbetawɔ dikambo sɔ.

Yɔsɛfu mbeyaka lɔkɛwɔ l’ɔlɔlɔ lele la Mariya. Ndo lo menda, nde mbolangaka efula mɛtɛ. Koko, oyadi kakɔna tshɛ kakokande mbuta, mɛnamaka mɛtɛ di’oko nde la pami kekina mbotshwe diemi. Kânga mbediɔ ɔsɔku, Yɔsɛfu halange nde mbokama ave dia ndjakema kana mbishama sɔnyi lo sɛkɛ. Nde ambɔsa tɛdikɔ dia ndjaka la nde diwala lo woshɛshɛ. Lo nshi shɔ, anto wakambanɛ dia tshukana wakɔsamaka oko anto wambotshukana, ndo dia vɔ sɛkana, vɔ wakahombaka ndjaka diwala.

L’ɔkɔngɔ diko, he Yɔsɛfu ɔnɛ atshɔ dia tolala, koko yimba yande yekɔ paka l’akambo asɔ. Nde ele lo djɔ ɔnɛ awɛnɛ ondjelo wa Jehowa lo dɔ, awotɛ ate: “Tukaki woma dia mbosa wadeye Mariya. Ne dia diemi diutshwindi diku, dieli uma le [nyuma k’ekila, NW]. Ndi ayuta ona pami. Kuwole wati: J[esu], ne dia ndi kayushimbela wudja andi uma lu kolo yawo.”

Yɔsɛfu ambemɔ la lowando la mamba! Aha la tshimbatshimba, he nde ɔnɛ asala oko akawote ondjelo. Nde ambɔsa Mariya oya lakande. Mɛtɛ otshelo ɔsɔ wa lo sɛkɛ ekɔ oko sɛlɛmɔnyi ka diwala, ndo otshelo akɔ ɔsɔ mɛnyaka nto ɔnɛ Yɔsɛfu nde la Mariya wambotshukana lo yoho yasungana l’ɛlɛmbɛ a lɛɛta. Koko, Yɔsɛfu hateyana la Mariya edja tshɛ kênde la diemi dia Yeso.

Ohênda! Diemi dia Mariya diaya woke efula, koko Yɔsɛfu ekɔ lo mbâhenya lâdiko dia ponda. Otsha lende atawatshu ndo lande na kowotande lɔkɛndɔ l’etena kele Mariya suke la mbota na? Luka 1:39-41, 56; Mateu 1:18-25; Euhwelu k’Elembe 22:23, 24.

▪ Kakɔna kambosala Yɔsɛfu lam’okinde ɔnɛ Mariya aya la diemi, ndo lande na?

▪ Ngande wakakoke Yɔsɛfu ndjaka diwala nde la Mariya lam’akiwɔ watatshukana na?

▪ Ngande wambotshama diwala dia Mariya nde la Yɔsɛfu?