Pɔɔlɔ ambotomama otsha la Rɔmɔ

Lɔkɛndɔ la sato la Pɔɔlɔ l’esambishelo lakakomɛ la Jɛrusalɛma. Lɛkɔ, wakawonde ndo wakawodje lo lokanu. Lo ɛnɛlɔ kɛmɔtshi kakandɛnyi l’otsho, Yeso akawotɛ ate: ‘Wɛ ayotshɔ la Rɔmɔ ndo ayotosambisha lɛkɔ.’ Wakatɔlɛ Pɔɔlɔ oma la Jɛrusalɛma otsha la Kayisariya, ko nde akatetsha ɛnɔnyi ehende lo lokanu lɛkɔ. Lam’akinde l’ohemba la ntondo ka nguvɛrnɛrɛ Fɛsto, Pɔɔlɔ akate ate: ‘Etawɔ dia dimi tolomboshama oma le Kayisa, la Rɔmɔ.’ Fɛsto akawotɛ ate: “Oko wamboyɔlɔmba dia Kayisa menda dikambo diayɛ, wɛ pombaka ntshɔ le Kayisa.” Wakakeleka Pɔɔlɔ ko mbodja lo masuwa otsha la Rɔmɔ, ndo anango ahende w’Akristo, Luka la Aristarako wakatshu kaamɛ la nde.

Lo ndjale, vɔ wakahomana la lɔpɛpɛ la wolo lakapɛpɛ l’edja ka nshi efula. Anto tshɛ wakafɔnyaka dia wayovɔ. Koko Pɔɔlɔ akate ate: ‘Anto le, ondjelo akambute lo dɔ ate: “Pɔɔlɔ, tokake wɔma. Wɛ ayokoma la Rɔmɔ ndo anto tshɛ wele lo masuwa wayoshimbamɛ.” Nyonge la dihonga! Hatotovɔ.’

Lɔpɛpɛ lakapɛpɛ l’edja ka nshi 14. L’ekomelo, disɛnga diakɛnama. Ɔsɔ aki disɛnga dia Malata. Masuwa wakatokundama lo lɔkɔngɔ ko wakaatɛ bɛtshi bɛtshi, koko anto akɔ 276 tshɛ wakakome ki lo disɛnga. Amɔtshi wakasale osale ndo akina wakahema lo bɛtshi dia masuwa ndo wakatshu otsha l’okongo. Anto wakadjasɛka la Malata wakaakokɛ ndo wakaahɛtshɛ dja dia vɔ mboka.

L’ɔkɔngɔ wa ngɔndɔ shato, asɔlayi wakatshu la Pɔɔlɔ otsha la Rɔmɔ lo masuwa okina. Lam’akandakome, anangɛso wakaye ndjɛnana la nde. Lam’akandawaɛnyi, Pɔɔlɔ akakaloya Jehowa losaka ndo akakondja dihonga. Kaanga mbaki Pɔɔlɔ ose lokanu, waketawɔ dia nde todjasɛ lo luudu la lofutɛ ko ɔsɔlayi ɔmɔtshi mbolamaka. Nde akatshikala lɛkɔ l’edja k’ɛnɔnyi ehende. Anto wakayaka ndjowenda, ndo nde akaasambishaka akambo wendana la Diolelo diaki Nzambi ndo akawaetshaka awui wendana la Yeso. Pɔɔlɔ akafundɛ tshumanelo dia l’Asie Mineure ndo dia la Judeya mikanda. Jehowa mɛtɛ akakambe la Pɔɔlɔ dia dianganya lokumu l’ɔlɔlɔ lo wedja.