TSHAPITA 44

Angɛnyi Aso Pombaka Mboka Nzambi Ngandji

ANGƐNYI wekɔ anto walangaso tɛkɛta ndo mbidjasɛ la wɔ kâmɛ. Koko ekɔ ohomba monga l’angɛnyi w’ɔlɔlɔ. Oko le yɛ, onto akɔna ele ɔngɛnyi aso woleki tshɛ dimɛna na?. . . Jehowa Nzambi mbele ɔngɛnyi aso woleki tshɛ.

Onde sho koka mɛtɛ monga ɔngɛnyi waki Nzambi?. . . Eelo, Bible mbutaka lo dikambo diaki Abrahama lakasɛnɛ ambeta ɛnɔnyi efula dia nde aki ‘ɔngɛnyi waki Jehowa.’ (Jakoba 2:23) Onde wɛ mbeyaka lande na kakinde ɔngɛnyi waki Nzambi?. . . Bible kadimolaka dia Abarahama aki l’okitanyiya otsha le Nzambi. Nde akakitanyiya Nzambi kânga lam’akawɔlɔmbɛ dia sala dui dimɔtshi dia wolo efula. Ɔnkɔnɛ, dia monga ɔngɛnyi waki Jehowa, sho pombaka sala kɛnɛ k’ɔngɛnyangɛnya, oko wakasale Abarahama ndo oko wakasalaka Ombetsha a Woke nshi tshɛ.—Etatelu 22:1-14; Joani 8:28, 29; Heberu 11:8, 17-19.

Yeso akatɛ apɔstɔlɔ ande ate: “Naka nyu nyambutsha uku anyutelami, keti engenyi ami mbenyu.” (Joani 15:14, sho mbɛnganyisha alɛta ango.) Lam’ele oseka dui tshɛ diakatɛ Yeso anto diakaye oma le Jehowa, Yeso akɛnyaka dia angɛnyi ande waki anto wakasalaka kɛnɛ kakalɔmbaka Nzambi dia vɔ sala. Eelo, angɛnyi waki Yeso tshɛ wakalangaka Nzambi.

Angɛnyi amɔtshi waki Ombetsha a Woke wakalekaka mbokana la nde ko apɔstɔlɔ ande wɛnayɛ esato awɔ lo lɛkɛ 75 la dibuku nɛ. Vɔ waketetaka la nde ndo wakokimanyiyaka l’olimu w’esambishelo. Yeso aketshaka wenya ande efula kâmɛ l’apami asɔ. Vɔ wakalɛka kâmɛ. Wakatɛkɛtaka kâmɛ awui wendana la Nzambi. Ndo wakasalaka akambo akina kâmɛ. Koko Yeso aki l’angɛnyi akina efula. Nde aki la mbekelo ka tshikala la wɔ kâmɛ ndo waketshaka tena di’ɔngɛnɔngɛnɔ kâmɛ.

Nkumbo kɛmɔtshi kakalangaka Yeso tshikala la wɔ kâmɛ kakadjasɛka l’osomba wa tshitshɛ wa Bɛtaniya, waki suke l’osomba wa woke wa Jerusalɛma. Onde wɛ akohɔ ase nkumbo kɛsɔ?. . . Nkombo yawɔ aki Mariya, Mata ndo ɔnangɛwɔ Lazaro. Yeso aketaka Lazaro ate ɔngɛnyi ami. (Joani 11:1, 5, 11) Yeso akalangaka ase nkumbo kɛsɔ ndo akangɛnangɛnaka dia tshikala la wɔ kâmɛ nɛ dia vɔ wakalangaka Jehowa ndo wakôkambɛka.

Kɛsɔ halange mbuta ɔnɛ Yeso kosalɛka wanɛ waki kokambɛka Nzambi ɔlɔlɔ. Nde akâsalɛka ndo vɔ awui w’ɔlɔlɔ. Nde akatshɔka ndo lawakawɔ ndo akalɛka kâmɛ la wɔ. Kɛsɔ akatshutshuya anto amɔtshi dia mbuta ɔnɛ Yeso aki “ongenyi wa elungudi w’elambu la antu wa kolo!” (Mateu 11:19) Aha naka Yeso akatshɔka laka anto asɔ, kete lâsɔ nde akalangaka yoho ya lɔsɛnɔ laki lawɔ. Koko nde akatshɔka lawakawɔ dia towaewoya awui wendana la Jehowa. Nde akâkimanyiyaka dia vɔ tshika awui wa kɔlɔ ko kambɛ Nzambi.

Dui sɔ diakasalema lushi lɔmɔtshi l’osomba wa Jeriko. Yeso akatetaka l’osomba ɔsɔ otsha la Jerusalɛma. L’atei wa lemba l’anto lakatawoyelaka mbaki ndo pami kɛmɔtshi kakawelɛka Zakeyo. Nde akalange dia mɛna Yeso. Koko Zakeyo aki mondo ndo nde kokoka mɛna Yeso nɛ di’anto efula waki la ntondo kande. Ɔnkɔnɛ, nde akalawɔ la ntondo ka mboka ko akadɛ l’osongo ɔmɔtshi dia mɛna Yeso dimɛna wonya wayondeta lâwɔ.

Lam’akakome Yeso la tshina di’osongo ɔsɔ, nde akawalɛ l’osongo ndo akatɛ Zakeyo ate: ‘Holɔ esadi nɛ dia ɛlɔ dimi layodjasɛ lakayɛ.’ Zakeyo aki pami k’ɔngɔnyi kakasale awui wa kɔlɔ. Lande na kakalange Yeso ntshɔ dia todjasɛ lo luudu laki pami ka kɔlɔ kɛsɔ na?. . .

Ɔkɔkɔ wakatshu Yeso dia todjasɛ lakande komonga w’ɔnɛ nde akalangaka yoho ya lɔsɛnɔ yaki pami kɛsɔ. Nde akatshu lɛkɔ dia tewoya Zakeyo awui wendana la Nzambi. Nde akɛnyi woho wakasale pami kɛsɔ la wolo tshɛ dia mbɛna. Ɔnkɔnɛ, nde akeyaka dia ondo Zakeyo ayohokamɛ awui ande. Ɔsɔ aki etena ka dimɛna ka nde mbewoya Zakeyo awui wendana la yoho ya lɔsɛnɔ yalanga Nzambi anto monga layɔ.

Ko kakɔna kɛnaso wony’ɔnɛ na?. . . Zakeyo ambɔngɛnangɛna wetshelo waki Yeso. Nde ambonyanga efula l’ɔtɛ wakandakesaka anto ndo nde ambolaka dia kawoya akuta wakinde komonga la lotshungɔ la mbɔsa. L’ɔkɔngɔ diko, nde akakome ombeki waki Yeso. Paka l’ɔkɔngɔ wa lâsɔ mbakayokomaka Yeso ɔngɛnyi waki Zakeyo.—Luka 19:1-10.

Naka sho ndjela ɛnyɛlɔ kaki Ombetsha a Woke, onde sho koka ntshɔ laka anto wele bu angɛnyi aso?. . . Eelo. Aha l’ɔtɛ w’ɔnɛ sho nangaka yoho yawɔ ya lɔsɛnɔ mbatshɔso lawakawɔ. Ndo sho hatolange sala awui wa kɔlɔ kâmɛ la wɔ. Tayotshɔka lawakawɔ l’oyango wa mbaewoya awui wendana la Nzambi.

Koko angɛnyi woleki mbokana la so wekɔ anto walekaso nanga monga kâmɛ la wɔ tena efula. Dia vɔ monga angɛnyi w’ɔlɔlɔ, vɔ pombaka monga weho w’anto walangema oma le Nzambi. Mbeyaka monga ko amɔtshi haweye ndo ele Jehowa. Koko naka vɔ nangaka mbeka awui wendana lande, kete sho koka mbâkimanyiya. Ndo naka wamboyokoma lo nanga Jehowa oko sho, kete sho koka koma angɛnyi awɔ w’eshika.

Ekɔ yoho kina ya mbeya kana onto ayonga ɔngɛnyi wa dimɛna. Enda awui wasalande. Onde nde salɛka anto akina kɔlɔ ndo mbaɔlaka? Ɔsɔ bu dikambo dia dimɛna, shi mɛtɛ?. . . Onde nde kongolaka enongo nshi tshɛ? Hatotolanga vɔ ndjotodja l’enongo ande, shi mɛtɛ?. . . Kana onde onto akɔ salaka awui wa kɔlɔ l’okonda ko nde fɔnyaka dia nde ekɔ mayɛlɛ nɛ dia ndoko onto lawɛna? Oyadi ndoko onto lawɛna, Nzambi mɛnaka kɛnɛ kasalande, shi mɛtɛ? Onde wɛ fɔnyaka di’anto wasala awui wa ngasɔ koka monga angɛnyi w’ɛlɔlɔ le so?. . .

Ohɔsa Bible kayɛ lam’alangayɛ. Tende kɛnɛ kata Bible lo dikambo dia shɛngiya yele l’angɛnyi aso le so. Tadia 1 Koreto tshapita 15, divɛsa 33. Onde wɛ ambɛna divɛsa diakɔ?. . . Diɔ mbutaka ɔnɛ: ‘Tanyoyakesake. Lɔngɛnyi la kɔlɔ nanyaka ditshelo di’ɔlɔlɔ.’ Dui sɔ mɛnyaka ɔnɛ naka sho monga kâmɛ l’anto wa kɔlɔ, kete sho koka koma anto wa kɔlɔ. Ndo ekɔ nto mɛtɛ di’angɛnyi w’ɔlɔlɔ tokimanyiyaka dia monga la ditshelo di’ɔlɔlɔ.

Tatohɛke pondjo dia Jehowa mbele Onto loleki ohomba tshɛ lo lɔsɛnɔ laso. Sho hatolange nanya lɔngɛnyi lasaso lande, shi mɛtɛ?. . . Ɔnkɔnɛ, sho la dia menda dimɛna dia monga angɛnyi paka w’anto walanga Nzambi.

Ohomba w’angɛnyi w’ɔlɔlɔ mɛnyamaka l’Osambu 119:115; Tukedi 13:20; 2 Timote 2:22; ndo 1 Joani 2:15.

[Osato wa lo lɛkɛ 227]

Lande na kaki Abarahama ‘ɔngɛnyi wa Nzambi’?

[Osato wa lo lɛkɛ 228]

Bonde kakadjasɛka Yeso mbala efula kâmɛ la nkumbo kɛnɛ lam’akandatshɔka la Jerusalɛma? Onde wɛ mbeyaka nkombo yawɔ?

[Osato wa lo lɛkɛ 229]

Lande na akadɛ Zakeyo l’osongo ɔnɛ?

[Osato wa lo lɛkɛ 230]

Lande na kakatshu Yeso laka Zakeyo, ndo dui diakɔna diakalake Zakeyo dia sala?