Woho wa mbishola ɔtɛmwɛlɔ wa mɛtɛ — BIBLIƆTƐKƐ WA LO ƐTƐRNƐTƐ wa Watchtower

Wekelo 10

Woho wa mbishola ɔtɛmwɛlɔ wa mɛtɛ

Naka wɛ nangaka monga ɔngɛnyi wa Nzambi, kete wɛ la dia monga l’ɔtɛmwɛlɔ wetawɔnde. Yeso akate ate ‘atɛmɔdi wa mɛtɛ’ tɛmɔlaka Nzambi lo ‘mɛtɛ.’ (Joani 4:23, 24) Ekɔ paka yoho tshɔi y’ɔlɔlɔ ya tɛmɔlaka Nzambi. (Efeso 4:4-6) Ɔtɛmwɛlɔ wa mɛtɛ tɔlaka onto otsha lo lɔsɛnɔ la pondjo, ndo wa kashi tɔlaka onto otsha l’elanyelo.—Mateu 7:13, 14.

Wɛ koka mbeya ɔtɛmwɛlɔ wa mɛtɛ lo mendaka anto wa lɔkɔ. Lam’ele Jehowa ekɔ ɔlɔlɔ, atɛmɔdi ande wa mɛtɛ la dia monga anto w’ɔlɔlɔ. Oko wele osongo w’ɔlɔlɔ w’elowa watɔtɔka elowa w’ɔlɔlɔ, ndo ɔtɛmwɛlɔ wa mɛtɛ totondjaka anto w’ɔlɔlɔ.—Mateu 7:15-20.

Angɛnyi wa Jehowa mbɔsaka Bible la nɛmɔ di’efula. Vɔ mbeyaka ɔnɛ Bible ndja oma le Nzambi. Vɔ mbetawɔka dia kɛnɛ katatɔ nɔmbɔla nsɛnɔ yawɔ, kandola ekakatanu awɔ, ndo mbakimanyiya dia mbeya awui wa Nzambi. (2 Timote 3:16) Vɔ ntshaka tshɛ dia kamba la kɛnɛ kasambishawɔ anto.

Angɛnyi wa Jehowa mbokanaka ngandji. Yeso akɛnya ngandji kokande anto akina lo mbalakanya awui wa Nzambi ndo lo kɔnɔla ase hemɔ. Ndo wanɛ wele l’ɔtɛmwɛlɔ wa mɛtɛ mbokaka asekawɔ anto ngandji. Oko Yeso, vɔ hawɔnyɔla ase wola kana ase kabila kekina. Yeso akate ate anto wayeya ambeki ande oma lo ngandji kokanawɔ lam’asawɔ.—Joani 1:35.

Angɛnyi wa Nzambi nɛnyaka lokombo lande, lele Jehowa. Naka onto ɔmɔtshi halange keeta lokombo layɛ, onde nde koka monga ɔngɛnyi ayɛ w’oshika? Bu! Naka tekɔ l’ɔngɛnyi, kete sho towetaka lokombo lande ndo hatotɔtɛkɛta kɔlɔ lo lokombo lande la ntondo k’anto akina. Ɔnkɔnɛ, wanɛ walanga monga angɛnyi wa Nzambi la dia kamba la lokombo lande ndo sanyɛ anto akina akambo wendana la nde. Jehowa nangaka sho ntsha ngasɔ.—Mateu 6:9; Romo 10:13, 14.

L’ɛnyɛlɔ ka Yeso, angɛnyi wa Nzambi mbetshaka anto awui wendana la Diolelo dia Nzambi. Diolelo dia Nzambi ekɔ lowandji la l’olongo layokadimola nkɛtɛ kɛnɛ paradiso. Angɛnyi wa Nzambi sambishaka anto akina lokumu l’ɔlɔlɔ lendana la Diolelo dia Nzambi.—Mateu 24:14.

Ɛmɛnyi wa Jehowa ntshaka tshɛ dia monga angɛnyi wa Nzambi. Vɔ mbɔsaka Bible la nɛmɔ ndo mbokanaka ngandji. Vɔ kambaka nto la lokombo la Nzambi ndo lilɛnyaka ndo vɔ mbetshaka anto akina awui wendana la Diolelo dia Nzambi. Ɛlɔ kɛnɛ, Ɛmɛnyi wa Jehowa mbele l’ɔtɛmwɛlɔ wa mɛtɛ lo nkɛtɛ k’otondo.