Tshapita 16

Ohetoheto lo dikambo di’ɔtɛmwɛlɔ wa Jehowa

ANANGO Yeso—mbuta ate ana akina wa Mariya—nkombo yawɔ nyɛ: Jakɔba, Yɔsɛfu, Simɔna, la Judasɛ. La ntondo ka vɔ ntshɔ kâmɛ la Yeso la ambeki ande otsha la Kapɛrɛnauma, osomba wosukanyi la Ndjale ka Ngalileya, ondo wakemala lakawɔ la Nazarɛta dia nɔnga diangɔ diayowotonga ladiɔ ohomba.

Ko lande na atatshu Yeso la Kapɛrɛnauma lo dihole dia tetemala l’olimu ande la Kana, la Nazarɛta kana l’ahole akina wa l’akona wa la Ngalileya na? Ntondotondo, nɛ dia Kapɛrɛnauma ekɔ osomba wele lo dihole dioleki dimɛna ndo vɔ mɛtɛ mbele osomba wa woke efula. Ndo nto, efula k’ambeki w’eyoyo waki Yeso mbidjasɛ la Kapɛrɛnauma kana suke la lɛkɔ, ɔnkɔnɛ, Yeso kokata mbalakanya aha la vɔ monɔ oma lawakawɔ.

L’edja kênde la Kapɛrɛnauma, Yeso ekɔ lo ntsha akambo wa mamba, oko wayondodita ndamɛ l’ɔkɔngɔ a ngɔndɔ mɔtshi. Koko, kem’edja, Yeso l’asekande wambokimɛ lɔkɛndɔ nto. Etena kɛnɛ kekɔ eleko kamɔnga akatshi, ɔnkɔnɛ vɔ wambotshɔ la Jerusalɛma dia tosala difɛstɔ di’Elekanelo dia l’ɔnɔnyi 30 T.D. Lɛkɔ, ambeki ande wayotɛna dikambo dimɔtshi di’endana la Yeso diewɔ watɛnaka ondo.

Lo ndjela Ɛlɛmbɛ wa Nzambi, Ase Isariyɛlɛ pombaka nambola wa nyama. Diɔ diakɔ diasondja amundji w’ekanda wa la Jerusalɛma nyama la tofudu dia wanɛ waya oya lo tɛmpɛlɔ wasombake. Koko wekɔ lo sondja diangɔ sɔ l’etei ka tɛmpɛlɔ, ndo wekɔ lo mbiva falanga y’anto, nɛ dia vɔ mbadjɛ̂ka oshinga wa hiale.

Yeso amboka kɛlɛ, ɔnɛ asɛlande lofimbɔ ko mbitshanya amundji w’ekanda oma lo tɛmpɛlɔ. Nde ambohandjola falanga y’ekenga y’amengudi ndo ambɔkɔsha mɛsa awɔ. Ko nde la wanɛ wasondja tokudumba ate: “Nyunya diango diku! Tanyuhiluyaki luudu la Papa luudu la atshi w’ukanda.”

Ambeki wa Yeso lam’ɛnyiwɔ dikambo ndo, ko wambohɔ pɔlɔfɛsi kêndana l’Ɔna Nzambi kata ɔnɛ: “[Ohetoheto lo dikambo dia luudu layɛ mbayomonya to, NW].” Ase Juda mbawombolawɔ vate: “Djimbitelu yakona yeli la ye, ya ntenyaye, ya we ntsha dikambu ne?” Yeso mbâkadimolande ate: “Nyuhandjuli [tɛmpɛlɔ, NW] kene, ku dimi layukihika lu nshi shatu.”

Ase Juda wekɔ lo kana ɔnɛ Yeso ekɔ lo mbuta dikambo dia tɛmpɛlɔ kakahikama l’ave, ɔnɛ awombolawɔ vate: “Wakahiki [tɛmpɛlɔ, NW] kene deku akumi anei la samalu, ku we ayukihika lu nshi shatu?” Tete Yeso ekɔ lo ntɛkɛta dikambo dia tɛmpɛlɔ ka demba diande. L’ɔkɔngɔ w’ɛnɔnyi esato, ambeki ande wayoyohɔ dui sɔ lam’ayondoyolɔ oma lo nyɔi. Joani 2:12-22; Mateu 13:55; Luka 4:23.

▪ Lende atatshu Yeso l’ɔkɔngɔ wa dambo dia diwala dia la Kana?

▪ Lande na kamboka Yeso kɛlɛ, ndo kakɔna kambondosala?

▪ Dikambo diakɔna diambohɔ ambeki wa Yeso lam’ɛnyiwɔ kɛnɛ kosadinde?

▪ Yeso ate na lo dikambo dia “tɛmpɛlɔ,” ndo alangande mbuta lo dikambo sɔ?