Etini 8

Didjango diaki Nzambi dieko suke la kotshama

1, 2. Yediko yakona yakose Nzambi dia shidiya fonu na?

NKUMBO k’anto lo diene lo edja ka kama la kamula y’enonyi la tshina dia lowandji l’anto ane wele la lomba l’atomboki ndo la tshina di’edenge. Kanga mbedio osoku, Nzambi hatolongame lo fonu yaso. Koko, lo edja kamboviya kama la kamamula y’enonyi ako, nde akose tediko dia tshungola anto oma lo kolo la fonu.

² Lo etena k’otombokwelo lo Edena, Nzambi akame la menya didjango diande dia tonga lowandji lone layokadimola kete paradiso dikambo di’anto. (Etatelu 3:15) L’okongodiko, Yeso, oteketi woleki woke waki Nzambi, aketɛ lowandji lako laki Nzambi lone lahomba ndja oko ote a dui w’olakanyelo ande. Nde akewoya dia oso kele dikongelo diako otoyi diele l’anto.​—Danyele 2:44; Mateu 6:​9, 10; 12:21.

3. Woho akona wak’elɛ Yeso lowandji l’oyoyo lone la lâ kete, ndo lande na?

³ Yeso akelɛ lowandji lako laki Nzambi ate: “Diulelu dia l’ulungu,” ne dia dio diayole oma l’olongo. (Mateu 4:17) Nde akadielɛ nto ate: “Diulelu dia Unyashungu,” ne dia Nzambi kele Otungi adio. (Luka 17:20) L’okongo wa kama la kama y’enonyi, Nzambi akasambiya nyuma kande le anto ane wakafundaka ekanda ande dia vo funda akambo wahataye w’endana la wane w’ayosala lowandji lako.

Owandji w’oyoyo wa kete

4, 5. Woho akona wakenya Nzambi ate Yeso kele Owandji one wakand’etawo?

⁴ Aya yediko y’enonyi nunu dihende polo ndo kakiane, Yeso mbakakotsha akambo efula w’amvutshi w’endana la one lahomba monga Owandji wa Diolelo diaki Nzambi. Nde akenya dia Nzambi akôsone oko Owandji wa lowandji lone layolombola andja w’otondo oma l’olongo. Ndo l’okongo wa nyoi ka Yeso, Nzambi akawolola dia nde monga la loseno l’olongo oko etongami ka lo nyuma kele la wolo ndo kahenama. Emenyi wa elwelo kande wakiko.​—Etsha 4:10; 9:​1-9; Romo 1:​1-4; 1 Koreto 15:​3-8.

⁵ Omaloko, Yeso “[akadjase, NW] lu lunya la pami la Unyashungu.” (Heberu 10:12) Leko mbakandakonge etena kakahombe nzambi mbosha wolo wa nde mbahemɛ oko Owandji wa Diolelo diaki Nzambi dia l’olongo. Omaloko, awui wa lo Osambu 110:1 (NW) wakakotshama, lene akate Nzambi diaki Yeso ate: “Djase lo lonya lami l’omi polo ndo lam’ayomokitsha andoshi aye oko lohona l’ekolo aye.”

6. Woho akona wakenya Yeso one nde kokaka dia ndjala Owandji wa Diolelo diaki Nzambi na?

⁶ Lam’akinde la kete, Yeso akenya dia nde akakoke dia mbosa dihole so. Oyadi kanga l’ehemba, nde aki la kolamelo otsha le Nzambi. Omaloko, nde akenya dia Satana eko kanga kashi lam’akandaseme one: ndoko onto layokoka tshikala la kolamelo otsha le Nzambi l’ehemba. Yeso, onto a kokele, ‘Adama wahende,’ akenya dia Nzambi kondjâkesa etena kakandatonge anto kokele.​—1 Koreto 15:22, 45; Mateu 4:1-11.

7, 8. Elolo akona wakasale Yeso lam’akinde lane la kete, ndo dikambo diakona diakandenya na?

⁷ Owandji akona wambosala ololo oleki Yeso lo yema y’enonyi tshitshe yakandakambe olimu ande na? Lam’akandakondja wolo oma lo spirito k’osanto ka Nzambi, Yeso akakonola akanga wa hemo, tshumbe, totshungu, akanga a poke, ndo wa nyumi. Nde akolola kanga anto wakavu! Nde akenya lo dihole dia tshitshe akambo ane wayondoyokotsha dia ololo w’anto lo ahole tshe wa l’andja w’otondo, etena kene kayondoya lo wolo wa Diolelo.​—Mateu 15:​30, 31; Luka 7:11-16.

⁸ Yeso akasale akambo w’ololo efula lam’akinde la kete oko akate Joani ombeki ande ate: “Jesu akatshi ndu akambu efula. Utunduyala dikambu la dikambu diafundami, dimi lambukana nte: [andja tôtowokoka, NW] abuku tshe wutufundama.”​—Joani 21:25.a

9. Lande na kele anto wele l’otema w’ololo wakayaka oya le Yeso?

⁹ Yeso aki kanga diki ndo lokana ketshi, nde aki la ngandji efula le anto. Nde akakimanyiaka akanga a wola ndo wane wakahenyahenyamaka, aha la sala shonodi y’anto wa lukumu kana akanga w’ongonyi. Anto w’otema ololo waketawoka lo l’eta laki Yeso la ngandji efula lone: “[Nyoye ya lemi, nyu tshe wane wambolemba l’okambelo w’olimu, NW] ndu weli la wutshu wa wulu, ku dimi layunyusha mumuya. Nyembe lokoho lami, nyeki akambu uma le mi. Ne dia dimi la memakana la ndjakitshakitsha l’utema, ku nyu nyayutana mumuya l’etema anyu, ne dia lokoho lami leko ololo, la ushiko ami weko usadi.” (Mateu 11:28-30) Anto ane wakokaka Nzambi woma wakatshokaka le nde ndo l’asolo ladiko wakakongeka lowandji lakinde.​—Joani 12:19.

Ewandji wahoni

10, 11. Wana akona wayôle kete kame la Yeso?

¹⁰ Lowandji l’anto tôngaka l’ewandji wahoni; eko woho ako wame la Diolelo dia l’olongo diaki Nzambi. Yeso ayolowanya kete l’anto akina ne dia nde akalake wane wakakambaka kame lande la kete ate: wayoyala ewandji dia mbole lande kame.​—Joani 14:2, 3; Enyelo 5:10; 20:6.

¹¹ Omaloko, olui w’anto weyama lofulo wayôlɔ dia tônga la loseno l’olongo kame la Yeso. Vo wambotonga Diolelo diaki Nzambi ne diayela engenongeno wa pondjo le anto. (2 Koreto 4:14; Enyelo 14:1-3) Lo edja kambeta deko, Jehowa akashile la mbika etshina ka lowandji lone layela engenongeno wa pondjo le nkumbo y’anto.

Lowandji la dipanda lambokome

12, 13. Diolelo diaki Nzambi dieko suke la sala dikambo diakona?

¹² Lo eleko k’akumi ahende keso kene, Nzambi ambekama lo tshena pe lo akambo wa la kete. Oko wayotolimbitshiya hoe etini 9 ka biukubuku nye, akambo w’amvutshi wa lo Bible menyaka dia Diolelo diaki Nzambi la Kristo diakashikikala lo 1914 ndo dieko kakiane suke la nanya andja waki Satana. Diolelo diako dieko suke la ‘mbahemɛ lateyi w’andoshi waki [Kristo].’​—Osambu 110:2.

¹³ Woho ako mbele, akambo w’amvutshi wa lo Danyele 2:44 mbutaka onkone: “L’etena ka nkumi ya dikanga yako [yele nshi nye], Nzambi ka l’olongo ayemadja diolelo diele hadiotolanyema kanga yema, ndo diolelo diako hoshama le anto akina [lowandji l’anto halotonga nto la dihole]; [Diolelo diaki Nzambi] diayohotshahotsha ndo nanya waolelo ako tshe, ko dio diayoshikikala pondjo pondjo.”​—Revised Standard Version.

14. Engenongeno emotshi akona wayonga lam’ayokome lowandji l’anto na?

¹⁴ Onkone lowandji tshe lele kema oma le Nzambi layolanyema, Diolelo diaki Nzambi diayole kete l’akambo tshe. Lam’ele diolelo diaki Nzambi dia l’olongo mbedio, dio hokoka nanyema oma le anto. Lowandji layotanema lene akilo ntondo, l’olongo, le Nzambi. Ndo lam’ele lowandji laki Nzambi layokamba olimu lo kete k’otondo tshe, ndoko onto layonganyiyama nto oma lo etemwelo wa kashi, dikanyikanyi di’akanga wa bewo, kana l’alaka wa akambo wa politike. Akambo aso hawotonga nto.​—Mateu 7:15-23; Enyelo, tshapita 17 polo tshapita 19.

[Nɔte ka l’ɛse ka dikatshi]

[Osato wa lo lɛkɛ 18]

Lam’akinde la kete, Yeso akakonola akanga a hemo ndo mbolola anto wakavu dia menya kene kayondosala lo andja w’oyoyo

[Osato wa lo lɛkɛ 19]

Diolelo diaki Nzambi dia l’olongo diayolanya weoho wa lowandji tshe layâkakitola lande