TSHAPITA 24

Tatokomake Wovi Pondjo!

ONDE onto ɔmɔtshi ambokovaka ɛngɔ lushi lɔmɔtshi?. . . Ngande wakayasale?. . . Onto tshɛ lakave ɛngɔ kɛsɔ ekɔ wovi ndo ndoko onto lalanga wovi. Oko le yɛ, ngande wakoka onto koma wovi? Onde wovi mbotɔka la kanyi ya mbiva?. . .

Takeke dia anto mbotɔka la pɛkato. Sho tshɛ kema kokele. Koko ndoko onto lotɔ wovi. Wovi mbeyaka tomba oma lo nkumbo k’ɔlɔlɔ. Ambutshi ande, anango w’apami la wa wamato koka monga anto wa losembwe. Koko nsaki k’onto ndamɛ ka diangɔ diele oko akuta kana diangɔ dikina diakoka sombama l’akuta koka konya onto wovi.

Onto akɔna ayoyokoka mbuta dia nde mbaki wovi wa ntondo?. . . Tokanyiya dui sɔ. Ombetsha a Woke akeyaka onto ɔsɔ lam’akinde l’olongo. Wovi ɔsɔ aki ondjelo ɔmɔtshi. Koko lam’ele Nzambi akatonge andjelo tshɛ kokele, ngande wakakome ondjelo ɔsɔ wovi na?. . . Oko wakateke lo Tshapita 8 ya dibuku nɛ, ondjelo ɔsɔ akakɔmiya ɛngɔ kɛmɔtshi kaki komonga kande. Onde wɛ mbohɔka ɛngɔ kakɔ kakandakɔmiya?. . .

L’ɔkɔngɔ wa Nzambi tonga pami la womoto la ntondo, ondjelo ɔsɔ akalange dia vɔ mbɔtɛmɔla. Nde komonga la lotshungɔ la vɔ mbɔtɛmɔla. Nzambi oto mbakawahombaka tɛmɔla. Koko nde akave ɔtɛmwɛlɔ ɔsɔ! Lam’akandakonya Adama la Eva lo mbɔtɛmɔla, ondjelo ɔsɔ akakome wovi. Nde akakome Satana Diabolo.

Kakɔna katshutshuya onto dia koma wovi na?. . . Ekɔ mposa k’ɛngɔ kele bu kande. Mposa kɛsɔ koka monga wolo efula polo ndo tɔ konya oyadi anto w’ɔlɔlɔ dia vɔ sala awui wa kɔlɔ. Mbala mɔtshi, anto asɔ wakoma wevi hawotshike dui sɔ pondjo ko sala kɛnɛ kele ɔlɔlɔ nto. Ɔmɔtshi l’atei awɔ aki ɔpɔstɔlɔ ɔmɔtshi waki Yeso. Lokombo lande aki Judasɛ Isakariyɔtɛ.

Judasɛ akeyaka dia aki kɔlɔ mbiva nɛ dia wakolakanya Ɛlɛmbɛ waki Nzambi oma ko dikɛnda diande. Nde akeyaka dia Nzambi akatɛkɛta mbala kɛmɔtshi oma l’olongo ndo akatɛ ekambi ande ɔlɛmbɛ wata ate: “Tuvaki.” (Etumbelu 20:15) Lam’akakome Judasɛ opalanga, nde akayohomanaka l’Ombetsha a Woke ndo akakome ombeki ande ɔmɔtshi. L’ɔkɔngɔ diko, Yeso akasɔnɛ Judasɛ dia nde monga ɔmɔtshi wa l’atei w’apɔstɔlɔ ande 12.

Yeso nde l’apɔstɔlɔ ande wakandaka kɛndɔ kâmɛ. Vɔ wakalɛka kâmɛ. Ndo wakombaka akuta awɔ tshɛ lo shɛtɛshɛtɛ. Yeso akasha Judasɛ ɔkɛndɛ wa namaka shɛtɛshɛtɛ shɔ. Mɛtɛ akuta asɔ komonga waki Judasɛ. Ko onde wɛ mbeyaka kɛnɛ kakasale Judasɛ l’ɔkɔngɔ diko?. . .

Judasɛ akatatɛ mbɔsa akuta oma lo shɛtɛshɛtɛ shɔ etena kele nde komonga la lotshungɔ la sala dui sɔ. Nde akɔsaka akuta asɔ lo woshɛshɛ ndo nde akatane toho ta mbɔsa akuta asɔ efula. Nde akayotatɛka kanyiyaka dikambo di’akuta wonya tshɛ. Tende lɛnɛ akokonya nsaki ka kɔlɔ kɛsɔ nshi ngana la ntondo ka vɔ ndjaka Ombetsha a Woke.

Mariya w’ɔnango Lazaro l’ɔngɛnyi waki Yeso akɔshi esɔ kɛmɔtshi k’oshinga wolo efula ndo akakite Yeso esɔ kakɔ l’ekolo. Koko Judasɛ akangunanguna lam’akandɛnyi dui sɔ. Onde wɛ mbeyaka lande na?. . . Nde akate di’esɔ kɛsɔ kakahombe sondjama dia vɔ mbisha ase wola akuta w’oma lɔkɔ. Koko lo mɛtɛ, nde akalange di’akuta mbɔtɔ efula lo shɛtɛshɛtɛ woho wa nde ndjova akuta akɔ.​—⁠Joani 12:​1-6.

Yeso akatɛ Judasɛ di’aha nde tshindja Mariya yimba l’ɔtɛ wa dui di’ɔlɔlɔ diakandasale sɔ. Judasɛ kɔngɛnangɛna kɛnɛ kakawotɛ Yeso kɛsɔ, ɔnkɔnɛ nde akatshu otsha le ɛlɔmbɛdi wa lâdiko wanɛ waki atunyi waki Yeso. Vɔ wakalange munda Yeso, koko wakalangaka monda l’otsho di’aha anto mbaɛna.

Judasɛ akatɛ ɛlɔmbɛdi ɛsɔ ate: ‘Layonyotɛ woho wakokanyu munda Yeso naka nyu mbishami akuta. Akuta angana wayonyombisha?’

Ɛlɔmbɛdi ɛsɔ wakokadimola vate: ‘Tayokosha ekenga w’akuta akumi asato.’​—⁠Mateu 26:​14-16.

Judasɛ akɔshi akuta asɔ. Nde aki oko onto lasondja Ombetsha a Woke le anto asɔ! Onde wɛ kanyiyaka di’onto ɔmɔtshi koka sala dui dia kɔlɔ dia ngasɔ?. . . Lonyangu ko woho wa dikambo dia ngasɔ mbatomba lam’akoma onto wovi ndo lam’avande akuta. Nde nangaka akuta oleki woho walangande anto akina ndo oleki kânga woho walangande Nzambi.

Ondo wɛ mbeyaka mbuta wate: ‘Dimi hakoke pondjo nanga ɛngɔ tshɛ ndeka woho walangami Nzambi.’ Ekɔ dimɛna wɛ kanyiya ngasɔ. Lam’akasɔnɛ Yeso Judasɛ oko ɔpɔstɔlɔ, ondo ngasɔ mbakakanyiyaka Judasɛ. Ondo anto akina wakakome wevi wakakanyiyaka ngasɔ vɔ lawɔ. Tende anto amɔtshi l’atei awɔ.

Ɔmɔtshi aki okambi waki Nzambi wakawetaka Akana lakasɛnɛ edja efula la ntondo k’Ombetsha a Woke mbotɔ lanɛ la nkɛtɛ. Akana akɛnyi okutu ɔmɔtshi wa dimɛna efula, etenyi ka paunyi ndo ekenga ɛmɔtshi w’akuta. Diangɔ sɔ komonga diande. Bible mbutaka dia ɔsɔ aki diangɔ diaki Jehowa nɛ dia diɔ diakɔsama oma le atunyi w’ekambi waki Nzambi. Koko Akana akakɔmiya diangɔ sɔ efula polo ndo lo nde ndjokoma lo mbiva diangɔ diakɔ.​—⁠Jashua 6:19; 7:​11, 20-22.

Ɛnyɛlɔ kekina tɔ kɛnɛ. Edja efula la ntondo, Jehowa akasɔnɛ Davidi dia nde monga nkumekanga ka wodja w’Isariyɛlɛ. Lushi lɔmɔtshi, Davidi akatatɛ menda womoto l’olangala efula lakawelɛka Batɛshɛba. Nde akatetemala la menda Batɛshɛba ndo akatatɛ kanyiya dia mbotshuka. Koko, womoto ɔsɔ aki wadi aki Uriya. Kakɔna kakahombe Davidi sala na?. . .

Davidi akahombe tshika kanyiya dikambo dia Batɛshɛba. Koko nde kotshika. Ɔnkɔnɛ Davidi akawela lakande. Ndo oma lâsɔ nde akadiakisha Uriya. Lande na kakasale Davidi awui wa kɔlɔ asɔ na?. . . Nde akasale awui asɔ nɛ dia nde akakɔmiya womoto laki wadi aki onto okina.​—⁠2 Samuele 11:​2-27.

Lam’ele Davidi akayatshumoya, Jehowa akôtshike la lɔsɛnɔ. Oma l’etena kɛsɔ, Davidi akonge l’ekakatanu efula. Abisalɔma w’ɔnande akalange mbɔsa dihole diakinde dia nkumekanga. Ɔnkɔnɛ lam’akayaka anto dia ndjenda Davidi, Abisalɔma akadingaka anto asɔ anya ndo akâkumbatɛka. Bible mbutaka ɔnɛ: ‘Abisalɔma akatetemala la mbiva etema waki ase Isariyɛlɛ.’ Nde aketawoya anto asɔ dia nde monga nkumekanga lo dihole dia Davidi.​—⁠2 Samuele 15:​1-12.

Onde lushi lɔmɔtshi wɛ ambɔkɔmiyaka ɛngɔ kɛmɔtshi efula oko wakasale Akana, Davidi la Abisalɔma?. . . Naka ɛngɔ kɛsɔ kekɔ kaki onto okina, kete ekɔ wovi naka wɛ mbɔsa ɛngɔ kakɔ aha la dikimɔ dia kangatɔ. Onde wɛ akohɔ kɛnɛ kakalange Satana laki wovi wa ntondo?. . . Nde akalange di’anto mbɔtɛmɔla lo dihole dia vɔ tɛmɔla Nzambi. Ɔnkɔnɛ, Satana akave lam’akandatshutshuya Adama la Eva dia kitanyiya awui ande.

Naka onto ekɔ l’ɛngɔ kɛmɔtshi, kete nde ekɔ la lotshungɔ la sɔna onto lakoka kamba l’ɛngɔ kakɔ. Ɛnyɛlɔ, wɛ mbeyaka ntshɔ dia tɔkɛnya l’ana akina lo luudu lawɔ. Onde ayonga dimɛna mbɔsa ɛngɔ kɛmɔtshi oma lo luudu lawɔ ko wɛ kitɔla lakanyu?. . . Kema, onyake naka papa kana mama kaki ana asɔ mbokote dia wɛ mbɔsa ɛngɔ kakɔ. Naka wɛ mbɔsa ɛngɔ kɛmɔtshi oma lo luudu lawɔ aha la mbâlɔmba dikimɔ, kete ɔsɔ ekɔ wovi.

Lande na kakokayɛ pembama dia mbiva na?. . . Nɛ dia wɛ kɔmiyaka ɛngɔ kɛmɔtshi kele bu kayɛ. Oyadi ndoko onto okina lakɛna wonya wɔsayɛ ɛngɔ kakɔ, onde wɛ mbeyaka onto lakɛna?. . . Jehowa Nzambi ekɔ lo kɛna. Ndo sho pombaka mbohɔka dia Nzambi petshaka wovi. Ɔnkɔnɛ ngandji kokayɛ Nzambi ndo wonyayɛ onto ayokokimanyiya pondjo di’aha wɛ koma wovi.

Bible mbutaka hwe dia ekɔ kɔlɔ mbiva. Lam’alangɛ adia Mako 10:​17-19; Romo 13:9; ndo Efeso 4:⁠28.

[Osato wa lo lɛkɛ 129]

Lande na kakave Judasɛ?

[Esato wa lo lɛkɛ 130]

Dikambo diakɔna dia kɔlɔ diakakanyiyaka Akana nde la Davidi?

[Osato wa lo lɛkɛ 130]

Lo woho akɔna waki Abisalɔma wovi?