Tshapita 130

L’Omamu wa ndjale ka Ngalileya

LO NDJELA kɛnɛ kakatawate Yeso ntondo, apɔstɔlɔ wambokalola la Ngalileya. Koko vɔ haweye kɛnɛ kahombawɔ ntshaka lɛkɔ. L’ɔkɔngɔ wa tshanda mɔtshi, Petero ambotɛ Tɔmasɛ, Natanyɛlɛ, Jakɔba la Joani y’ɔnango, ndo apɔstɔlɔ akina ahende ate: “Dimi lambutsho la ntunda nsi.”

Ambeki asɔ asamalo wambôkadimola vate: ‘Ndo sho mbatatshu la yɛ.’

Hawundji ndoko ema otsho w’otondo. La lɔkɛsɛ, Yeso ambɛnama l’omamu w’ashi, koko ndoko ɔpɔstɔlɔ weya ate Yeso ongo. Nde ambowaelɛ la dui dia wolo ate: “An’ami, nyu la engo ka nde?”

Ko vɔ wambôkadimola la dui dia wolo lɛnɛ ewɔ lo wâto vate: “Kema.”

Ko nde lawɔ ate: “Nyudji tei lu lunya la pami la watu, ku nyayena nsi.” Lam’odjishawɔ ɔtɛi lɛkɔ, ko hawoyokoka mbokotola nɛ dia nse yambolola tɔ lɔkɔ.

Joani ɔnɛ adande kioko ate: “Khumadiondjo one!”

Kam’okinde ɔsɔku, Petero ambɔlɔta ahɔndɔ ande wa lâdiko, nɛ dia nde akâkolodi, ko ambombɛ l’ashi. Nde ambosanula otsha l’okongo lo yɛdikɔ ya mɛtɛlɛ 90. Apɔstɔlɔ akina wekɔ lo ndjawoyele lo wâto wa tshitshɛ, wayakotola ɔtɛi woludi tɔ la nse.

Lam’okumiwɔ l’okongo, vɔ wambotana dja y’akalanga, kâmɛ la nse mɔtshi yafumbama lâwɔ ndo mapa. Ko Yeso ambowatɛ ate: “Nyela nsi kina yambunyunda kakiane.” Petero ambodɛ lo wâto ko ambotokotola ɔtɛi oya l’okongo. Ɔtɛi akɔ wekɔ la nse ya weke 153!

Ko Yeso ambowatɛ ate: ‘Nyoye nyoyole.’

Ndoko onto lele la dihonga dia mbombola ate: “We na?” nɛ dia vɔ tshɛ mbeyaka ɔnɛ Yeso nd’ɔnɛ. Ɔnɛ mbele ɛnamelo k’esambele kaki Yeso l’ɔkɔngɔ wa nde mbolɔ, ndo ɔnɛ mbele ɛnamelo kande ka sato le apɔstɔlɔ ande ato. Nde ambotatɛ mbasha mapa la nse dia vɔ ndɛ.

Lam’oshidiyishawɔ la ndɛ, ondo mɛtɛ Yeso ambenda lokema la nse yondjiwɔ ko ambombola Petero ate: “Simona, on’a Joani, we ndeka ane mbukami ngandji?” Kɛdikɛdi nde ekɔ lo mombola ɔnɛ: Onde wɛ ndjashaka efula l’olimu ayɛ wa munda nse oleki olimu wakamakɔlɔngɔsɔla dia wɛ ntsha?

Petero ambôkadimola ate: “Elu, Khumadiondjo. We mbeyaka wati: Dimi nkukaka ngandji.”

Ko Yeso ambôkaloya dui ate: “Ulesha an’ami w’ekoko.”

Nde ambowombola mbala ka hende nto ate: “Simona, on’a Joani, we mbukakami ngandji?”

Ko Petero ambokadimola oma ka tshina di’otema ate: “Elu, Khumadiondjo. We mbeyaka wati: Dimi nkukaka ngandji.”

Yeso ambowotɛ nto ate: “Ulamaki ekoko ami.”

Nde ambowombola nto mbala ka sato ate: “Simona, on’a Joani, we mbukakami ngandji?”

Ko Petero ambonyanga efula l’etena kɛnɛ. Ondo nde amboyambola ɔnɛ Yeso ekɔ lo mbidja tamu lo kɔlamelo yande. Lâdiko di’akambo asɔ tshɛ, atete ndoko edja, l’etena kakawalomboyaka Yeso, Petero akanguna mbala shato y’etondo ate: dimi halaweye. Diɔ diakɔ diambowotɛ Petero ate: “Khumadiondjo, we mbeyaka akambu tshe. We mbeyaka wati: Dimi nkukaka ngandji.”

Ko Yeso ambowotɛ mbala ka sato ate: “Uleshaki ekoko ami.”

Lanɛ, Yeso aha paka Petero oto mbatɛnde, koko ndo apɔstɔlɔ akina, nɛ dia nde nangaka mbaɛnya olimu akɔna walangande vɔ ntsha. Oko wayangande mumɔ oma lanɛ la nkɛtɛ, Yeso nangaka vɔ mpomɛ ntolo yawɔ dia nkokɛ wanɛ wayokotwama oya lo lokoto l’ɛkɔkɔ wa Nzambi.

Yeso ambɛnya ɔnɛ, oko akawôkeleka ɛkɔdi ndo mbodiaka, Petero, ndo nde lawɔ, ayohomana l’akambo akɔ wâmɛ. Nde ambowotɛ ate: “Lam’akiye olongo a pami, we akayalotshaka uya, akakendakendaka lene akayalangaka; keli lam’ayuyuyala usumbi, we ayusimbula anya aye, ku ukina ayukolotsha uya, ayukotola lene ahayalangi.” Koyanga mbakongɛ Petero nyɔi ka lodiaka, Yeso ambowotɛ ate: “Undjeli.”

Petero ambosekesɔ, ambɛna Joani, ko nde ambombola ate: “Khumadiondjo, kayutsha untu one na?”

Ko Yeso ambôkadimola ate: “Lam’ayumulanga nti: Ndi atshikali la lumu edja ndu lam’ayumukalula, dikambu diaye mbedio uka? Undjeli.” Oma l’ɛtɛkɛta ɛsɔ waki Yeso, ambeki efula wakayɔfɔnya ɔnɛ ɔpɔstɔlɔ Joani havɔkaki pondjo. Koko, oko wayoyolembetshiya ɔpɔstɔlɔ Joani l’ɔkɔngɔ, Yeso kombuta ɔnɛ nde havɔkaki pondjo, koko ɔnɛ: “Naka dimi layulanga nti: Ndi atshikali la lumu edja ndu lam’ayumukalula, dikambu diaye mbedio?”

L’ɔkɔngɔ diko, Joani akanyomoyota dui nɛ di’ohomba ate: “Jesu akatshi ndu akambu akina efula. Utunduyala dikambu la dikambu diafundami, dimi lambukana nti: Kete yame tshu tutuyeya nkuka abuku tshe wutufundama.” Joani 21:1-25; Mateu 26:32; 28:7, 10.

▪ Kakɔna kɛnya ɔnɛ ambeki hawoyeya kɛnɛ kahombawɔ ntshaka lam’ewɔ la Ngalileya?

▪ Ngande wamboyeya apɔstɔlɔ Yeso lam’ende l’omamu wa Ndjale ka Ngalileya?

▪ Tena dingana diambɛnama Yeso tatɛ oma l’eolwelo kande?

▪ Ngande wamboka Yeso epolo ɔsɛkɛ dia mɛnya olimu walangande apɔstɔlɔ ntsha?

▪ Ngande wambotɛnyisha Yeso woho wa nyɔi kakongɛ Petero?

▪ Akate Yeso lo dikambo dia Joani kaki koshihodiama dimɛna le ambeki efula?