Tshapita ya Dikumi L’Asato
Olui a Woke w’Anto la Ntondo ka Kiti ka Diolelo ka Jehowa
1. (a) La ntondo k’ekambi waki Nzambi wakasɛnaka la ntondo ka Kristo kana anto 144 000 ndjolongola difuto diawɔ, kakɔna kahomba mbakomɛ? (b) Kakɔna kakoka komɛ “ului a wuki” w’anto wasɛna l’etena kɛnɛ?
EKAMBI waki Nzambi wa kɔlamelo tatɛ oma le Abɛlɛ polo ndo le Joani Obatizanyi wakadje osalelo wa lolango laki Nzambi lo dihole dia ntondo lo nsɛnɔ yawɔ. Koko, vɔ tshɛ wakavu ndo wekɔ lo kongɛ eolwelo dia ndjɔsɛna lanɛ la nkɛtɛ l’andja w’oyoyo waki Nzambi. Anto 144 000 wayolɛ la Kristo lo Diolelo diaki Nzambi dia l’olongo pombaka vɔ lawɔ mvɔ la ntondo ka vɔ ndjokoka nongola difuto diawɔ. Koko, Enyelo 7:9 mɛnyaka dia lo nshi y’ekomelo nyɛ ayonga “ului a wuki” w’anto w’oma lo wedja tshɛ wele hawotovɔ, koko wayonga l’elongamelo ka sɛna pondjo pondjo lanɛ la nkɛtɛ. Onde wɛ ekɔ l’atei awɔ?
Woho wa Mbeya Olui a Woke
2. Kakɔna kakayokonya dia sho ndjonga la eokelo ka dimɛna lo kɛnɛ kendana l’olui a woke watɛkɛtawɔ l’Enyelo 7:9?
2 L’ɔnɔnyi 1923, ekambi waki Jehowa wakashihodia dia “ekoko” watawɔ lo wɛla wa Yeso wa lo Mateu 25:31-46 ndo “ekoko ekina” wakandatɛkɛta dikambo diawɔ lo Joani 10:16 ekɔ anto wayonga la diɛsɛ dia nsɛna pondjo pondjo lanɛ la nkɛtɛ. L’ɔnɔnyi 1931, wanɛ watɛkɛtawɔ dikambo diawɔ l’Ezekiyele 9:1-11 oko anto wadjama djembetelo lo fumu yawɔ wakɛnama vɔ lawɔ dia wekɔ l’elongamelo ka nsɛna lanɛ la nkɛtɛ. Koko l’ɔkɔngɔ, mbut’ate l’ɔnɔnyi 1935, akayeyamaka dia olui a woke wekɔ l’atei w’ɛkɔkɔ ekina wakatɛkɛta Yeso dikambo diawɔ. Ɛlɔ kɛnɛ, olui ɔsɔ wa woke wele la diɛsɛ di’efula waya miliyɔ y’anto.
3. Lande na kele etelo k’ɔnɛ ‘memala la ntondo ka kiti ka diolelo’ hendana l’olui w’anto wayotshɔ l’olongo?
3 L’Enyelo 7:9, olui a woke hawɛnama dia wekɔ l’olongo. Woho ‘wemadiwɔ la ntondo ka kiti’ ka Nzambi halɔmbɛ dia paka vɔ monga l’olongo. Vɔ wekɔ lo mɛnama tsho lo washo wa Nzambi. (Osambu 11:4) Woho ɔnɛ wele olui a woke “waheyama mbala” kema olui wa l’olongo mɛnamaka naka sho mbɛdika lofulo lawɔ laheyama shikaa la lofulo lofundami l’Enyelo 7:4-8 ndo l’Enyelo 14:1-4. Lo avɛsa anɛ, lofulo la wanɛ wayɔsama oma lanɛ la nkɛtɛ otsha l’olongo lekɔ anto 144 000.
4. (a) Naa “fono ka wulu” kayohandɔ olui a woke oma lɔkɔ? (b) Oko wotamidiɔ l’Enyelo 7:11, 12, waa na wasɛdingola olui a woke ɔsɔ ndo watɛmɔla la wɔ kamɛ?
4 Enyelo 7:14 mbutaka lo kɛnɛ kendana l’olui a woke ɔnɛ: “Vo weli wane wambuya uma lu pa ka wuki.” Vɔ wayoka oma lo fɔnu ka woke kahatongaka ndoko lushi l’ɔkɔndɔ w’anto. (Mateu 24:21) Etena kayowɛnya la lowando tshɛ dia panda kawɔ ndja oma le Nzambi ndo oma le Kristo, ditongami tshɛ dia kɔlamelo dia l’olongo diayosanganya awui kamɛ la wɔ lo mbuta ɔnɛ: “Ayali osoku! Otshoko, la lutumbu, la yimba, la lusaka, la kenemo la wulu, la diulelu, wayali le [“Nzambi kaso,” NW] pundju pundju! Ayali osoku!”—Enyelo 7:11, 12.
Vɔ Kokaka dia Shimbamɛ
5. Ngande wakokaso shikikɛ kɛnɛ kalɔmbama dia monga l’atei w’olui a woke?
5 Woho wayohandɔ olui a woke oma lo fɔnu ka woke mbɔtɔnɛka l’ɛlɛmbɛ wosembwe waki Jehowa. Waonga wa wanɛ wayotshungɔ mɛnyama hwe lo Bible. Lâsɔ, wanɛ walanga akambo wa losembwe kokaka kakianɛ sala akambo l’oyango wa mɛnya dia vɔ sunganaka shimbamɛ. Kakɔna kahomba anto asɔ sala na?
6. Lande na kakoka mɛtɛ olui a woke mbɛdikama l’ɛkɔkɔ na?
6 Ɛkɔkɔ wekɔ la wɔlamu ndo l’okitanyiya. Ɔnkɔnɛ, lam’akate Yeso dia nde aki l’ɛkɔkɔ ekina waki komonga l’atei w’olui wahomba tshɔ l’olongo, nde akatɛkɛtaka di’anto wele aha tsho wayolanga dia nsɛna pondjo pondjo lanɛ la nkɛtɛ koko wanɛ wayonga ndo l’okitanyiya lo wetshelo ande. Nde akate ate: “Ekoko ami watukaka diui diami. Dimi mbaeyaka, vo watundjelaka.” (Joani 10:16, 27) Wasɔ wekɔ anto wahokamɛ ndo wakitanyiya mɛtɛ kɛnɛ kata Yeso ndo wakoma ambeki ande.
7. Waonga akɔna wahomba ambeki wa Yeso monga la wɔ?
7 Naa waonga akina wahomba ambeki wa Yeso asɔ tshɛ kɛnɛmɔla? Ɔtɛkɛta wa Nzambi kadimolaka ɔnɛ: “Nyunya ditshelu dia wuhu anyu wa ntundu, untu edjedja, . . . nyolote untu uyuyu, lakatungama lu ololo la ekila ka mete le [Nzambi].” (Efeso 4:22-24) Vɔ salaka dia monga la waonga wakimanyiya di’ekambi waki Nzambi monga kâmɛ oko “ngandji, ongenongeno, ki, ndjakimela, ketshi, ololo, kolamelu, memakana, ndjaenda.”—Ngalatiya 5:22, 23.
8. Kakɔna kayohomana l’olui a woke lam’asukɛwɔ Akristo w’atshikadi?
8 Olui a woke wekɔ lo sukɛ djui ya tshitshɛ ya wanɛ wele l’elongamelo k’otsha l’olongo walɔmbɔla olimu w’esambishelo. (Mateu 24:14; 25:40) Ɛkɔkɔ ekina wekɔ lo mbisha osukɔ ɔsɔ, kânga mbeyawɔ dia wayɔhɛnyahɛnyama nɛ dia l’etatelo ka nshi y’ekomelo nyɛ, Kristo Yeso ndo andjelo ande wakakasha Satana nde l’ɛdiɛngɛ ande oma l’olongo. Diakɔ diata Bible ɔnɛ “fono kayuyala la kete . . . , ne dia uhimbanyi akayi le nyu. Ndi eko la kele ka wuki; ndi mbeyaka ati: Etena [kande] kambusukana.” (Enyelo 12:7-12) Ɔnkɔnɛ, lam’ataleke sukana ekomelo k’andja ɔnɛ mbataleke Satana pɛnyahɛnya ekambi waki Nzambi.
9. Ngande wambokondja ekambi waki Nzambi etombelo w’ɔlɔlɔ l’esambishelo ka lokumu l’ɔlɔlɔ, ndo lande na?
9 Kânga mbele ɛhɛnyɔhɛnyɔ wa wolo, olimu w’esambishelo wekɔ lo tatetemala ntshɔ otsha la ntondo. Oma lo nunu dingana to di’esambisha wa Diolelo waki l’ekomelo ka Ta dia Hende di’Andja w’Otondo, taya kakianɛ miliyɔ, nɛ dia Jehowa akalake ate: “Ehumo tshe kambutshulama dia ndo la ye huluwana.” (Isaya 54:17) Kânga onto ɔmɔtshi la lo tuminadi ta woke ta la Juda aketawɔ di’olimu wa Nzambi hawokoke memala pondjo. Nde akatɛ Afarisɛ wa lo ntambe ka ntondo lo kɛnɛ kendana l’ambeki ate: “Nyangani uma le antu ane, nyuwaete. Naka dikambu ne kana ulimu one weko uma le antu, ayuyala anyanya. Keli naka dio dieli uma le [Nzambi], nyu hanyeyi mbalembia: nyutukuyala uku wane walosha [Nzambi] ta.”—Etsha 5:38, 39.
10. (a) Kakɔna kalembetshiya “djimbitelu” yalongola wanɛ wakenga olui a woke? (b) Ngande wakitanyiya ekambi waki Nzambi ‘dui di’oma l’olongo’?
10 Anto wele l’olui a woke mɛnyamaka oko anto wambodjama djembetelo dikambo dia panda. (Ezekiyele 9:4-6) “Djimbitelu” shɔ mɛnyaka dia vɔ wamboyakimɔ le Jehowa, wambobatizama oko ambeki wa Yeso, ndo wekɔ lo sala la wolo dia monga la lonto lele oko laki Kristo. Vɔ kitanyiyaka ‘dui di’oma l’olongo’ diata lo kɛnɛ kendana la tshunda di’ɛtɛmwɛlɔ wa kashi dia l’andja w’otondo diaki Satana ɔnɛ: “Antu ami, nyutumbi uma l’atei ato, nyutukuyoto lu kolo yato, ndu nyutukulungula asui ato.”—Enyelo 18:1-5.
11. Lo yoho yakɔna y’ohomba efula yɛnya anto wa l’olui a woke dia vɔ wekɔ ekambi waki Jehowa?
11 Yeso akatɛ ambeki ande nto ate: “Uma lu dikambu ne, antu tshe wayeya vati: Ambeki ami mbenyu, naka nyu nyayukana ngandji.” (Joani 13:35) Koko, anto wa l’ɛtɛmwɛlɔ wa l’andja ɔnɛ ndjakanaka lam’asawɔ l’ata paka nɛ dia vɔ kema wodja ɔtɔi! Ɔtɛkɛta wa Nzambi mbutaka ɔnɛ: “Dia dikambu ne, ana wa [Nzambi] la ana wa uhimbanyi wateyamaka. Untu lahatshi ololo, kema untu a [Nzambi], ndu lahalangi unyandi. . . . Dieli la su dia mbukana ngandji. Tanyuyalaki uku Kena, kanga kolo, lakadiaki onangu.”—1 Joani 3:10-12.
12. Lo fɔnu ka woke, ngande wayosala Jehowa nde l’ɛtɛmwɛlɔ wele oko ‘etamba’ wahatɔ elowa w’ɔlɔlɔ?
12 Yeso akate ate: “Okone utamba tshe w’ololo atotokaka elua w’ololo. Keli utamba wa kolo atotokaka elua wa kolo. Utamba w’ololo heyi nto elua wa kolo, kana utamba wa kolo nto elua w’ololo. Utamba tshe wahato elua w’ololo, ayokotama, ayukadjema lu dja. Okone nyu nyayâlimbitela uma l’elua awo.” (Mateu 7:17-20) Elowa watɔ ɛtɛmwɛlɔ wa l’andja ɔnɛ mɛnyaka dia vɔ wekɔ ‘etamba’ wa kɔlɔ wayanga nanyema kem’edja oma le Jehowa lo fɔnu ka woke.—Enyelo 17:16.
13. Ngande wɛnya olui a woke dia vɔ ‘memala kâmɛ la ntondo ka kiti ka diolelo’ ka Jehowa?
13 Enyelo 7:9-15 kotolaka yambalo yaso l’akambo wayokonya olui a woke dia shimbamɛ. Vɔ mbaɛnyaka ‘wemadi kâmɛ la ntondo ka kiti ka diolelo’ ka Jehowa, wasukɛ lowandji lande la l’andja w’otondo. Vɔ ‘wakɔ̂tsha ekutu awɔ ndo wakawaetɛ wɛma fifɔ lo dikila dia Ɔn’ɔkɔkɔ,’ dia mɛnya ɔnɛ vɔ mbetawɔka olambo wa Yeso wɛdia anto oma lo pɛkato. (Joani 1:29) Vɔ wakayakimɔ vamɛ le Nzambi ndo wakɛnya dikambo sɔ lo dindjama la tshondo l’ashi. Ɔnkɔnɛ woho wewɔ pudipudi la ntondo ka Nzambi, ɔsɔ mbele didjidji di’ekutu a wɛma, ndo wekɔ lo mbokambɛ ‘olimu w’ekila la yanyi ndo l’otsho.’ Onde ekɔ toho tɔmɔtshi takokayɛ nyomɔtɔnganyiya lɔsɛnɔ layɛ la kɛnɛ kotami lanɛ?
Ɛlɔlɔ Wakondjawɔ Nshi Nyɛ
14. Naa ɛlɔlɔ ɛmɔtshi wa lânde wakondja ekambi waki Jehowa tatɛ oma ko kakianɛ?
14 Ondo wɛ amboshila mɛna ɛlɔlɔ wa lânde wakondja wanɛ wakambɛ Jehowa tatɛ oma ko kakianɛ. Ɛnyɛlɔ, lam’akayeke akambo wendana l’asangwelo waki Jehowa wosembwe, wɛ akashihodia di’elongamelo ka dimɛna efula kekɔ la ntondo. Ɛlɔ kɛnɛ, wɛ aya l’oyango wa dimɛna lo lɔsɛnɔ, oyango wa kambɛ Nzambi ka mɛtɛ l’elongamelo k’ɔngɛnɔngɛnɔ efula ka lɔsɛnɔ la pondjo lo paradiso ka lanɛ la nkɛtɛ. Eelo, Nkumekanga Yeso Kristo “ay[ɔ]lombola [olui a woke] utsha la teko di’ashi a lumu.”—Enyelo 7:17.
15. Ɛlɔlɔ akɔna wakondja Ɛmɛnyi wa Jehowa lo nama atɔndɔ wa lo Bible wendana l’awui wa pɔlitikɛ ndo wendana la lɔkɛwɔ?
15 Ɛlɔlɔ wa diambo efula wambokondja olui a woke ele ngandji, kâmɛ, ndo diɔtɔnganelo diele l’atei w’ekambi waki Jehowa wa lo nkɛtɛ k’otondo. Lam’ele sho tshɛ tekɔ lo ndeshama ma diakɔ diamɛ dia lo nyuma, sho tshɛ kitanyiyaka ɛlɛmbɛ ndo atɔndɔ akɔ wamɛ wele l’Ɔtɛkɛta wa Nzambi. Diakɔ diele awui wa pɔlitikɛ kana tokanyi takɛnɛmɔla ngandji ka wodja hawotokakitola. Ndo nto, sho kitanyiyaka ɛlɛmbɛ wa lâdiko wendana la lɔkɛwɔ l’ɔlɔlɔ lalɔmba Nzambi ekambi ande. (1 Koreto 6:9-11) Diakɔ diele ekambi waki Jehowa wekɔ la kɛnɛ kakokaso mbelɛ ɔnɛ paradiso ka lo nyuma nɛ dia vɔ hawɔtɔ l’awui w’ata, w’ewanu ndo hawoyakimɔ l’awui wa mindo wambokokanɛ l’andja ɔnɛ. Enda woho wɔtɛkɛtshiwɔ awui asɔ l’Isaya 65:13, 14.
16. Kânga mbahomanawɔ l’ekakatanu wakomɛ anto tshɛ lo lɔsɛnɔ, olui a woke wekɔ l’elongamelo kakɔna?
16 Ekambi waki Jehowa kema kokele. Ekakatanu wa lo lɔsɛnɔ wakomɛ anto tshɛ l’andja ɔnɛ, ɛnyɛlɔ lɔsɛnɔ la wolo, mpokoso y’oma l’ata walɔshana wedja mbakomɛka ndo vɔ. Vɔ lawɔ tataka hemɔ, pomanaka l’ɛhɛnyɔhɛnyɔ ndo nyɔi. Koko vɔ wekɔ la mbetawɔ ɔnɛ l’andja w’oyoyo, Nzambi “ayukitula asoi tshe lu ashu awo; nyoi hayuyala ntu, delu hadiuyuyala ntu, kuyanga ndjawi, kuyanga kandji.”—Enyelo 21:4.
17. Oyadi kakɔna kakoka tokomɛ ɛlɔ kɛnɛ, naa nshi yayaye ya diambo efula yambowombɛ wanɛ watɛmɔla Nzambi ka mɛtɛ?
17 Oyadi kânga wɛ ayoshisha lɔsɛnɔ layɛ ɛlɔ kɛnɛ l’ɔtɛ wa lotshundu l’osombe, hemɔ, aksida, kana ɛhɛnyɔhɛnyɔ, Jehowa ayokôlola oya lo lɔsɛnɔ lo Paradiso. (Etsha 24:15) Ɔnkɔnɛ, wɛ ayotetemala ngɛnangɛna la dambo dia lo nyuma lo Ɛlɔmbwɛlɔ k’Ɛnɔnyi Kinunu kaki Kristo. Ngandji kokayɛ Nzambi kayotatetemalaka fula lam’ayotɛnaka woho watakotshama asangwelo ande lo yoho ya diambo efula. Ndo ɛtshɔkɔ wa lo demba wayosha Jehowa anto ayoleka fudia ngandji kayɛ otsha le nde. (Isaya 25:6-9) Elongamelo ka diambo efula kekɔ lo kongɛ mɛtɛ ekambi waki Nzambi!
Ovuswelo
• Bible kakatanyaka olui a woke la dikambo diakɔna dia diambo?
• Naka sho nangaka monga l’atei w’olui a woke wele la diɛsɛ di’efula oma le Nzambi, ahombaso sala oma ko kakianɛ?
• Onde ɛtshɔkɔ wakondja olui a woke ɛlɔ kɛnɛ ndo wayowokondja l’andja w’oyoyo waki Nzambi wekɔ ohomba efula le yɛ?
[Osato wa lo lɛkɛ 123]
Miliyɔ ya wanɛ wakenga olui a woke wekɔ lo tɛmɔla Nzambi ka mɛtɛ lo kâmɛ