TSHAPITA 12

Yeso Tetshaka Woho Wa Nɔmba

ONDE wɛ tɛkɛtaka la Jehowa Nzambi?. . . Nde nangaka dia wɛ tɛkɛta la nde. Dɔmbɛlɔ ekɔ sawo dia lam’asayɛ la Nzambi. Mbala efula Yeso akatɛkɛtaka la She lele l’olongo. Tena dimɔtshi nde akalangaka monga ndamɛ etena kakandatɛkɛtaka la Nzambi. Etena kɛmɔtshi, Bible mbutaka ɔnɛ: ‘Nde akadɛ otsha lo dikona ndamɛ dia tɔlɔmba. Kânga mbaki wonya aya dikɔlɔ, nde aki ndamɛ lɛkɔ.’​—⁠Mateu 14:⁠23.

Lende akokayɛ ntshɔ wɛmɛ dia tɔlɔmba Jehowa na?. . . L’otsho la ntondo ka wɛ ndala, ondo wɛ koka monga wɛmɛ dia nɔmba Jehowa. Yeso akate ate: ‘Lam’alɔmbayɛ, ɔtɔ lo luudu layɛ ndo l’ɔkɔngɔ wa wɛ ndiha lokuke ko wɛ nɔmba Shɔ.’ (Mateu 6:⁠6) Onde wɛ nɔmbaka Jehowa dikɔlɔ tshɛ la ntondo ka wɛ ndala?. . . Wɛ pombaka sala dikambo sɔ.

Yeso akalɔmbɛ ndo l’etena kaki anto akina kâmɛ la nde. Lam’akavu ɔngɛnyi ande Lazaro, Yeso akalɔmbɛ kâmɛ l’anto akina lo dihole diakawakitsha odo waki Lazaro. (Joani 11:​41, 42) Yeso akalɔmbaka ndo l’etena kakandasanganaka nde l’ambeki ande. Onde wɛ tshɔka lo nsanganya lɛnɛ asalema dɔmbɛlɔ?. . . Mbala efula opalanga w’onto mbasala dɔmbɛlɔ lɛkɔ. Hokamɛ dimɛna kɛnɛ katande nɛ dia nde ekɔ lo nɔmba Nzambi dikambo dia wahɔ ayɛ. Lâsɔ mbayokoka mbuta wate: “Amɛ” lo dɔmbɛlɔ diakɔ. Onde wɛ mbeyaka kɛnɛ kalembetshiya mbuta “Amɛ” l’ekomelo ka dɔmbɛlɔ?. . . Dikambo sɔ nembetshiyaka dia wɛ nangaka dɔmbɛlɔ sɔ. Dikambo sɔ nembetshiyaka nto dia wɛ mbetawɔka awui wa lo dɔmbɛlɔ diakɔ ndo wɛ nangaka dia diɔ monga dɔmbɛlɔ diayɛ wɛ lawɔ.

Yeso akalɔmbaka ndo wonya w’olelo. Nde akashaka Jehowa losaka lo diangɔ dia ndɛ diakawoshaka Jehowa. Onde wɛ tɔlɔmbaka nshi tshɛ la ntondo ka ndɛ?. . . Ekɔ dimɛna sho mbishaka Jehowa losaka l’ɔtɛ wa diangɔ dia ndɛ diatoshande la ntondo ka sho tatɛ ndɛ. Onto ɔmɔtshi mbeyaka sala dɔmbɛlɔ wonya walɛnyu kâmɛ. Ko ahombayɛ sala naka wɛmɛ mbalɛ na? Ko kana wɛ ekɔ lo nanga ndɛ kâmɛ l’anto wahasha Jehowa losaka na?. . . Lâsɔ wɛ pombaka sala dɔmbɛlɔ diayɛ wɛmɛ.

Onde wɛ pombaka nɔmbaka la dui dia wolo mbala tshɛ? Kana onde Jehowa koka mboka dɔmbɛlɔ diayɛ naka wɛ sala dɔmbɛlɔ diakɔ l’otema?. . . Sho koka kondja okadimwelo oma lo kɛnɛ kakakomɛ Nehemiya. Nde aki ɔtɛmɔdi wa Jehowa wakakambaka lo mbalasa kaki Aratashasha, Nkumekanga k’ase Pɛrɛsiya. Lushi lɔmɔtshi, Nehemiya aki la lonyangu efula nɛ dia nde akoke dia wakanyukola pele dia Jerusalɛma, osomba w’ohomba efula wa wodja ande.

Lam’akambola nkumekanga Nehemiya lande na kakinde la lonyangu, Nehemiya akasale dɔmbɛlɔ dia l’etei k’otema la ntondo ka nde mbokadimola. Oma lâsɔ, Nehemiya akatɛ nkumekanga lande na kakinde la lonyangu ndo akɔlɔmbɛ dia kana nde kokaka ntshɔ la Jerusalɛma dia nyomotohika pele sɔ. Kakɔna kakatombe na?. . .

Nzambi akoke dɔmbɛlɔ diaki Nehemiya. Nkumekanga aketawɔ dia nde ntshɔ! Nkumekanga akasha Nehemiya esongo efula dia nde nyomotohika pele diakanyukɔ sɔ. Ɔnkɔnɛ, Nzambi koka mɛtɛ mboka alɔmbɛlɔ aso oyadi kânga l’otema mbosadiso.​—⁠Nehemiya 1:​2, 3; 2:​4-8.

Kakianɛ ohokanyiya dikambo nɛ. Onde pombaka wɛ kɔlɛ ɔtɛ etena kalɔmbayɛ? Onde wɛ pombaka kusɛ adwe? Akanyiyayɛ na?. . . Tena dimɔtshi Yeso akakusɛka adwe etena kakandalɔmbaka. Tena dikina nde akemalaka. Ndo tena efula nde akawalɛka otsha l’olongo lam’akandalɔmbaka oko wakandasale etena kakandalɔmbɛ dikambo diaki Lazaro.

Lâsɔ, kɛsɔ ɛnyatɔ na?. . . Eelo, dikambo sɔ mɛnyaka di’aha kiongamu yele layɛ mbele ohomba efula. Tena dimɔtshi ekɔ dimɛna kɔlɛ ɔtɛ ayɛ ndo ndiha washo. Lo tena dikina wɛ koka mɛna ɔlɔlɔ kusɛ adwe oko wakasale Yeso. Koko, ohɔ dia sho koka nɔmba Nzambi oseka etena tshɛ oyadi la yanyi kana l’otsho ko nde ayoka alɔmbɛlɔ asɔ. Kɛnɛ kele ohomba lo dikambo dia dɔmbɛlɔ ele sho mbetawɔka mɛtɛ dia Jehowa ekɔ lo mpokamɛ. Onde wɛ mbetawɔka dia Jehowa mbokaka alɔmbɛlɔ ayɛ?. . .

Kakɔna kahombaso mbutɛ Jehowa l’alɔmbɛlɔ aso?. . . Ohombutɛ: Lam’alɔmbayɛ, awui akɔna watoyotɛka Nzambi?. . . Jehowa toshaka diangɔ efula di’ɔlɔlɔ ndo ekɔ dimɛna sho mboshaka losaka l’ɔtɛ wa diangɔ diakɔ, shi mɛtɛ?. . . Sho koka mbosha losaka l’ɔtɛ wa diangɔ dialɛso. Ko onde wɛ amboshaka Jehowa losaka lushi lɔmɔtshi l’ɔtɛ w’olongo wa bule, l’ɔtɛ w’esongo wele la dangi di’ashi wa djɛshi ndo l’ɔtɛ w’alɛmbɔlɛmbɔ w’elangala?. . . Nde mbakatonge ndo diangɔ sɔ.

Mbala kɛmɔtshi ambeki waki Yeso wakawombola dia nde mbaetsha woho wa vɔ nɔmbaka. Ɔnkɔnɛ, ombetsha a Woke akawaetsha dikambo sɔ ndo akawaɛnya awui wakaleke ohomba dia vɔ nɔmbaka. Onde wɛ mbeyaka awui akɔ?. . . Ɔsa Bible kayɛ kele fola lo Mateu tshapita 6. Tatɛ oma lo divɛsa 9 polo 13, sho tanaka kɛnɛ kelɛ anto efula ɔnɛ Disambɛ dia Shɛso kana Disambɛ dia Nkumadiɔndjɔ. Tadia disambɛ diakɔ kâmɛ.

Lanɛ tambeka dia Yeso akatotɛ dia sho nɔmbaka dikambo dia lokombo laki Nzambi. Nde akate dia sho nɔmbaka dia lokombo laki Nzambi kidiama kana mbɔsama oko ekila. Naa lokombo laki Nzambi na?. . . Eelo, Jehowa mbele lokombo lande ndo sho pombaka nanga lokombo lɔsɔ.

Dikambo dia hende ele Yeso akatetsha dia nɔmba dikambo di’oyelo wa Diolelo diaki Nzambi. Diolelo sɔ diekɔ ohomba nɛ dia diɔ diayela wɔladi lanɛ la nkɛtɛ ndo diayetɛ nkɛtɛ kɛnɛ paradiso.

Dikambo dia sato ele, Ombetsha a Woke akate dia nɔmba dia lolango laki Nzambi salema lanɛ la nkɛtɛ oko asalemalɔ l’olongo. Naka sho nɔmba dia dikambo sɔ, kete sho pombaka sala kɛnɛ kalanga Nzambi.

Oma lâsɔ, Yeso akatetsha dia sho nɔmbaka dikambo dia mbo ya ndɛ yele laso ohomba lushi tshɛ. Nde akate nto dia sho pombaka mbutɛ Nzambi dia sho mongaka la lonyangu lam’asalaso awui wa kɔlɔ. Ndo sho la dia nɔmba Nzambi dia nde todimanyiya. Koko la ntondo ka Nzambi todimanyiya, sho la dia dimanyiya anto akina naka vɔ wakatosalɛ dikambo dimɔtshi dia kɔlɔ. Onde ekɔ wɔdu wɛ sala dikambo sɔ?. . .

L’ekomelo, Yeso akate dia sho pombaka nɔmba dia Jehowa Nzambi tokokɛ oma le kanga kɔlɔ, Satana Diabolo. Ɔnkɔnɛ, kɛsɔ tshɛ ekɔ akambo w’ɔlɔlɔ wakokaso nɔmba Nzambi.

Sho pombaka mbetawɔ dia Jehowa mbokaka alɔmbɛlɔ aso. Lâdiko wa sho mbɔlɔmba dia nde tokimanyiya, sho pombaka tetemala la mboshaka losaka. Nde ngɛnangɛnaka etena kahatate awui wa kashi lo kɛnɛ kataso lo dɔmbɛlɔ ndo etena kɔlɔmbaso akambo wele ɔlɔlɔ. Ndo nde ayotosha kɛnɛ kɔlɔmbaso. Onde wɛ mbetawɔka dikambo sɔ?. . .

Alako efula w’ɔlɔlɔ wendana la dɔmbɛlɔ tanemaka lo Romo 12:12; 1 Petero 3:12; ndo 1 Joani 5:⁠14.

[Osato wa lo lɛkɛ 67]

Yeso akalɔmbaka etena kakinde ndamɛ . . . ndo etena kakinde kâmɛ l’anto akina

[Osato wa lo lɛkɛ 68]

Lande na kahombayɛ mpokamɛ la yambalo alɔmbɛlɔ wasalema lo nsanganya?

[Esato wa lo lɛkɛ 69]

Etena kakɔna kakokayɛ sala dɔmbɛlɔ dia l’otema, oko wakasale Nehemiya?

[Osato wa lo lɛkɛ 70]

Akokayɛ mbutɛ Nzambi lo dɔmbɛlɔ?