Lokumu l’ɔlɔlɔ kɛdikɛdi na?

1. Lokumu l’ɔlɔlɔ l’oma le Nzambi kɛdikɛdi na?

Nzambi nangaka di’anto ngɛnangɛna la lɔsɛnɔ lanɛ la nkɛtɛ. Nde akatonge nkɛtɛ ndo diangɔ tshɛ diele lɔkɔ nɛ dia nde nangaka anto. Kem’edja, nde ayanga nsala di’anto wa l’ahole tshɛ monga la lɔsɛnɔ la dimɛna lo nshi yayaye. Nde ayonya kɛnɛ tshɛ kakonya anto l’asui.​—Adia Jeremiya 29:11.

Ndoko lowandji l’ana w’anto lambotondoya dia minya awui wa ngala, hemɔ kana nyɔi. Koko lokumu l’ɔlɔlɔ l’oma le Nzambi mɛnyaka dia kem’edja, Nzambi ayanga mpɛnya mandji y’ana w’anto la lowandji lande hita. Anto wayonga l’ɛse ka lowandji lɔsɔ wayonga la wɔladi ndo l’alemba w’amɛna.​—Adia Isaya 25:8; 33:24; Danyele 2:44.

2. Lande na kele lokumu l’ɔlɔlɔ lekɔ ohomba efula?

Asui wayokomɛ paka etena kayonya Nzambi anto wa kɔlɔ oma la nkɛtɛ. (Zefaniya 2:3) Ko etena kakɔna kayosalema dui sɔ? Ɔtɛkɛta wa Nzambi wakatatshi dia tayɛna akambo wɛnaso ɛlɔ kɛnɛ wɛnya anto pâ. Akambo weta ɛlɔ kɛnɛ mɛnyaka dia etena ka Nzambi komiya asui kaya suke.​—Adia 2 Timote 3:1-5.

3. Kakɔna kahombaso nsala?

Sho pombaka mbeka awui wendana la Nzambi l’ekimanyielo k’Ɔtɛkɛta ande, Bible. Tɔ kekɔ oko mukanda w’oma le ombutshi ɔmɔtshi wa ngandji. Tɔ tɛnyaka woho wakokaso monga la yoho ya lɔsɛnɔ ya dimɛna oma ko kakianɛ ndo woho wakokaso ndjokondja lɔsɛnɔ la pondjo lo nshi yayaye lanɛ la nkɛtɛ. Lo mɛtɛ, anto amɔtshi mbeyaka koshimba dia wɛ mbeka Bible. Koko lam’ele Nzambi tolakaka nshi yayaye y’amɛna, hatohombe mbetawɔ di’anto akina toshimba dia sho nsala dui sɔ.​—Adia Tukedi 29:25; Enyelo 14:6, 7.