Ekimanyelo le wane wambokomo alemba
“Ditongatonga tshe dieko lo tetemala la kuma akumu kame ndo la sowa kame.” (Romo 8:22) Anto waki lo sowa efula etena kakafundama eteketa ene ambeta yediko y’enonyi 1 900. Efula wakakomo alemba. Dio diako diakawakokome akristo one: “Nyokeketsha akanga w’etema a weodu.”—1 Tesalonika 5:14.
Ɛlɔ kene asui w’anto wambotambo olelo, ndo efula k’anto wambokomo alemba woho wahatatshamaka. Onde dikambo so tokashimolaka? Lo mete, kema ne dia Bible teketaka dia nshi yaso nye dioko “nshi y’ekomelo” ndo mboyietaka ate: “Tena dia wolo.” (2 Timote 3:1-5, MN) Yeso Kristo akate ate lo edja kayoviya nshi y’ekomelo, ayonga “sase dia woma di’ase wedja” ndo “anto wayoka yimba tshimba ne dia woma ndo elongamelo k’akambo wayaye la kete yodjashimi.”—Luka 21:7-11, 25-27, MN; Mateu 24:3-14.
Lama wandama onto la sase dia woma, la lonyangu ndo la weho ekina w’okashimwelo wa kolo etena k’otale, mbala efula demba diande kokaka komo. Kioko y’okomwelo wa demba kana ya lonyangu l’etete kokaka tomba oma lo ovushelo a lakiye l’ohomba, ohandjoelo a diwala, oshishelo w’olimu kana oma lo hemo kahakono. Anto amotshi watokomoka alemba etena kene katowoyaenaka dioko ohomba awo kema kana hawokoke ntsha ndoko dikambo, kana too dikongelo ne diele la anto efula lewo hadiokotshami. Oyadi ɛlɔ kene kana lui, lomba l’oseka onto tshe kokaka tshimba oma lo dikambo dimotshi dia kandji efula, koko wonya wena onto dioko nde kema too la dikongelo kana nde hakoke tana etombelo w’ololo oma lo ekakatanu ande, nde ndjanemaka ndameme lo wale a woke w’okomwelo wa demba.
Woho w’olengolengo wa ngaso mbaki lo mboka kanga anto waki lo sena nshi ya tondo. Jobo akadiene la hemo ndo akatekola fonu lo tekola. Lama wele nde akafonya dioko Nzambi akawokasha, nde kɔmena ohomba a loseno too. (Jobo 10:1; 29:2, 4, 5) Jakobo akakomo demba etena kakandafonya dioko onande akavu; nde akatuni osambelo ndo akakombola mvo. (Etatelo 37:33-35) Akiyana efula dikambo dia munga ka woke kakandasale, nkum’ekanga Davidi akade koko ata ate: “Dimi lambolembiama. Laketiti la lonyangu yanyi y’otondo tshe.”—Osambu 38:6, 8; 2 Koreto 7:5, 6.
Ɛlɔ kene anto efula wambokomo alemba dikambo dia tomba tawo tamboshila lo nyanga woho wa ndjela akambo a lo loseno la nshi nye, akambo woliki etale efula ekondjelo kana akoka awo wa lo tomba, wa lo wɔ̂ngɔ ndo wa lo demba. Fonyamaka dia ohenyohenyo wa lo demba, tokanyi ta kolo kame ndo okɛtɛlɔ wa l’asolo kokaka fukutanya demba di’otondo ndo mbisha mboka dia woho one wolongami wɔ̂ngɔ tshikitana ko ekomelo ele okomwelo wa demba tana dihole.—Enda Tokidi 14:30.
Ekimanyelo kele lawo l’ohomba
Epaforodito, okristo omotshi w’ose Filipi, “akakomo demba dikambo dia [angenyi ande] wakoke voate: nde akandama la hemo.” Epaforodito, akatondama la hemo la Romo l’okongo w’angenyi ande mbôtoma leko la diango lo lokombo lawo woho wa nde tɔlɛ otomami Paulo, onkone nde aki lo fonya dioko nde ambakesola kana mbatshele kolo, ndo omaloko menama oko kanga shuwasuwa lo washo awo. (Filipi 2:25-27, MN; Fil. 4:18) Woho akona wakôkimanyiya otomami Paulo na?
Nde akakaloya Epaforodito otshakawo la okanda one wakandafundela angenyi ande w’ase Filipi ate: “Nyôlongole [Epaforodito] lo Nkumadiondjo l’ongenongeno tshe. Nyolemia anto wele oko nde.” (Filipi 2:28-30, MN) Lama wele Paulo akateketa dikambo diande l’eteketa a lotombo ndo ase Filipi wakôlongola l’ongenongeno ndo la ngandji k’efula, mete dikambo so diakahombe keketsha Epaforodito ndo mbokimanyiya woho wa nde topo oma lo okomwelo ande wa demba
Aha mbidja tamu, dako dia lo Bible diata ate “nyokeketsha akanga w’etema a weodu” dieko dako di’ololo efula. Womoto omotshi laki lo diene la okomwelo wa demba akate ate: “Mongaka ohomba wa mbeya dia kana anto akina kenaka oko onto kana kokaneka. Mongaka ohomba a we mboka onto okina ata ate: ‘Dimi kôkaka; kema edja we ayoka dimena.’ ”
Eko ohomba le onto lambokomo demba dia nde takola nna dia tondo woho wa nyanga onto omotshi one lele l’otema a lotutsha dia ndjasha le nde. Onto ako pombaka monga one lahokɛ lutui dimena wonya a wotelawo akambo ndo lakike awui. Nde hakoke monga onto lahendjahendja akambo etena kawotelawo kana latondja weho w’eteketa w’one: “Takahumbi monga la woho wa eongelo ka ngaso” kana one: “Oso eko eongelo ka kolo.” Onto lambokomo demba eko la solo dia wodu lo kene kendana la akoka ande a lo longandji, ndo weho w’eteketa wa dionyo wa ngaso wayoleka kiyanya asolo ande.
One lambokomo demba tofonyaka dioko nde eko engo k’anyanya. (Jona 4:3) Koko nde pombaka mboho dione kene kele ohomba le nde ele woho one wawosa kana wa wena Nzambi. Anto ‘konemiya’ Yeso Kristo, koko dikambo so kokitshakitsha valele nye yele lande lo washo a Nzambi. (Isaya 53:3) Kitshakitsha otema, Nzambi kolangaka oko woho one walangande Onande la ngandji.—Joani 3:16.
Yeso akokaka anto ane waki lo sowa kandji ndo akahembe woho wa mbakimanyiya dia vo mena one weko anto w’ohomba mete. (Mateu 9:36; 11:28-30; 14:14) Nde akate ate: Nzambi atosaka kânga sɔlɛ l’oshinga a wolo, oyadi totshitshe tato kana anyanya ato. “Ndoko otoyi ato atohameka lo washo a Nzambi,” mbakandate. Nde l’ohomba w’efula wahombande mbosa anto ane wahemba dia ntsha lolango lande lee! Yeso akateketa dia dikambo diakiwo ate: “Kanga weondji wa divo dia l’ete anyu wambalema tshe.”—Luka 12:6, 7.
Lo mete kokaka monga wolo le onto one lambokomo demba, lele l’okiyanu w’efula ele ndo la demba dia wodu kame ndo la ahombo amotshi dia nde mbetawo one Nzambi mbowosaka l’oshinga a wolo. Nde kokaka fonya lo lomba lande dione Nzambi hakoke mbowoka ngandji kana kotola yambalo yande oya le nde. Dui dia Nzambi mbeyaka ate: kokaka tokome dia ‘etema aso tânya.’ Ko onde dikambo so kahomba monga l’oshinga a wolo oka? Kema, aha osoku. Nzambi mbeyaka ate anto wele kema kokele kokaka monga la tokanyi ta kolo ndo tena dimotshi voameme kokaka ndjânya. Dio diako diele Dui diande tokeketshaka ate: “Nzambi ndeka etema aso woke. Nde mbeyaka akambo tshe.”—1 Joani 3:19, 20.
Eelo, Sheso la ngandji efula lele l’olongo menaka etale la wedi wa pekato yaso la munga yaso. Nde atodjaka lomba lo kene katotokumiyaka lo weho w’akambo wa ngaso, lo kene tshe kakatashile la mena, lo kene kele laso lateyi w’otema ndo lo kene kalangaso sala. Nde mbeyaka ate: sho takahene pekato, hemo ndo nyoyi, ndo omaloko sho kakema. Dikambo ne diele sho komaka lo nyanga ndo lo tshutshumala menyaka djembetelo y’one sho hatotshe pekato l’okonda ndo sho kema etale efula. Bible lo mbuta ate sho ‘takalembiama lo akambo w’anyanya’ aha la lolango laso. Omaloko mbele Nzambi atodjaka lomba woho wa tôka ketshi dia kolo yaso.—Romo 5:12; 8:20.
Bible toshikikeka ate: “Jéhovah eko kanga ololo ndo lokana ketshi.” “Oko wangani ehotwelo la wodjelo, mbatondotanganyiyaka ehedia aso etale. Ne dia nde mbeyaka oma lo na akatatongama. Nde atohoka ate ditshu mbeso.” (Osambu 103:8, 12, 14, MN) Lo mete, Jéhovah eko “Nzambi k’ekeketshelo tshe, latotokeketshaka lo asui tshe.”—2 Koreto 1:3, 4.
Anto wambokomo alemba nongolaka ekimanyelo kene kahombawo efula lo ndjasukanya la Nzambi kawo kanga ketshi ndo lo mbetawo leeta lande lata dia ‘vo kitsha wotsho awo ladiko diande.’ Nde eko la wolo wa “mbolola otema a wane wambotetshatetshama.” (Osambu 55:22; Isaya 57:15, MN) Dio diako diatokeketsha Dui dia Nzambi dia sho nomba, ata ate: “Nyokitsha ekananu anyu tshe le nde [Jéhovah], ne dia nde atonyokanelaka.” (1 Petero 5:7) Eelo, oma lo ekimanyelo ka dombelo la osengosengo, anto kokaka ndjayasukanya la Nzambi ndo monga la “ki ka Nzambi, koliki yimba tshe.”—Filipi 4:6, 7; Osambu 16:8, 9.
Tshikitanya eongelo ka woho one wasena onto eko ohomba dia tomba oma lo olengolengo w’okomwelo wa demba. Sutshasutsha demba, ndɛ woho wa dimena, mbosa lohelele ndo diomuyelo diakoka, mbewo woho waha tshikala edja la tondo ka televisiɔ dia menda kene keta, weho w’etshelo eso tshe weko ohomba. Womoto omotshi akakimanyiya anto amotshi wakashile la komo alemba lo mbaosa dia têtetaka lawo. Etena kakawotela omotshi lambokomo demba ate: “Hâlange mbetêta,” nde akokadimola la loshilambo tshe ndo l’otema otoyi ate: “Eelo, tayotsho.” Womoto ako akakondola ate: “Taketeta yediko ya kilometele shamalo y’etondo. Lo okalwelo aso, onto ako akalembe, koko nde aki lo ndjaoka dimena. Demba hasandjɔ endaka diatasutshasutshama.”
Koko, tena dimotshi eko wolo kakitona pondjo pondjo l’okomwelo wa demba, oyadi kanga l’okongo wa ntsha la welo akona tshe, kame ndo ndjela ekanga lo lopitadi. Womoto omotshi laki l’enonyi a lateyi ateyi lasa osekaseka l’osombe a womoto akate ate: “Lakahembe sala weho tshe, koko okomwelo wa demba hatshikɛ dihole.” Woho ako wame mbele tena efula eko wolo konola kanga tshungu, kanga lohoke ndo kanga etshumbe. Koko wane wadiene l’okomwelo wa demba kokaka kondja ekeketshelo ndo dikongelo lo mbade Dui dia Nzambi tena tshe, dibuku ne diashikike anto dione mete vo wayotshungo oma lo wa hemo yawo tshe.—Romo 12:12; 15:4.
Etena kayonga ndoko onto layokomo demba too
Etena kakinde lo nimbitshiya weho w’akambo a wolo wakahombe dia ntshama lo nshi y’ekomelo, Yeso akakotsha ate: “Kele lam’ayotatela akambo aso ndja, kanyowalele, kanyedia ete anyu; ne dia etshungwelo kanyu kaya suke.” (Luka 21:28) Yeso aki lo teketa dia otshungwelo waki la dia dihola mboka dia mboto lo andja w’oyoyo wa losembwe waki Nzambi, lema ele “ditongatonga diayotshungwama oma lo lohombo la ehondelo, dia mboto lo ndjadjasela ka lotombo la ana a Nzambi.”—Romo 8:21.
Nde okitshekitshelo w’asolo wayoyala le anto tshe dia vo mbikoma oma la tshina dia eshiko wakiwo lo memba ndo dia memo oseka pindju tshe la tokanyi t’ololo oko lɔwɔkɔ la pesoposo, walokɔlokɔ etema dia ndjasha lo elimu a la yanyi lee! Ndoko onto layotshindja lomba too oma lo okomwelo wa demba. Anto weko l’eshikikelo ka mete dione: Nzambi “ayokitola asoyi tshe lo washo awo, ndo nyoyi honga too; koyanga otanda, koyanga ndjawi, koyanga kandji hayotoyala too. Akambo wa tondo wamboshila.”—Enyelo 22:3, 4.