Bonde kavɔso?
“Ki kekɔ l’akona tshɛ, lo tɔsɔdi t’esongo tshɛ, ndoko ema kahɛnga; tofudu tambolala aha la pasahasa l’esongo: konga yema; kem’edja nto, ndo wɛ lawɔ ayomuya oko diangɔ sɔ tshɛ.”—JOHANN WOLFGANG VON GOETHE, POÈTE ALLEMAND.
1, 2. (a) Anto wakatongama la saki kakɔna? (b) Lɔsɛnɔ la woho akɔna laki l’atshukanyi wa ntondo?
NZAMBI akatonge onto la saki ka wolo ka sɛna pondjo. Mɛtɛ, Bible mbutaka ɔnɛ nde akadje “kanyi ya pundju lu etema awo.” (Undaki 3:11) Koko Nzambi akatshe awui akina efula oleki mbisha anto saki ka sɛna pondjo. Nde akawasha ndo diaaso dia vɔ sɛna pondjo.
2 Ambutshi aso wa ntondo, Adama la Eva, wakatongama kokele, aha l’ɛkɔmɔ lo yimba kânga lo demba. (Euhwelu k’Elembe 32:4) Ohokanyiya—ndoko hemɔ yahakɔnɔki kana kandji kakawokaka, ndoko wɔma wa kɔlɔ kana otshutshumalo! Kɛnɛ koleki ko, Nzambi akâkitsha lo paradiso, ngelo ka dimɛna efula. Nzambi akalange dia onto sɛna pondjo ndo dia l’edjedja a wonya nkɛtɛ ndola la tokanula tande ta kokele. (Etatelu 1:31; 2:15) Ko, bonde kavɔso na?
Ohedia ambela nyɔi
3. Adama la Eva akawahombe ntsha dia monga la lɔsɛnɔ la pondjo?
3 Nzambi akadjangɛ Adama ate: “Olekaki elua w’etamba tshe wa l’ekambo uku alangaye. Keli, tolekaki elua w’uma l’utamba wa ewu k’akambu w’ololo ndu k’akambu wa kolo, ne dia lushi layuyole, we ayuvo.” (Etatelu 2:16, 17) Ɔnkɔnɛ Adama la Eva wakahombe ntsha dikambo dimɔtshi dia vɔ monga la lɔsɛnɔ la pondjo; kitanyiya Nzambi.
4. Lam’akatshe Adama la Eva pɛkato, bonde kakawashisha elongamelo ka sɛna pondjo lo Paradiso?
4 Lonyangu ko, Adama la Eva wakahindola ɔlɛmbɛ wa Nzambi. (Etatelu 3:1-6) Oma l’ohedia awɔ, vɔ wakakome atshi wa pɛkato, nɛ dia “pɛkato ele odiakelo w’ɛlɛmbɛ.” (1 Joani 3:4, NW) Omalɔkɔ, Adama la Eva komonga nto l’elongamelo ka lɔsɛnɔ la pondjo. Lande na na? Nɛ dia ‘difuto dia pɛkato ele nyɔi.’ (Romo 6:23) Ɔnkɔnɛ, lam’akandahembola onongo w’Adama la Eva, Nzambi akate ate: ‘Wɛ ekɔ ditshu, ɔnkɔnɛ wɛ ayokalola otsha lo ditshu.’ Ɔnkɔnɛ ambutshi aso wa ntondo wakatshanyema oma lo Paradiso kawɔ. Oma ko lushi lakawatshe pɛkato, Adama la Eva wakatatɛ lɔkɛndɔ ɔkɔkɛ ɔkɔkɛ otsha lo nyɔi.—Etatelu 3:19, 23, 24.
‘Nyɔi akadiangana le anto tshɛ’
5. Ngande wakadiangana nyɔi le anto wa weho a koho tshɛ y’alemba?
5 Pɛkatɔ k’Adama la Eva kakɔtɔ polo lo dikila. Lâsɔ, takawakoke mbota tokanula ta kokele, oko ahakoke ɛngɔ kaha kokele tondja ɛngɔ ka kokele. (Jobo 14:4) Mɛtɛ, onto tshɛ lôtɔ shikikɛka ɔnɛ ambutshi aso wa ntondo wakashisha demba dia kokele ndo lɔsɛnɔ lawɔ vâmɛ la pondjo kâmɛ ndo l’anawɔ. Ɔpɔstɔlɔ Paulo laki Okristo akafunde ate: ‘Pɛkato akaye l’andja oma le onto ɔtɔi ndo nyɔi oma lo pɛkato, ɔnkɔnɛ nyɔi akadiangana le anto tshɛ nɛ dia anto tshɛ wakatshe pɛkato.’—Romo 5:12; ɛdika la Osambu 51:5.
6. Bonde kavɔso?
6 Ambeyi wa siansɛ wa nshi nyɛ haweye kânga bonde katshunda anto esombe ndo kavɔwɔ. Koko, Bible nembetshiyaka ɔnɛ sho mvɔka nɛ dia tekɔ lo mbotɔ la pɛkato kakatahowɔ oma le ambutshi aso wa ntondo. Ko ngande wayalaso lam’avɔso na?