TSHAPITA 39

Nzambi Mbohɔka Ɔnande

YESO akalele lam’akavu ɔngɛnyi ande Lazaro. Onde wɛ fɔnyaka dia Jehowa aki la lonyangu lam’akasowaka Yeso ndo wakandavu?. . . Bible mbutaka dia Nzambi koka ‘kiyana’ ndo ‘nyanga’ l’ɔtɛ w’awui weta.​—⁠Osambu 78:​40, 41; Joani 11:⁠35.

Onde wɛ koka kanyiya lonyangu laki la Jehowa lam’akandendaka nyɔi k’Ɔnande la ngandji?. . . Yeso aki l’eshikikelo dia Nzambi hatowohɛ. Diakɔ diakandate ɛtɛkɛta ɛnɛ w’ekomelo la ntondo ka nde mvɔ ate: “Papa, lambukitsha [lɔsɛnɔ] lami lu anya aye!”​—⁠Luka 23:46.

Yeso aki l’eshikikelo dia nde ayolɔma ndo ɔnɛ hawotowohɛ lo ‘ifɛrnɔ,’ mbut’ate lo diombo. L’ɔkɔngɔ wa Yeso mbolɔ oma lo nyɔi, ɔpɔstɔlɔ Petero akavusola kɛnɛ kakafundama lo Bible lo dikambo diaki Yeso ate: “Anima ande kotshikala l’ifɛrnɔ ndo demba diande kɔpɔnda.” (Etsha 2:​31, King James Version; Osambu 16:10) Demba diaki Yeso takadiahombe pondjo pɔnda lo diombo, mbut’ate naana ndo mbokɛ nsolo.

Lam’aki Yeso lanɛ la nkɛtɛ, nde akatɛ ambeki ande dia nde hatotshikala lo diombo l’etena k’otale efula. Nde akâlembetshiya dia nde ‘ayodiakema ndo ayolɔ lushi la sato.’ (Luka 9:22) Ɔnkɔnɛ, ambeki kokoka mɛtɛ mamba lam’akolɔma Yeso. Ko onde vɔ wakambe?. . . Ɛsɔ tende dikambo sɔ.

Lushi la Tanu oya l’eshidi esato wa dikɔlɔ mbakavu Ombetsha a Woke l’otamba w’asui. Yɔsɛfu, kanga ɔngɔnyi ɔmɔtshi la l’atei w’ase Tuminadi ta Lâdiko t’ase Juda aki nde lawɔ ombeki waki Yeso wa lo woshɛshɛ. Lam’akandoke dia Yeso ambovɔ, nde akatshu le Pilato laki nguvɛrnɛrɛ k’ose Rɔma. Nde akɔ̂lɔmbɛ dia kana nde kokaka panula odo waki Yeso oma l’otamba dia tôkundɛ. L’ɔkɔngɔ wa lâsɔ, Yɔsɛfu akɔshi odo waki Yeso ndo akatshu la wɔ otsha l’ekambɔ kɛmɔtshi lɛnɛ aki diombo dimɔtshi, mbut’ate dihole diakitshawɔ anto wambovɔ.

L’ɔkɔngɔ wa vɔ mbidja odo lo diombo, vɔ wakafɛ diombo diakɔ la dive dia woke efula. Ngasɔ mbakawafɛ diombo sɔ. Kakianɛ taya lushi la sato la nyɔi ka Yeso, mbut’ate Lushi la Lomingu la ntondo ka wonya mpotɔ, lam’aki wodjima wekekɔ. Asɔlayi amɔtshi wakalamaka diombo diakɔ. Ɛlɔmbɛdi wa weke mbakatome asɔlayi asɔ dia tolama diombo. Onde wɛ mbeyaka lande na?. . .

Aki nɛ dia ɛlɔmbɛdi ɛsɔ vɔ lawɔ wakoke dia Yeso akate ate nde ayolɔ. Ɔnkɔnɛ, dia shimba ambeki ande dia vɔ ndjova odo waki Yeso ko ndjota l’ɔkɔngɔ ɔnɛ Yeso ambolɔ, ɛlɔmbɛdi ɛsɔ wakatome asɔlayi dia tolama diombo. Nkɛtɛ yakatatɛ la didima la shashimoya. Osase wakahɛtɛ lo wodjima. Osase ɔsɔ aki ondjelo ɔmɔtshi waki Jehowa! Asɔlayi wakalamaka diombo wakoke wɔma efula ndo takiwɔ l’akoka wa sukasuka nto. Ondjelo ɔsɔ akatshu otsha lo diombo ndo akanya dive diakawafɛ lâdiko ko diombo diakatshikala hwe!

Eelo, ekɔ oko woho wakayotaka ɔpɔstɔlɔ Petero l’ɔkɔngɔ ate: “[Nzambi] akulula Jesu ako.” (Etsha 2:32) Nzambi akolola Yeso la demba diele oko nɛ diaki lande la ntondo ka nde ndja lanɛ la nkɛtɛ. Nde akolɔma la demba dia lo nyuma diele oko nɛ diele l’andjelo. (1 Petero 3:18) Ɔnkɔnɛ, naka anto wakɛnyi Yeso, kete nde akalɔtɛ demba dia l’emunyi. Onde ngasɔ mbakandasale?. . . Ɛsɔ tende dikambo sɔ.

Etena kɛsɔ aki ko wonya woyahotɔ. Asɔlayi wakalawe. Mariya Mangandala nde l’ambeki akina waki Yeso wa wamato wakatshu otsha lo diombo. Wakatataka lam’asawɔ ɔnɛ: ‘Onto akɔna ayototonyɛ dive dia wotsho ndo na?’ (Mako 16:⁠3) Koko lam’akawakome lo diombo, wakatane dia wakashidi la minya dive diakɔ. Ndo diombo diaki hwe! Odo waki Yeso waya bu lɔkɔ! Mariya Mangandala akalawɔ paka ko wonya akɔ dia tewoya apɔstɔlɔ amɔtshi waki Yeso.

Wamato akina wakatshikala suke la diombo. Vɔ wakayambolaka vate: ‘Lende ahomba monga odo waki Yeso na?’ Lam’akawayambolaka ngasɔ, apami ahende waki l’ahɔndɔ wakatondjaka esase wakatombe la shashimoya lalewɔ. Apami akɔ waki andjelo! Vɔ wakatɛ wamato asɔ ɔnɛ: ‘Lande na kayanganyu Yeso lanɛ na? Nde akashidi la mbolɔ. Nyotshu esadi kele nyotote ambeki ande.’ Lâsɔ, wɛ koka kanyiya lowango lakalawɔ wamato asɔ dia totɛ ambeki dui sɔ! Lam’akawatatshɔka, pami kɛmɔtshi akahomana la wɔ. Onde wɛ mbeyaka pami kakɔ?. . .

Pami kakɔ aki Yeso. Nde akalɔtɛ demba dia l’emunyi! Nde lawɔ akatɛ wamato asɔ ate: ‘Nyotshu dia totɛ ambeki ami.’ Wamato asɔ wakasalangana efula. Vɔ wakatshu le ambeki ndo wakawatɛ ɔnɛ: ‘Yeso ambolɔ! Takawɛnyi!’ Mariya akashidi la mbutɛ Petero nde la Joani woho wakawatanyi diombo hwe. Oma lâsɔ, vɔ wakatshu dia tenda diombo diakɔ oko wakokayɛ mɛna lanɛ. Vɔ wakendaka ahɔndɔ wa linɛnɛ wakawɔmbɛ Yeso ko wakahombe ndo ka mbuta. Vɔ wakalangaka mbetawɔ dia Yeso ambolɔ, koko akɛnamaka dia ekɔ wolo efula monga mɛtɛ.

La dikɔlɔ dia Lushi la Lomingu lɔsɔ, Yeso akɛnama le ambeki ande ahende wakatatshɔka otsha lo ngelo kelɛwɔ Emayo. Yeso akasambe la wɔ ndo akatasawolaka la wɔ, koko vɔ kômbeya nɛ dia nde komonga la demba dia l’emunyi dia woho waki lande ntondo. Vɔ wakayeyaka Yeso paka lam’akandasale dɔmbɛlɔ la ntondo ka vɔ ndɛ diangɔ diaki la ntondo kawɔ. Ambeki asɔ wakasalangana efula ndo wakakawola esadi esadi oya la Jerusalɛma lo kilɔmɛtɛlɛ efula! Ondo yema tshitshɛ oma lâsɔ mbakɛnama Yeso le Petero dia nde mbɛnya ate Nde ekɔ la lɔsɛnɔ.

La dikɔlɔ dia yɔɔ dia Lushi la Lomingu lɔsɔ, ambeki ande efula wakatshumana lo shambrɛ mɔtshi. Vɔ wakadihe nkuke tshɛ. Koko Yeso akɔtɔ la shashimoya lo shambrɛ shɔ ndo akonge la wɔ kâmɛ! Etena kɛsɔ vɔ wakeye dia Ombetsha a Woke aki mɛtɛ nto la lɔsɛnɔ. Ohokanyiya ɔngɛnɔngɛnɔ waki lawɔ!​—⁠Mateu 28:​1-15; Luka 24:​1-49; Joani 19:​38–20:⁠21.

Yeso akɛnama le ambeki ande l’alemba wa l’emunyi wotshikitanyi l’edja ka nshi 40 dia mbaɛnya ɔnɛ nde ekɔ la lɔsɛnɔ. Oma lâsɔ, nde akamɔ oma lanɛ la nkɛtɛ ndo akakawola otsha le She l’olongo. (Etsha 1:​9-11) Kombeta edja oma lâsɔ, ambeki wakatatɛ la mbewoya anto tshɛ dia Nzambi ambolola Yeso oma lo nyɔi. Kânga lam’akâkɔmɔla ɛlɔmbɛdi ndo kakawayake ambeki amɔtshi, vɔ wakatetemala la sambisha. Vɔ wakeyaka dia naka vɔ mvɔ, kete Nzambi ayowaohɔ paka oko woho wakandohɔ Ɔnande.

Ambeki waki Yeso wa ntondo asɔ tshikitana efula l’anto wa nshi nyɛ! L’etenyi ka l’ɔnɔnyi kɔtɔnganɛ la nshi yakolɔ Yeso, anto wa nshi nyɛ kanyiyaka paka dikambo di’etomba ndo di’ekele wa Pasaka wadjawɔ alangi. Koko Bible hate ndoko dikambo ɔtɔi lo kɛnɛ kendana l’etomba ndo l’ekele wa Pasaka. Bible tɛkɛtaka dikambo dia kambɛ Nzambi.

Sho koka monga oko ambeki waki Yeso lo mbewoya anto akina dia Nzambi akasale dikambo dia diambo efula lam’akandolola Ɔnande. Hatohombe mboka wɔma pondjo oyadi anto kotanɛka dia todiaka. Naka wambotodiaka, kete Jehowa hatotohɛ ndo ayotolola oko wakandolola Yeso.

Kema tekɔ l’ɔngɛnɔngɛnɔ dia mbeya ɔnɛ Nzambi mbohɔka wanɛ wôkambɛ ndo ɔnɛ nde ayowaolola oma lo nyɔi?. . . Ewo k’awui asɔ la dia totshutshuya dia mbeya woho wakokaso ngɛnyangɛnya Nzambi. Onde wɛ akeyaka dia sho koka mɛtɛ ngɛnyangɛnya Nzambi?. . . Tayosawola dikambo sɔ lo tshapita yayela.

Dietawɔ diendana la eolwelo ka Yeso pombaka keketsha elongamelo ndo mbetawɔ kaso. Lam’alangɛ adia Etsha 2:​22-36; 4:​18-20; ndo 1 Koreto 15:​3-8, 20-23.

[Osato wa lo lɛkɛ 202]

Lande na kele diombo hwe? Kakɔna kakatombe?

[Osato wa lo lɛkɛ 205]

Kakɔna ondo kakakanyiyaka Petero nde la Joani?

[Osato wa lo lɛkɛ 206]

L’etena ka l’ɔnɔnyi kakolɔ Yeso, kakɔna kakanyiya anto efula? Ko akanyiyayɛ lo dikambo sɔ?