Afarisɛ wambombola pami kaki tshungu

Afarisɛ kombetawɔ dia Yeso kambɔsɛnya pami kakakotɔ tshungu kɛsɔ, diakɔ diakawelɛ ambutshi ande. Ambutshi asɔ mbeyaka dia vɔ wakakoke “mbitshanyema oma lo shinangɔnga.” (Joani 9:22) Ohembwelo wa lɔngɛnyi l’ase Juda akina ɔsɔ akahombe monga l’etombelo wa kɔlɔ efula lo diɔtɔnganelo dia nkumbo kɛsɔ l’anto akina ndo lo ekondjelo katɔ.

Afarisɛ wakoke ambola ahende ɔnɛ: “Onde ɔnɛ kele ɔnanyu latanyu nyate akotɔ tshungu? Ko lande na kele nde ɛna?” Ambutshi asɔ wakakadimola ɔnɛ: “Sho mbeyaka dia nde ekɔ ɔnaso ndo nde akotɔ tshungu. Koko, sho hateye woho wambondokoma lo mɛna kana onto lakɔɔsɛnyisha, sho hatoweye.” Oyadi kaanga ɔnawɔ akawatɛ kɛnɛ kakete, ambutshi asɔ wakakadimola la mayɛlɛ tshɛ vate: “Nyowombole, nde aya opalanga. Ndamɛ atɛkɛtɛ.”​—Joani 9:19-21.

Ɔnkɔnɛ, Afarisɛ wakelɛ pami kɛsɔ nto ndo wakawokiya wɔma lo mbuta dia vɔ wekɔ la tolembetelo tɛnya dia Yeso ekɔ onto la kɔlɔ. Vɔ wakate ɔnɛ: “Tombola Nzambi, sho mbeyaka dia pami kɛnɛ ekɔ otshi wa pɛkato.” Diaha mbeta lo wedi awɔ, pami kaki tshungu akate ate: “Naka nde ekɔ otshi wa pɛkato, dimi haleye.” Koko nde akate ate: “Dui ɔtɔi dieyami ele, dimi laki tshungu, koko lɛna.”​—Joani 9:24, 25.

Lam’ele vɔ konanga tshika dikambo sɔ, Afarisɛ wakatetemala mbuta ɔnɛ: “Akandakosale? Ngande wakandadihodi washo ayɛ?” Pami kɛsɔ akɛnya dihonga lo nkadimola ɔnɛ: “Dimi lakashidi nyotɛ, koko nyu hanyoke. Lande na konyomimbola nto? Onde ndo nyu mbolanga monga ambeki ande?” La nkɛlɛ tshɛ, Afarisɛ wakate ɔnɛ: “Wɛ kele ombeki wa pami kɛsɔ, koko sho tekɔ ambeki wa Mɔsɛ. Sho mbeyaka dia Nzambi akatɛkɛtaka la Mɔsɛ, koko onto ɔnɛ, sho hateye oma lɛnɛ oyende.”​—Joani 9:26-29.

La diambo tshɛ, pami kakalɔmbanaka diangɔ akate ate: “Ekɔ mɛtɛ dikambo dia diambo dia nyu hanyeye oma lɛnɛ oyende, koko nde akandjihodi washo.” Pami kɛsɔ akate ɛtɛkɛta wokɛma dimɛna wɛnya Nzambi onto akɔna ahokamɛnde ndo etawɔnde ɔnɛ: “Sho mbeyaka dia Nzambi hahokamɛ alɔmbɛlɔ w’atshi wa pɛkato, koko onto loka Nzambi wɔma ndo lasala lolango lande, Nzambi mbohokamɛka. Oma ko edjedja, tatokaka dia onto ɔmɔtshi akadihola washo w’onto lakotɔ tshungu.” Kɛsɔ akakonya dia mbuta ɔnɛ: “Otonga pami kɛnɛ haye oma le Nzambi, tshike totondosala ndooko dikambo.”​—Joani 9:30-33.

Oko wakiwɔ kokoka mɛnya dia ekanelo ka yimba ka pami kakalɔmbanaka diangɔ kaki kɔlɔ, Afarisɛ wakɔtɛngɛ ɔnɛ: “Wɛ akotɔ tshavu lo pɛkato, ko wɛ otetsha?” Ko vɔ wakosokola l’andja.​—Joani 9:34.

Etena kakoke Yeso kɛnɛ kakete, nde akɛnana la pami kɛsɔ ndo akambola ate: “Onde wɛ ekɔ la mbetawɔ le Ɔna onto?” Pami kakakɔnɔ kɛsɔ akakadimola ate: “Yɔnɛ, nde eende kele monge la mbetawɔ le nde?” Dia minya taamu, Yeso akate ate: “Wɛ akawɛnyi, ɔnɛ latɛkɛta la yɛ ɔsɔ kele nde.”​—Joani 9:35-37.

Pami kɛsɔ akokadimola ate: “Dimi lekɔ la mbetawɔ le nde, Nkumadiɔndjɔ.” Lo mɛnya mbetawɔ ndo dilɛmiɛlɔ, pami kɛsɔ akakusama la ntondo ka Yeso, ɔnɛ lakate ɛtɛkɛta wa diambo ate: “Dikambo dia kilombo kɛnɛ mbakamaye l’andja ɔnɛ: Dia wanɛ wahɛnyi mɛna ndo wanɛ wɛna monga totshungu.”​—Joani 9:38, 39.

Afarisɛ waki lawɔ, wakeyaka dia vɔ bu totshungu. Ko kayotota lo woho wakawayataka dia wekɔ ɛnɔmbɔdi wa lo nyuma? Vɔ wakambola dia ndjasha shadiya ɔnɛ: “Onde ndo sho mbele totshungu?” Yeso akate ate: “Otonyonga totshungu, tshike nyu bu la pɛkato. Koko lam’ele nyekɔ lo mbuta nyate: ‘Sho mɛnaka,’ pɛkato yanyu yekɔ lo ntshikala le nyu.” (Joani 9:40, 41) Oko wewɔ embetsha l’Isariyɛlɛ, vɔ hawokokɛ ntona mbetawɔ dia Yeso ekɔ Mɛsiya. Koko lam’ele wakeyaka Ɛlɛmbɛ, woho wakawatone Yeso ekɔ pɛkato ka woke.