Etenyi 9
Ɔtɛmwɛlɔ wa Mɛtɛ Koka Kosha Ɛlɔlɔ wa Pondjo!
1. Kakɔna kayotokomɛ naka sho ‘ndjasukanya otsha le Nzambi’?
JEHOWA nangaka wanɛ wokambɛ. Naka wɛ tɛmɔla Jehowa, kete nde ayokɔtshɔkɔla oma ko kakianɛ ndo lo nshi yayaye. Bible mbutaka ɔnɛ: “Nyusukani le [Nzambi], ku ndi ayusukana le nyu.”—Jakoba 4:8.
2. Ngande wakokaso ndjasukanya otsha le Nzambi ndo shɛngiya yakɔna yayonga la dikambo sɔ l’alɔmbɛlɔ aso?
2 Dia ndjasukanya otsha le Nzambi, wɛ pombaka mbeka Ɔtɛkɛta ande ndo kamba la wɔ. Naka alɔmbɛlɔ ayɛ mbɔtɔnɛ la lolango la Jehowa, kete nde ayowahokamɛ ndo ayowakadimola. Ɔpɔstɔlɔ Joani akafunde ate: “Dihunga ne mbeli la su le ndi shati: Naka shu tayolomba engo uku lulangu landi, ndi ayutukela. Naka shu tambeya shati: Ndi atutukelaka lu kene katutôlombaka, shu mbeyaka shati: Shu tambulungula kene kakatalombe.”—1 Joani 5:14, 15.
3-7. Ngande wakokaso kondja lomba laki Nzambi, ndo ngande wakokalɔ tokimanyiya?
3 Lâdiko wa lâsɔ, naka wɛ ndjasukanya otsha le Nzambi, kete nde ayokosha lomba la mbeya ndɔshana l’ekakatanu wa lo lɔsɛnɔ la lushi la lushi. Bible mbutaka ɔnɛ: “Naka omotshi ambuhumba yimba, ndi alombe Nzambi.”—Jakoba 1:5.
4 Ngande wakoka lomba laki Nzambi kokimanyiya? Ntondotondo, lɔ koka kokimanyiya dia wɛ mbeya akambo wahangɛnyangɛnya Jehowa. Wɛ koka mbeya nto lande na kele akambo asɔ kɔlɔ ndo kɛnɛ kakokayɛ sala dia mbewɔ sala akambo akɔ. Ewo kɛsɔ koka kokokɛ oma l’efula k’ekakatanu wɛnya anto efula pâ. Ɛnyɛlɔ, kitanyiya dako diaki Nzambi diata dia monga la lɔkɛwɔ la pudipudi kimanyiyaka ndo kokɛka ekambi ande oma lo waemi waha la lolango, hemɔ y’oma l’awui wa dieyanelo, ndo awala wele bu l’ɔngɛnɔngɛnɔ kana ohandjwelo awɔ.
5 Kakɔna kakoka lomba l’oma le Nzambi kosalɛ nto na? Lɔ koka kokimanyiya dia wɛ kondja wahɔ w’efula oma lo lɔsɛnɔ. Lɔ koka kokimanyiya dia mbɔsa tɛdikɔ t’amɛna l’akambo w’ohomba, ɛnyɛlɔ woho wa kamba l’akuta ayɛ. Wɛ ayonga l’akoka wa ndjadjɛ eyango w’eshika ndo wa tona eyango wele la nɛmɔ diahaviya.
6 Lomba laki Nzambi koka kokimanyiya nto lo diɔtɔnganelo diasayɛ l’anto akina. Wɛ koka monga la lɔsɛnɔ la nkumbo l’ɔngɛnɔngɛnɔ efula. Wɛ koka monga la lɔngɛnyi latshikala edja ndo l’oshika wɛ l’anto akina ndo wɛ nɛnyama kânga oma le wanɛ wahakambɛ Nzambi.
7 Ladiko wa lâsɔ, monga la lomba laki Nzambi ayokokimanyiya dia ndowanya kanyi yayɛ lo kɛnɛ kendana la lɔsɛnɔ. Lɔ layokokimanyiya dia ndɔshana dimɛna l’ekakatanu ndo l’ekiyanu wa lo lɔsɛnɔ. Ndo nto, wɛ ayonga la wɛdimo ndo la kanyi y’ɔlɔlɔ lo kɛnɛ kendana la nshi yayaye. Kanyi y’ɔlɔlɔ lo wedi ayɔ, ayokimanyiya dia wɛ monga la yônge ya dimɛna oyadi lo demba kana lo yimba.—Tukedi 14:30; Isaya 48:17.
8. Naka wɛ ekɔ lo kambɛ Nzambi, kakɔna kahayatoka wɔma na?
8 Naka wɛ kambɛ Nzambi ka mɛtɛ, kete wɛ ayotshungɔ oma l’akambo wa wɔma wakiyanya wanɛ wahokambɛ. Lam’ele wɛ mbeyaka dia edo bu la lɔsɛnɔ lo diombo, wɛ howaoka wɔma. Lam’ele wɛ ekɔ la wɛkamu lo daka diaki Nzambi dia mbolola wanɛ wakavu, wɛ hoka nyɔi wɔma. Ndo lam’ele wɛ mbeyaka dia Nzambi ekɔ kanga nkudu tshɛ, wɛ hoka wetshi kana kanga dɔka wɔma.—Joani 8:32.
Anto w’Ɔlɔlɔ Wayokita Nkɛtɛ
9-11. Waa na wayɔsɛna lo Paradiso ndo waa na wahatɔsɛna lɔkɔ?
9 Naka wɛ ndjasukanya otsha le Nzambi, kete wɛ hoka nshi yayaye wɔma. Oko wakatadiɛnyi, Bible akatatɛkɛtshi dikambo di’ekakatanu w’efula wɛnaso ɛlɔ kɛnɛ. Jehowa totɛka di’ekakatanu ɛnɛ wayonga paka lo tshanda mɔtshi tsho nɛ dia kem’edja, Diolelo diaki Nzambi diayetɛ nkɛtɛ kɛnɛ paradiso.—Luka 21:10, 11, 31; 23:43.
10 Paka wanɛ wayasukanya otsha le Jehowa ndo wokambɛ mbayɔsɛna lo Paradiso. Bible mbutaka ɔnɛ: “Etenyi ka tshitshe ketu, k’untu a kolo hatanema ntu. Kuyanga ayushishima lu dihuli diandi, ndi henama ntu. Keli akanga a memakana wayukita kete, ndu wayongenangena la etshoko efula wa ki.”—Osambu 37:10, 11.
11 Wanɛ watona l’okonda dia kitanyiya ɛlɛmbɛ waki Nzambi wosembwe wayoshisha nsɛnɔ yawɔ pondjo pondjo. (2 Tesalonika 1:8, 9) Vɔ hawotonga nto. Vɔ wayoyela Satana nde l’ɛdiɛngɛ ande lo nyɔi ka pondjo. (Enyelo 20:10, 14) Koko wanɛ weka akambo wendana la Jehowa ndo wokambɛ wayonga l’ɔngɛnɔngɛnɔ efula lo Paradiso ka la nkɛtɛ.
Nshi Yayaye ya Diambo!
12. Kakɔna kata Bible lo dikambo dia nshi yayaye?
12 Jehowa ambombɛ wanɛ wawoka ngandji akambo wa diambo efula! Enda kɛnɛ kata Ɔtɛkɛta ande lo dikambo dia lɔsɛnɔ la lo Paradiso ka la nkɛtɛ:
● Mbo ya ndɛ y’efula: ‘Nɔnɔ [mbo ya ndɛ] yayonga efula la nkɛtɛ; nkɛtɛ ya l’ɛtɛ w’akona yayɔngɔnyaka diangɔ dia ndɛ efula.’—Osambu 72:16.
● Mvudu y’amɛna: “Vo wayuhika mvudu, wayudjaseka loko.”—Isaya 65:21.
● Olimu wa dimɛna: “Esonami ami wayongenangena ne dia elimu w’anya awo. Vo hawukamba ukambakamba.”—Isaya 65:22, 23.
● Hemɔ honga: “Nduku untu ludjashi [lɛkɔ] ayuta ati: Dimi la [hemɔ]!”—Isaya 33:24.
● Dikɔmɔ hadiotonga: “Ashu w’akanga a tutshungu wayosena, la atui w’akanga a puki wayuka. Akanga a tshumbi wayulimbolimbo uku peli la kanga lumi ayimba esambu.”—Isaya 35: 5, 6.
● Kandji, ɔkɛyi la nyɔi aya bu: “[Nzambi] ayukitula asoi tshe lu ashu awo; nyoi hayuyala ntu, delu hadiuyala ntu, kuyanga ndjawi, kuyanga kandji. Akambu wa ntundu wambushila.”—Enyelo 21:4.
● Ta hatonga: “[Nzambi] atukumiyaka ata pulu ndu lu kuma ya kete.”—Osambu 46:9.
● Lɔsɛnɔ la pondjo: “Antu w’ololo wayukita kete, wayudjaseka loko pundju.”—Osambu 37:29.
13. Naa onto lamɛ lakoka konya nkɛtɛ kɛnɛ paradiso ndo lande na?
13 Ana w’anto hawokokaki mbela weho w’akambo wa ngasɔ pondjo, koko Jehowa ekɔ la wolo wa sala oseka dikambo tshɛ diasangoyande. Ndoko kakoka mboshimba dia sala kɛnɛ kalangande sala. Bible mbutaka ɔnɛ: “Nduku dikambu diaheyi [Nzambi] tsha.”—Luka 1:37.
14. Ngande wakokayɛ mbɔtɔ lo mboka k’otsha lo lɔsɛnɔ la pondjo?
14 Oma lo tshimbo y’Ɛmɛnyi ande, Jehowa ekɔ lo mbisha anto wa l’ahole tshɛ diaaso dia ‘mbɔtɔ lo soko dia tshitshɛ’ ndo dia kɛndakɛnda lo mboka k’otsha lo lɔsɛnɔ la pondjo. Onga l’atei w’anto wele l’ɔngɛnɔngɛnɔ wetawɔ leeta lɔsɔ. Onga l’ɔtɛmwɛlɔ wa mɛtɛ dia kondja ɛtshɔkɔ waki Jehowa lo pondjo pondjo!—Mateu 7:13, 14.
[Osato wɔsa lɛkɛ l’otondo wa lo lɛkɛ 31]