Tshapita 100

Wɛɛla wa mina

ONDO Yeso êke paka laka Zakeyo, lɛnɛ akandemala lam’akandatatshɔkaka otsha la Jerusalɛma. Ambeki ande fɔnyaka ɔnɛ lam’ayowokoma la Jerusalɛma, nde ayotota ate: dimi mbele Mɛsiya ndo ayotahema l’okudi wa Diolelo diande. Dia nde sembola kanyi yawɔ ndo dia mbaɛnya ɔnɛ Diolelo dieke etale efula, Yeso ambowaokɛ wɛɛla ɔmɔtshi.

Nde ambɔkɔndɔla ate: “Untu omotshi, kanga lukumu, akatshu lu kete kina y’etali dia ntuyalungwela diulelu, ati: Kakaluli.” Yeso mbele onto akɔ ɔsɔ, “kanga lukumu,” ndo “kete kina y’etali” yakandatshu kɛdikɛdi olongo. Lam’ayokoma Yeso lɛkɔ, She ayowosha lowandji la nde ndjâla nkumekanga.

Koko la ntondo ka nde ntshɔ, onto ɔsɔ la lokumu ambelɛ ase olimu ande dikumi ko ambowasha onto l’onto mina ka fɛsa, awatɛ ate: “Nyutshi la yo ukanda, edja ndu lam’ayumukalula.” Lo ekotshamelo ka ntondo, ase olimu asɔ dikumi kɛdikɛdi ambeki wa Yeso wa ntondo. Lo ekotshamelo koleki woke, ase olimu asɔ kɛdikɛdi wanɛ tshɛ wele l’elongamelo ka monga ekitɔ kâmɛ la nde lo Diolelo dia l’olongo.

Mina ya fɛsa yekɔ ekenga wa falanga wa nɛmɔ efula, mina ɔtɔi mbɛdima la difuto dia ngɔndɔ shato le okambi wa dikambɔ. Ko mina shɔ alembetshiyayɔ na? Ndo woho akɔna w’okanda wahomba ase olimu asɔ munda layɔ?

Mina shɔ yekɔ didjidji dia diangɔ diakoka ambeki w’akitami wa nyuma kamba ladiɔ dia fudia ekitɔ wa Diolelo dia l’olongo polo ndo lam’ayoya Yeso oko Nkumekanga lo Diolelo diakalakema. L’ɔkɔngɔ w’eolwelo ndo w’ɛnamelo kande le ambeki ande, nde akawasha mina shɔ ya didjidji dia vɔ mbetɛ anto efula ambeki wayoyokotshama lo olui wa lo Diolelo dia l’olongo.

Yeso ambotetemala mbuta ate: “Keli [ase] wudja andi [wakahetshaka onto la lokumu]; wakatumi akendji l’okongo andi vati: Shu hatulangi untu one ntûlela.” Ase wodja ande kɛdikɛdi Ase Isariyɛlɛ, kana Ase Juda, koko aha ambeki ande. L’ɔkɔngɔ wa Yeso ntshɔ otsha l’olongo, Ase Juda asɔ wakɛnya ɔnɛ vɔ hawolange nde ndjâla nkumekanga kawɔ lam’akawahɛnyahɛnyaka ambeki ande. Lo yoho shɔ mbakawasale oko ase wodja wakatome akɛndji.

Ase olimu asɔ dikumi ambowosala la mina yawɔ na? Yeso ambolembetshiya ate: “L’okongo diku wa nungula diulelu, ku lam’akandakalula, ndi akati ati: Nyeti ekambi eku wakamasha falanga, dia dimi mbeya diango diakamakundja waho l’ukanda. One la ntundu akayi le ndi, akati ati: Khumadiondjo, mina kaye kambuta mina kina dikumi ladiku. Ndi akawutela ati: Kawo, we ukambi w’ololo! ne dia we akatanema la kolamelu lu diango diuleki tshitshe, uleli esumba dikumi. One la hendi akayi, akawutela ati: Khumadiondjo, mina kaye kambuta mina kina tshanu. Ndi akawutela ati: Ndu we, uleli esumba etanu.”

Ose olimu waki la mina dikumi nembetshiyaka olui ɔmɔtshi w’ambeki, mbidja ndo apɔstɔlɔ, tatɛ oma lo Pɛntɛkɔsta ka l’ɔnɔnyi 33 T.D. polo ndo lo nshi yaso nyɛ. Ose olimu wakakondja mina tshanu nembetshiyaka ndo nde lawɔ olui ɔmɔtshi wele, l’edja k’etena kakɔ kâmɛ, lo ndjela akoka awɔ la waaso awɔ, wekɔ lo fudia diangɔ dia lanɛ la nkɛtɛ diaki nkumekanga kawɔ. Elui akɔ ehende wekɔ lo sambisha lokumu l’ɔlɔlɔ l’ohetoheto tshɛ, omalɔkɔ, anto efula w’etema ɛlɔlɔ wekɔ lo ndjâla Akristo. Ase olimu divwa wakande okanda awɔ dimɛna efula ndo wakafudia diangɔ diakawawasha.

Yeso ambotetemala mbuta ate: “Ukina akayi, akati ati: Khumadiondjo, enda, mina kaye kene, kakamumbi lu tshambala. Dimi lakakuki woma, ne dia we eko kanga ngala. We atotongonaka kene kakiye kunkitsha; ndu atunaka kene kakiye kumune. Ndi akawutela ati: Uma lu aui aye, mbayumukamia, we ukambi a kolo! We akeyi wati: Dimi leko kanga ngala, latotongonaka lam’akimi kunkitsha, ndu latunaka lam’akimi kumune? Ya ukundi akiye kunkitsha lufalanga lami lu dihuli di’esombanyelu, tshiki lutuyulosa kame la waho? Ku ndi akatela wane wakemadi lasuki ati: Nyôkosole mina kandi, nyusha kanga mina dikumi.”

Le ose olimu ɔsɔ wa kɔlɔ, oshishelo wa mina ka didjidji kɛdikɛdi oshishelo wa dihole lo Diolelo dia l’olongo. Mɛtɛ, nde amboshisha diɛsɛ dia mbolɛ l’esomba dikumi kana etanu, lo yoho ya didjidji. Tolembete dia, ose olimu ɔsɔ kombelamɛ ɔnɛ kanga kɔlɔ l’ɔtɛ wa kɔlɔ kotshende, koko nɛ dia nde kokamba olimu wa fudia ekundji wa lo diolelo di’owandji ande.

L’etena kambowɔsa mina k’ose olimu wa kɔlɔ dia kisha ose olimu wa ntondo, akina wambotona, wota vate: “Khumadiondjo, ndi la mina dikumi!” Koko Yeso ambokadimola ate: “One leli la, wayuwusha; keli one laha la, wayôkosola ndu kene keli la ndi. Keli atunyi ami waki kunanga dimi mbaulela, nyuwaela lindu, nyuyâdiaki la ntundu kami.” Luka 19:11-27; Mateu 28:19, 20.

▪ Kakɔna kambotshutshuya Yeso dia mboka wɛɛla wa mina?

▪ Akɔna ele onto la lokumu, ndo ele wodja watandatshu?

▪ Wa na wele ase olimu, ndo mina yowashawɔ alembetshiyayɔ?

▪ Wa na wele ase wodja ande, ndo woho akɔna wambowɛnya lohetsho lawɔ?

▪ Lande na kambowelɛ ose olimu ɔmɔtshi ɔnɛ kanga kɔlɔ, ndo oshishelo wa mina kande kɛdikɛdi na?