Tshapita ya Dikumi
Diolelo “Diahalanyemaki Pundju”
1. Kakɔna kɛnya ɔkɔndɔ wa lɔsɛnɔ l’anto ?
AKAMBO wasalema l’andja ɔnɛ lushi tshɛ mɛnyaka hwe di’anto hawotanyi ɔngɛnɔngɛnɔ lam’atonawɔ lowandji laki Jehowa ndo wonawɔ dia vamɛ ndjâlɔmbɔla. Ndoko lowandji l’ana w’anto ɔtɔi lambela anto ɛlɔlɔ aha la shɔnɔdi. Kânga mambohamia anto diewo diawɔ di’akambo wa siansɛ lo yɛdikɔ yahatongaka ndoko lushi, vɔ wambohekɔ dia minya hemɔ ndo kumiya nyɔi, kânga le onto ɔtɔi oto. Mandji y’ana w’anto yambohekɔ dia minya awui w’ata, wa ngala, wa diakatanelo, wa kɔta mishiko, kana wola. Mandji yele la pɛnyɔ yâkatetemala la nɔmbɔla lo wedja efula. (Undaki 8:9) Awui wa tshulatshula, lokaki ndo woho waheye anto akambo ekɔ awui walanya nkɛtɛ, ashi ndo hiɛlɛlɛ. Woho walɔmbɔla ewandji wa lɛɛta awui wa falanga lo yoho ya kɔlɔ ekɔ lo mbisha anto efula pâ dia vɔ ndjakotshɛ ehomba awɔ wa lo lɔsɛnɔ. Ɛnɔnyi nunu wambɔlɔmbɔla ana w’anto amboshikikɛ kɛnɛ kakatama ɔnɛ: “Untu hakendakenda lu mbuka uma lu wulu andi! Lam’atundokendakendaka, ndi ndame heyi nombola ekulu andi.”—Jeremiya 10:23.
2. Naa ɛngɔ ɔtɔi kayokandola ekakatanu w’anto?
2 Ko ngande wakoka dikambo sɔ kandɔma? Ele oma lo tshimbo ya Diolelo diaki Nzambi diaketsha Yeso ambeki ande dia nɔmbaka ɔnɛ: “Diulelu diaye diayi. Lulangu laye latshami la kete uku atshamalo l’ulungu.” (Mateu 6:9, 10) Lo 2 Petero 3:13, Diolelo diaki Nzambi dia l’olongo mbelamɛka ɔnɛ ‘olongo w’oyoyo,’ wayolɛ ‘nkɛtɛ k’oyoyo,’ mbut’ate tshunda di’anto w’ɔlɔlɔ. Diolelo diaki Nzambi dia l’olongo sɔ diekɔ ohomba, diɔ diakɔ diele esambishelo kaki Yeso kakaleke sembɔnɛ paka la dikambo diakɔ. (Mateu 4:17) Nde akɛnya dihole diahomba Diolelo sɔ monga ladiɔ lo nsɛnɔ yaso, lo mbuta ate: “Keli ntundu [nyotetemale la nyanga] diulelu la ololo wa [Nzambi].”—Mateu 6:33.
3. Lande na kele mbeka akambo wendana la Diolelo ekɔ dikambo dioleki ohomba ɛlɔ kɛnɛ na?
3 Mbeka awui wendana la Diolelo diaki Nzambi ekɔ dikambo diahombama salema la shamanya ɛlɔ kɛnɛ, nɛ dia kem’edja Diolelo sɔ diayanga ndanya mandji yalɔmbɔla lanɛ la nkɛtɛ lo pondjo. Danyele 2:44 mbutaka ɔnɛ: “Lu nshi ya khumi ya dikanga yako [mandji yalɔmbɔla nshi nyɛ], [Nzambi] leli l’ulungu ayutundja diulelu [l’olongo] diahalanaki pundju. Dio hadiuyala l’okongo a wudja ukina [ana w’anto hawɔlɔmbɔlaki nkɛtɛ nto pondjo]. Dio diayulanya waulelu ako tshe [wa nshi nyɛ], diayâshila ushiki, ku dio diame diayutshikala pundju.” Lâsɔ Diolelo diayokomiya nshi y’ekomelo nyɛ lo ndanya dikongɛ nɛ di’otondo dia kɔlɔ di’akambo. L’etena kɛsɔ, Diolelo dia l’olongo diayɔlɔmbɔla nkɛtɛ hadiotonga kânga l’ɔndɔshi. Sho pombaka mɛtɛ monga la lowando efula nɛ dia etshungwelo kayanga tela diolelo sɔ kaya kasuke!
4. Lo kɛnɛ kendana la Diolelo, kakɔna kakatombe l’olongo l’ɔnɔnyi 1914 ndo bonde kele dikambo sɔ ohomba le so?
4 L’ɔnɔnyi 1914 T.D., Kristo Yeso akadjama Nkumekanga ndo akalongola lotshungɔ la ‘mbolɛ l’atei w’atunyi ande.’ (Osambu 110:1, 2) Ndo l’ɔnɔnyi ɔsɔ mbakatatɛ “nshi y’ekumelu” ya dikongɛ nɛ di’akambo. (2 Timote 3:1-5, 13) L’etena kakɔ kâmɛ kɛsɔ, akambo wakɛnyi Danyɛlɛ lo ɛnɛlɔ ka prɔfɛsiya wakakotshama mɛtɛ l’olongo. “Tangu Andja,” Jehowa Nzambi, akasha Ɔn’onto, Yeso Kristo, “luwandji, lutumbu, la diulelu dia antu tshe, wedja, la antu w’eteketa tshe ndjala l’okongo andi.” Lam’akandakɔndɔlaka ɛnɛlɔ kakɔ, Danyɛlɛ akafunde ate: “Luwandji landi, leli luwandji la pundju, lahashilaki. La diulelu diandi, hadiulanyemaki pundju.” (Danyele 7:13, 14) Oma l’ekimanyielo ka Diolelo sɔ diambokimɔma l’anya wa Kristo Yeso mbayosha Nzambi wanɛ walanga losembwe diaaso dia vɔ ngɛnangɛna l’akambo w’ɛlɔlɔ waheyama mbadia wakandasangoya lam’akandakitsha ambutshi aso wa ntondo lo Paradiso.
5. Naa awui wendana la Diolelo wele la wahɔ efula le so ndo lande na?
5 Onde wɛ kombolaka monga onto lele la kɔlamelo layɔsɛna l’ɛse k’ɛlɔmbwɛlɔ ka Diolelo sɔ? Naka eelo, kete wɛ ayoyasha tshɛ dia mbeya woho wokongɛmi lowandji lɔsɔ la l’olongo ndo olimu wayolokamba. Wɛ ayonga l’ohomba wa mbeya kɛnɛ kasalalɔ etena kɛnɛ, kɛnɛ kayoyosala lowandji lɔsɔ lo nshi yayaye ndo kɛnɛ kakɔlɔmbalɔ. Naka wɛ sɛdingola awui wendana la Diolelo sɔ la yambalo tshɛ, kete lowando lele layɛ lo dikambo dadiɔ layonga efula. Naka wɛ mbetawɔ ɛlɔmbwɛlɔ kadiɔ, kete wɛ ayoleka monga l’akoka wa mbewoya anto akina akambo wa diambo wayosala Diolelo diaki Nzambi lo dikambo di’anto wele l’okitanyiya.—Osambu 48:12, 13.
Ɛnɔmbɔdi wa Diolelo Diaki Nzambi
6. (a) Lo ndjela, Afundelo lowandji laki onto akɔna lolɛ oma lo tshimbo ya Diolelo diaki Mɛsiya? (b) Awui wekaso lo kɛnɛ kendana la Diolelo pombaka monga la shɛngiya yakɔna le so?
6 Dikambo dimɔtshi dia ntondo diatosholɛ ɔsɛdingwelo wa woho ɔsɔ ele ɔnɛ Diolelo dia Mɛsiya sɔ diekɔ wɛnyɛlɔ wa lowandji laki Jehowa ndamɛmɛ. Jehowa ndamɛ mbakasha Ɔnande “luwandji, lutumbu, la diulelu.” L’ɔkɔngɔ w’Ɔnaki Nzambi nongola wolo wa tatɛ mbolɛ oko Nkumekanga, awui wakokɛma oma l’olongo wata ɔnɛ: “Diulelu dia la kete nye diambuyala dia Khumesu [Jehowa Nzambi], la dia Kristu kandi. Ndi [Jehowa] ayulela pundju pundju.” (Enyelo 11:15) Diakɔ mbele, kɛnɛ tshɛ kɛnaso lo dikambo dia Diolelo sɔ ndo kɛnɛ kasaladiɔ kokaka tosukanya otsha le Jehowa ndamɛ. Kɛnɛ kekaso pombaka tosha nsaki ka kitanyiyaka lowandji lande pondjo pondjo.
7. Lande na ekɔ ohomba efula le so dia Yeso Kristo monga Ɔnɔmbɔdi waki Jehowa wahɔnyi la nde?
7 Tende nto dui nɛ diɛnya dia Jehowa akahenya Yeso Kristo l’okudi oko Ɔnɔmbɔdi wahɔnyi la nde! Oko wende Okambi wa Kɔmba wele Nzambi akakambe la nde dia tonga nkɛtɛ l’anto, Yeso ndeka mbeya ehomba aso oleki onto tshɛ la l’atei aso. Ndo nto, nde akɛnya ‘ngandji k’efula kokande ana w’anto’ oma k’etatelo k’ɔkɔndɔ w’anto. (Tukedi 8:30, 31; Kolosai 1:15-17) Nde aki la ngandji k’efula oya le anto, diɔ diakɔ diakandaye ndamɛ lanɛ la nkɛtɛ ndo kimɔ lɔsɛnɔ lande dikambo di’ɔlɔlɔ aso. (Joani 3:16) Ɔsɔku mbakandatosha diaaso dia tshungɔ oma lo pɛkato la nyɔi ndo dia kondja lɔsɛnɔ la pondjo.—Mateu 20:28.
8. (a) Otshikitanyi la mandji y’ana w’anto, lande na kele lowandji laki Nzambi layotshikala pondjo pondjo? (b) Naa diɔtɔnganelo diele lam’asa ‘ɔhɔmbɔ wa kɔlamelo ndo wa kɛsɔ’ la lowandji la l’olongo?
8 Diolelo diaki Nzambi diekɔ lowandji la shikaa ndo layotshikala pondjo. Mɛtɛ diɔ diayotshikala pondjo nɛ dia Jehowa ndamɛ hakoke mvɔ. (Habakuka 1:12) Otshikitanyi la nkumi ya dikanga y’ana w’anto, Yeso Kristo, lakalongola lowandji oma le Nzambi ekɔ onto lahakoke mvɔ. (Romo 6:9; 1 Timote 6:15, 16) Anto akina wayɔlɔmbɔla kâmɛ la Yeso lo kiti ya l’olongo wayonga anto 144000 wele ekambi waki Nzambi wa kɔlamelo w’oma lo “wauhu tshe ndu w’eteketa tshe, ndu uma lu [wedja] tshe.” Vɔ lawɔ wakalongola lɔsɛnɔ lahawakokaki mvɔ. (Enyelo 5:9, 10; 14:1-4; 1 Koreto 15:42-44, 53) Efula ka l’atei awɔ wamboshilaka la ntshɔ otsha l’olongo, ndo atshikadi wa l’atei awɔ weke lanɛ la nkɛtɛ mbakenga ‘ɔhɔmbɔ wa kɔlamelo ndo wa kɛsɔ,’ watɔla wahɔ wa Diolelo sɔ lanɛ la nkɛtɛ otsha la ntondo la kɔlamelo tshɛ.—Mateu 24:45-47.
9, 10. (a) Naa tɔsɛngiya ta kɔlɔ ndo tadja diatɔnelo tele Diolelo ayoyotinya? (b) Naka sho hatolange koma atunyi wa Diolelo diaki Nzambi, ditshelo diakɔna diahombaso mbewɔ?
9 Kem’edja, l’etena kakandashikikɛ, Jehowa ayotoma alembe ande dia vɔ ndjɛdia nkɛtɛ. Vɔ wayolanya lo pondjo anto watona lowandji lande l’okonda ndo tɛdikɔ toludi la ngandji tɔsande lo tshimbo ya Yeso Kristo. (2 Tesanolika 1:6-9) Ɔsɔ ayoyala lushi la Jehowa, etena kamondokongɛ aya edja efula dia Lowandji lande la l’Andja w’Otondo nyindjama. ‘Enda! Lushi la Jehowa lwamɛ lekɔ lo ndjaye, lushi la ngala, lushi la nkɛlɛ ndo l’ududu wa wolo dia ndanya atshi wa kɔlɔ tshɛ wa lanɛ la nkɛtɛ.’ (Isaya 13:9) “Lushi lako, layuyala lushi l’ududu, lushi l’ohenyohenyo la asui, lushi la dihandju la elanyelu, lushi la udjima la lutshukutshuku, lushi la wangi la udjima a tshududu.”—Zefaniya 1:15.
10 Ɛtɛmwɛlɔ wa kashi tshɛ, ndo mandji y’anto tshɛ l’alembe awɔ, wanɛ wakalɔmbwamaka oma le owandji wahɛnama wa kɔlɔ w’andja ɔnɛ, wayolanyema lo pondjo. Wanɛ tshɛ wayatambiya l’awui wa l’andja ɔnɛ lo monga la lɔsɛnɔ la lokaki, l’akadikadi kana la mindo wayolanyema. Satana l’ɛdiɛngɛ ande hawokokaki nto monga la diɔtɔnganelo l’anto wodjashi lanɛ la nkɛtɛ, nɛ dia vɔ wayodjama lo difuku di’aha l’ekomelo l’edja k’ɛnɔnyi kinunu. Etena kɛsɔ, Diolelo diaki Nzambi mbayɔlɔmbɔla akambo tshɛ wa lanɛ la nkɛtɛ. Ɔsɔ ayonga mɛtɛ etshungwelo ka woke le anto tshɛ walanga losembwe!—Enyelo 18:21, 24; 19:11-16, 19-21; 20:1, 2.
Woho Wayokotshama Eyango wa Diolelo
11. (a) Ngande wayokotsha Diolelo diaki Mɛsiya sangwelo diaki Jehowa diendana la nkɛtɛ? (b) Ɛlɔmbwɛlɔ ka Diolelo ayosalɛ anto wasɛna lanɛ la nkɛtɛ akambo akɔna l’etena kɛsɔ?
11 Diolelo diaki Mɛsiya diayokotsha sangwelo tshɛ diaki Nzambi di’oma l’etatelo diendana la nkɛtɛ. (Etatelu 1:28; 2:8, 9, 15) Lo nshi nyɛ, anto wambohekɔ dia kotsha sangwelo sɔ. Koko, “kete yayayi” yayonga l’ɛse k’ɛlɔmbwɛlɔ k’Ɔna onto, Yeso Kristo. Anto tshɛ wayoka lam’ayolanya Jehowa andja ɔnɛ w’omusu wayokambaka olimu kâmɛ l’ɛse k’ɛlɔmbwɛlɔ ka Kristo Nkumekanga. Vɔ wayɔngɛnangɛna dia sala kɛnɛ tshɛ kayondowadjangelaka dia nkɛtɛ k’otondo koma paradiso. (Heberu 2:5-9) Anto tshɛ wayongɛnangɛnaka l’olimu w’anya awɔ ndo wayokondja ɛlɔlɔ efula oma l’efula ka diangɔ diayonga lanɛ la nkɛtɛ.—Osambu 72:1, 7, 8, 16-19; Isaya 65:21, 22.
12. Ngande wayokoma anto wele l’ɛse k’ɛlɔmbwɛlɔ ka Diolelo kokele lo timba ndo l’alemba?
12 Lam’akatongama Adama l’Eva, vɔ waki kokele, ndo sangwelo diaki Nzambi aki dia nkɛtɛ ndola l’anawɔ, wele tshɛ la timba ndo l’alemba wa kokele. Sangwelo sɔ diayokotshama lo yoho ya diambo l’ɛlɔmbwɛlɔ ka Diolelo sɔ. Dikambo sɔ nɔmbaka dia minya etombelo tshɛ w’oma lo pɛkato ndo dia kotsha dikambo sɔ Kristo kambaka aha tsho oko Nkumekanga koko nd’oko Ɔlɔmbɛdi wa Lâdiko. La lotutsha tshɛ, nde ayokimanyiya anto wele l’ɛse k’ɛlɔmbwɛlɔ kande wele l’okitanyiya dia kondja ɛlɔlɔ w’oma l’olambo wadimanyiya pɛkato wa lɔsɛnɔ lande l’onto.
13. Naa ɛlɔlɔ wa lo demba wayokondja anto l’ɛlɔmbwɛlɔ ka Diolelo?
13 Lo ɛlɔmbwɛlɔ ka Diolelo, anto wa la nkɛtɛ wayokondja ɛlɔlɔ wa lo demba wa diambo efula. “Ashu w’akanga a tutshungu wayosena, la atui w’akanga a puki wayuka. Akanga a tshumbi wayulimbolimbo uku peli la kanga lumi ayimba esambo.” (Isaya 35:5, 6) Lɔwa la demba lambolana l’ɔtɛ wa lotshundu l’osombe kana hemɔ layokoma ashashi ato oleki ndo lɔnɛ l’ɔna dikɛnda ndo hemɔ ya wolo yahakɔnɔ esadi hayotonga koko anto wayonga paka l’alemba w’amɛna ato. “Ku dimba di’untu ako diayuyala ashashi uku akindi lu nshi yandi y’olongo a pami.” (Jobo 33:25) Lushi layoyala lele ndoko onto layonga l’ɔkɔkɔ wa mbuta ate: “dimi la kandji!” Lande na? Nɛ dia anto woka Nzambi wɔma wayotshungɔ oma lo lɔhɔmbɔ la pɛkato ndo oma l’etombelo wa kɔlɔ efula w’oma lɔkɔ. (Isaya 33:24; Luka 13:11-13) Eelo, Nzambi “ayukitula asoi tshe lu ashu awo nyoi hayuyala ntu, delu hadiuyuyala ntu, kuyanga ndjawi, kuyanga kandji. Akambu wa ntundu wambushila.”—Enyelo 21:4.
14. Koma kokele ayolembetshiya dikambo diakɔna?
14 Koko koma kokele, halembetshiya tsho monga la demba ndo la yimba ya dimɛna. Koko, dui sɔ nembetshiyaka nto kɛnɛmɔla waonga wa Jehowa, nɛ dia takatongama l’‘efanelo ka Nzambi, dia fɔna la nde.’ (Etatelu 1:26) Dia dikambo sɔ kotshama, anto wayohomba kondja wetshelo w’efula. L’andja w’oyoyo ‘losembwe pombaka monga.’ Ɔnkɔnɛ, oko wakadite Isaya, ‘anto wa lo nkɛtɛ k’otondo wayeka mɛtɛ awui wa losembwe.’ (2 Petero 3:13; Isaya 26:9) Dionga sɔ mbidjaka wɔladi lam’asa anto wa weho wa nkoho tshɛ, angɛnyi w’eshika, ase nkumbo ndo kɛnɛ koleki tshɛ ele diɔ mbidjaka wɔladi ndo lam’asaso la Nzambi ndamɛmɛ. (Osambu 85:10-13; Isaya 32:17) Wanɛ weka losembwe wayotetshamaka yema yema dia mbeya lolango laki Nzambi lo dikambo diawɔ. Lam’ayowonga la ngandji k’efula ka Jehowa l’etema awɔ, vɔ wayoyela adjango ande ndo mboka yande l’akambo tshɛ wa lo nsɛnɔ yawɔ. Vɔ wayonga l’akoka wa mbuta oko wakate Yeso ate: ‘Dimi latosalaka nshi tshɛ kɛnɛ kangɛnyangɛnya Papa.’ (Joani 8:29) Lɔsɛnɔ layonga mɛtɛ ɔngɛnɔngɛnɔ efula etena kayosalaka anto tshɛ dikambo sɔ!
Ekotshamelo Wamboshila Mɛnama
15. Lo kamba la wembola wa l’odingɔ ɔnɛ, shila akambo wambosala Diolelo ndo ɛnya kɛnɛ kahombaso salaka ɛlɔ kɛnɛ.
15 Akambo wa diambo wambosala Diolelo diaki Nzambi ndo anto wele l’ɛse kadiɔ wekɔ lo mɛnama hwe. Wembola ndo avɛsa wayela anɛ wayokohola akambo amɔtshi wa l’atei awɔ, mbidja nd’akambo wakoka ndo wahomba anto wele l’ɛse ka Diolelo sɔ salaka oma ko kakianɛ.
Diolelo diakalɔshana ntondo l’anto akɔna, ndo etombelo akɔna wakonge? (Enyelo 12:7-10, 12)
Otshumanyelo w’atshikadi wa l’olui akɔna wasalema tatɛ lam’akahema Kristo l’okudi? (Enyelo 14:1-3)
Naa olimu wakate Yeso dia nde ayokamba l’ɔkɔngɔ wa fɔnu ka woke, oko wɔkɔndwamidiɔ lo Mateu 25:1-33?
La ntondo k’olimu ɔsɔ, olimu akɔna wasalema ɛlɔ kɛnɛ? Waa na wakamba olimu akɔ? (Osambu 110:3; Mateu 24:14; Enyelo 14:6, 7)
Lande na kambohekɔ atunyi aso w’ase pɔlitikɛ la w’ɛtɛmwɛlɔ dia memadja olimu w’esambishelo na? (Zekariya 4:6; Etsha 5:38, 39)
Etshikitanu akɔna wasalema lo nsɛnɔ ya wanɛ wetawɔ monga l’ɛse k’ɛlɔmbwɛlɔ ka Diolelo na? (Isaya 2:4; 1 Koreto 6:9-11)
Diolelo di’Ɛnɔnyi Kinunu
16. (a) Kristo ayolɛ ɛnɔnyi engana? (b) Naa akambo wa diambo wayosalema l’etena kɛsɔ ndo l’ɔkɔngɔ w’etena kakɔ?
16 L’ɔkɔngɔ wa Satana l’ɛdiɛngɛ ande mbikadjema lo difuku di’aha l’ekomelo, Yeso Kristo nde l’anto ande 144000 wayɔlɔmbɔla oko nkumi ya dikanga ndo ɛlɔmbɛdi l’edja k’ɛnɔnyi kinunu. (Enyelo 20:6) L’etena kɛsɔ, anto wayokoma kokele ndo pɛkato la nyɔi k’oma le Adama kayonyɛma lo pondjo. L’ekomelo k’Ɛlɔmbwɛlɔ k’Ɛnɔnyi Kinunu kɛsɔ, l’ɔkɔngɔ wa nde kotsha ɔkɛndɛ ande dimɛna oko Mɛsiya Nkumekanga ndo Ɔlɔmbɛdi, Yeso ‘ayokimɔ Diolelo’ l’anya wa She, “dia [Nzambi] ayali la diko dia diango tshe, la lu diango tshe.” (1 Koreto 15:24-28) Oma lâsɔ, wayotshungola Satana lo tshanda ya tshitshɛ dia nde pemba anto wambotshungɔ dia menda kana wayosukɛ lowandji laki Jehowa la l’andja w’otondo. L’ɔkɔngɔ w’ohemba ɔsɔ w’ekomelo, Jehowa ayolanya pondjo Satana nde l’atɔmbɔki wakete la nde wedi. (Enyelo 20:7-10) Wanɛ wasukɛ lowandji laki Jehowa, mbut’ate lotshungɔ lele lande la mbolɛ, wayɛnya kɔlamelo yawɔ ya shikaa. Oma lâsɔ, vɔ wayonga la diɔtɔnganelo di’ɔlɔlɔ lam’asawɔ la Jehowa ndo mbetawɔma oma le nde oko anande w’apami la wa wamato wakoka nongola lɔsɛnɔ la pondjo oma le Nzambi.—Romo 8:21.
17. (a) Kakɔna kayokomɛ Diolelo l’ekomelo k’ɛnɔnyi kinunu? (b) Lo woho akɔna wele ekɔ mɛtɛ dia Diolelo ‘hadiolanyemaki pondjo’?
17 Ɔnkɔnɛ, ɔkɛndɛ waki Yeso ndo w’anto 144000 wayotshikitana lo kɛnɛ kendana la nkɛtɛ. Olimu akɔna wayowosala oma lâsɔ na? Bible hatotɛ. Koko naka sho sukɛ lowandji laki Jehowa la kɔlamelo tshɛ, kete tayonga la lɔsɛnɔ l’ekomelo k’Ɛlɔmbwɛlɔ k’Ɛnɔnyi Kinunu dia mɛna kɛnɛ kakasangoya Jehowa dikambo diaso ndo dikambo di’andja ande wa diambo ɔnɛ. Koko, lowandji la Kristo l’ɛnɔnyi kinunu layoyala lowandji “la pundju” ndo Diolelo diande “hadiulanyemaki pundju.” (Danyele 7:14) Lo yoho yakɔna na? Lo yoho nyɛ yele lowandji lakɔ halotoshama l’anya w’anto akina wele l’eyango wotshikitanyi lam’ele Jehowa mbayonga Omboledi. Ndo nto, Diolelo sɔ ‘hadiolanyemaki pondjo’ nɛ di’akambo wayodiosala wayotshikala pondjo pondjo. (Danyele 2:44) Ndo Mɛsiya Nkumekanga ndo Ɔlɔmbɛdi nde la nkumi ya dikanga ndo ɛlɔmbɛdi wayonga la nde wayɔlɛmiyama lo pondjo l’ɔtɛ w’olimu awɔ wa kɔlamelo otsha le Jehowa.
Ovuswelo
• Lande na kele paka Diolelo dia Nzambi to mbayokandola ekakatanu w’anto na? Etena kakɔna kakamɛ Nkumekanga ka Diolelo diaki Nzambi mbolɛ?
• Kakɔna kaleka kotola yambalo yayɛ lo dikambo dia Diolelo diaki Nzambi ndo kakɔna kayodiosala na?
• Akambo akɔna wambosala Diolelo wakokaso mɛna, ndo kakɔna kasalaso dia mbisha lonya l’ekotshamelo k’akambo asɔ?
[Osato wa lo lɛkɛ 92, 93]
Lo Diolelo diaki Nzambi, anto tshɛ wayeka losembwe