Tshapita 119

Wambɔ̂tɔla le Anasi ko le Kayifasɛ

WAMBOKELEKA Yeso ɛkɔdi oko onto lambokongola onongo a woke, ko wambɔ̂tɔla le Anasi, ɔlɔmbɛdi a lâdiko w’edjedja ndo onto la lokumu efula. Anasi mbaki ɔlɔmbɛdi a lâdiko l’etena kakâmbia Yeso embetsha w’ɛlɛmbɛ lo tɛmpɛlɔ, lâsɔ ko nde ele l’ɛnɔnyi 12. L’ɔkɔngɔ diko, ana efula waki Anasi wakayokambaka olimu w’ɔlɔmbɛdi wa lâdiko, koko l’etena kɛnɛ kambowɔtɔla Yeso la ntondo kande, Kayifasɛ, okil’ande, mbele lo dihole sɔ.

Wambɔtɔla Yeso ntondo laka Anasi, ondo nɛ dia nde ekɔ onto l’ohomba efula lo lɔsɛnɔ l’ɔtɛmwɛlɔ w’Ase Juda l’edja k’efula. Woho wambowemala ntondo laka Anasi ambosha Kayifasɛ, Ɔlɔmbɛdi a Lâdiko, etena ka nde sanganya Ase Sheke, anto 71 wakenga tuminadi ta lâdiko t’Ase Juda, ndo dia tshumanya ɛmɛnyi wa kashi.

Anasi, ɔlɔmbɛdi a woke, ambombola Yeso lo dikambo di’ambeki ande ndo dia wetshelo ande. Koko Yeso ambôkadimola ate: “Dimi lakatela antu diui diami lu seke. Dimi laketshaka antu nshi tshe lu temwelo, ndu lu etemwelo ka wuki lene atusanganaka asi Juda tshe. Dimi kumvuta nduku dikambu lu usheshe. Dikambu kuna diamumbulaye na? Umbuli wane wakuki aui ami akambu wakamawatelaka. Ulungi, vo mbeyaka akambu wakamataka.”

Lam’otshinde ɔsɔku, pulushi dimɔtshi diemadi suke la Yeso ambɔ̂kɔmɔla lowala l’elungi, awotɛ ate: “Undi, wuhu oso mbambuyukaluya olombedi a ladiku diui?”

Ko Yeso ambôkadimola ate: “Naka dikambu dia kolo mbutshimi, uditi. Keli naka dikambu di’ololo, ya ukundi ankomolaye na?” L’ɔkɔngɔ wa wetshanyelo ɔsɔ w’ɛtɛkɛta, Anasi ambotoma Yeso otsha le Kayifasɛ, okelekami ɛkɔdi.

L’etena kɛnɛ, ɛlɔmbɛdi a weke tshɛ, dikumanyi la afundji, mbuta ate Ase Sheke tshɛ, wambotatɛ tshumana. Ondo mɛtɛ losanganya lɔsɔ lambosalema laka Kayifasɛ. Ɛlɛmbɛ w’Ase Juda hawetawɔ diwandja dia ngasɔ l’otsho w’Elekanelo. Koko ewandji w’ɛtɛmwɛlɔ hawotshike mbesa oyango awɔ wa kɔlɔ.

Ambeta oko mingu mɔtshi, lam’akolola Yeso Lazaro, Ase Sheke wakashile mbofundɛ nyɔi. Ndo, ambeta nshi hiende y’etondo, Lushi la Sato, ewandji w’ɛtɛmwɛlɔ wakokana dia munda Yeso lo mayɛlɛ ko mbodiaka. Ohotokokanyiya dikambo sɔ, wakôfundɛ ndo nyɔi la ntondo ka vɔ mbolomboya!

Kakianɛ, wamboyatshutshuya dia tana ɛmɛnyi wa kashi dia vɔ ndjomamatanyiyɛ Yeso akambo. Koko, akambo w’ɛmɛnyi akɔ tshɛ hawɔtɔnɛ. L’ɔkɔngɔ diko, anto amɔtshi ahende wamboya ko wamboyota vate: “Shu takawuki ata ati: Dimi layuhandjula etemwelo kene kakahikama l’anya, ku layuhika kekina lu nshi shatu, kahuhikama l’anya.”

Ko Kayifasɛ mbawombolande ate: “We hakaluya nduku diui? Dikambu diakosongwela antu ane, ukundi wedio?” Koko Yeso ambotshikala ki. Kânga lam’awomamatanyiyɛwɔ akambo asɔ, Ase Sheke wambɔlɔmbɔ la nsɔnyi, nɛ dia awui w’ɛmɛnyi tshɛ hawɔtɔnɛ. Ɔnkɔnɛ, ɔlɔmbɛdi a lâdiko ambohemba yoho kina.

Kayifasɛ mbeyaka ɔnɛ Ase Juda mbokaka kɛlɛ efula lam’ayata onto ɔmɔtshi ate: Ɔna Nzambi mbemi. Ambeta oko esangɔ ehende, vɔ wakataka ɔnɛ Yeso kokaka mvɔ nɛ dia nde ambɔtɛnga Nzambi, dikambo vɔ wekɔ lo kanyiya lo yoho ya kashi ɔnɛ nde ekɔ lo ndjata ɔnɛ dimi mbɛdima la Nzambi. Ɔnkɔnɛ, Kayifasɛ ambowombola lo mayɛlɛ ate: “Dimi lambukolomba lu lukumbu la [Nzambi ka, NW] lumu nti: Ututeli kana Kristu keye, On’a [Nzambi, NW].”

Oyadi kakɔna tshɛ kakanyiya Ase Juda, Yeso ekɔ mɛtɛ Ɔna Nzambi. Otondɔlama ki, tshike wotokanyiya ɔnɛ nde ambanguna ɔnɛ nde kema Kristo. Diɔ diakɔ diambokadimola Yeso la dihonga tshɛ ate: “Dim’one. Nyu nyayena On’a untu udjashi lu lunya la pami la [w]ulu, ayayi lu wangi wa l’ulungu.”

Kam’okinde ɔsɔku, Kayifasɛ ambatshatsha ahɔndɔ ande, ko ambota ate: “Akatahumbi emenyi ntu? Nyu aso wuka lotengo, latengandi [Nzambi, NW]. Akananyu na?”

Ase Sheke wambokadimola vate: “Ndi nkukaka mvo.” Ko vɔ wambotatɛ mbɔsɔka ndo wambɔ̂tɛnga efula. Amɔtshi wambɔ̂kɔmɔla mbala ndo akina wambɔ̂hɔngɔlɛ nsɔi l’elungi. Akina nto wambôkomba elungi ko wambotatɛ mbohakola akɔfi, wɔ̂sɔka vate: “We Kristu, ututeli akambu wahatayi! Untu akona ukokomodi?” Akambo wa ngasɔ wa kɔlɔ efula mbasalɛwɔ Yeso l’otsho wôlomboyawɔ. Mateu 26:57-68; 26:3, 4; Mako 14:53-65; Luka 22:54, 63-65; Joani 18:13-24; 11:45-53; 10:31-39; 5:16-18.

▪ Lende ambowotshɔ la Yeso ntondo, ndo kakɔna kambotôkomɛ lɛkɔ?

▪ Lende ambowoyotshɔ la nde l’ɔkɔngɔ diko, ndo l’oyango akɔna?

▪ Kakɔna kambosala Kayifasɛ ɔnɛ kele Ase Sheke wate ɔnɛ Yeso kokaka mvɔ?

▪ Akambo akɔna wa kɔlɔ efula wasalɛwɔ Yeso l’otsho wôlomboyawɔ?