WEKELO 12
Kakɔna kayokokimanyiya dia wɛ ntetemala la wekelo wa Bible?
Ekɔ dimɛna mbeka, koko aha mbala tshɛ mbatongaka dui sɔ wɔdu. Lo ntena dimɔtshi, wɛ mbeyaka ndjambola dia kana wɛ ayonga l’akoka wa ntetemala la wekelo ayɛ wa Bible. Lande na kele ekɔ ohomba ntetemala mbidja welo dia mbeka Bible? Kakɔna kayokokimanyiya dia ntetemala kaanga l’atei w’ekakatanu?
1. Lande na kele wekelo wa Bible wekɔ ohomba efula?
“Ɔtɛkɛta wa Nzambi wekɔ la lɔsɛnɔ ndo la wolo.” (Hɛbɛru 4:12) Bible kekɔ ohomba efula, nɛ dia tɔ tosholɛka tokanyi taki Nzambi ndo woho wayaokande lo dikambo diayɛ. Tɔ kokimanyiyaka aha tsho dia nkondja ewo, koko ndo dia nkondja lomba l’oshika ndo elongamelo. Kɛnɛ koleki ohomba ele, Bible kokimanyiyaka dia wɛ nkoma ɔngɛnyi wa Jehowa. Etena kekayɛ Bible, wɛ mbetawɔka dia wolo atɔ monga la shɛngiya ya dimɛna lo lɔsɛnɔ layɛ.
2. Lande na kele ekɔ ohomba mbeya nɛmɔ diele l’akambo wa mɛtɛ wa lo Bible?
Akambo wa mɛtɛ wa lo Bible wekɔ oko diangɔ di’oshinga wolo. Diakɔ diatokeketsha Bible dia ‘nsomba akambo wa mɛtɛ ndo aha mbasondja.’ (Tokedi 23:23) Etena kalamaso lo yimba nɛmɔ diele l’akambo wa mɛtɛ wa lo Bible, sho salaka la wolo dia ntetemala mbeka Bible, kaanga etena kahomanaso la wekamu efula.—Adia Tokedi 2:4, 5.
3. Ngande wakoka Jehowa kokimanyiya dia wɛ ntetemala la wekelo?
Oko wende kanga-wolo-tshɛ, Otungi ndo Ɔngɛnyi ayɛ, Jehowa nangaka kokimanyiya dia wɛ mbeka akambo wendana la nde. Nde kokaka nkosha “nsaki la wolo wa nsala akambo.” (Adia Filipɛ 2:13.) Diakɔ diele, naka lo ntena dimɔtshi wɛ ekɔ l’ohomba wa nyomoleka monga la mposa ka nkamba l’akambo wekayɛ, kete nde koka kokimanyiya. Naka wɛ ekɔ l’ohomba wa nyomoleka nkondja wolo wa mbekola wekamu kana wa ntondoya ɔlɔshamelo, kete nde koka koshawɔ. Lɔmbaka Jehowa mbala la mbala dia nde kokimanyiya dia wɛ ntetemala la wekelo wa Bible.—1 Tɛsalɔnika 5:17.
NYOMOTSHIMOLA
Eka woho wakokayɛ ntetemala mbeka Bible kaanga mbeyɛ l’akambo efula wa nsala ndo kaanga mbalɔshamayɛ oma le anto akina. Ndo oma laasɔ, sɛdingola woho wayokokimanyiya Jehowa dia wɛ ntetemala la wekelo wa Bible.
4. Etsha wekelo ayɛ wa Bible lo dihole dia ntondo
Mbala mɔtshi, sho mongaka l’akambo efula wa nsala lo lɔsɛnɔ, ko ndjɛnamaka oko taya bu l’etena efula ka mbeka Bible. Kakɔna kakoka tokimanyiya? Nyadia Filipɛ 1:10, ndo oma laasɔ, nyɔkɛtshanya ambola anɛ:
Oko le yɛ, naa “akambo [amɔtshi] woleki ohomba lo lɔsɛnɔ”?
Ngande wakokayɛ mbetsha wekelo ayɛ wa Bible lo dihole dia ntondo?
Naka wɛ ndodia bomba ka ditshu ko wɛ ndjodja ave l’ɔkɔngɔ, kete ave hawotɔtɔ
Koko naka wɛ mbidja ave ntondo lɔkɔ, kete wɛ ayokondja dihole dia nkotsha ditshu. Woho akɔ waamɛ mbele, naka wɛ mbetsha “akambo woleki ohomba” lo dihole dia ntondo lo lɔsɛnɔ layɛ, kete wɛ ayonga l’akoka wa mbashidiya ndo nkondja etena ka nsala akambo akina
Wekelo wa Bible kotshaka ehomba aso wa lo nyuma, mbuta ate ohomba wa mbeya ndo wa ntɛmɔla Nzambi. Nyadia Mateo 5:3, ndo oma laasɔ, nyɔkɛtshanya dimbola nɛ:
Wahɔ akɔna wakondjaso etena ketshaso wekelo wa Bible lo dihole dia ntondo?
5. Tetemala la wekelo ayɛ wa Bible kaanga la ntondo k’ɔlɔshamelo
Lo ntena dimɔtshi, anto akina mbeyaka kɔtɛwɔla oma lo wekelo ayɛ wa Bible. Tende ɛnyɛlɔ ka Francesco. Nyende VIDƐO, ndo oma laasɔ, nyɔkɛtshanya ambola wayela anɛ:
Lo vidɛo nyɛ, kakɔna kakasale angɛnyi la nkumbo kaki Francesco etena kakandawatɛ awui wakandekaka?
Ngande wakandafutama oma lo ekikelo kande?
Nyadia 2 Timɔte 2:24, 25, ndo oma laasɔ, nyɔkɛtshanya ambola anɛ:
Ngande wayaoka nkumbo ndo angɛnyi ayɛ lo dikambo dia kɛnɛ kekayɛ?
Lo ndjela avɛsa anɛ, kakɔna kayoyosala naka onto ɔmɔtshi hangɛnangɛna wekelo ayɛ wa Bible? Lande na kayoyosala ngasɔ?
6. Yaɛkɛ le Jehowa dia nde kokimanyiya
Lam’ayasukanyaso la Jehowa, nsaki kaso ka mbɔngɛnyangɛnya mpamaka. Koko, sho koka mɛna wolo dia nsala etshikitanu lo lɔsɛnɔ laso dia ndjaɔtɔnganyiya la ɛlɛmbɛ ande. Naka wɛ amboyaokaka ngasɔ lushi lɔmɔtshi, kete tɔkɔmɔke. Jehowa ayokokimanyiya. Nyende VIDƐO, ndo oma laasɔ, nyɔkɛtshanya ambola wayela anɛ:
Lo vidɛo nyɛ, naa etshikitanu wakasale Jim dia ngɛnyangɛnya Jehowa?
Kakɔna kakambiya lo kɛnɛ kendana la ɛnyɛlɔ kande?
Nyadia Hɛbɛru 11:6, ndo oma laasɔ, nyɔkɛtshanya ambola anɛ:
Kakɔna kayosalɛ Jehowa wanɛ “wooyanga l’otema ɔtɔi,” mbuta ate wanɛ wasala la wolo dia mbeeya ndo mbɔɔngɛnyangɛnya?
Kakɔna kaketsha dui sɔ lo woho wayaoka Jehowa etena kɛnande welo wadjayɛ dia mbeka Bible?
ONTO ƆMƆTSHI MBEYAKA KOMBOLA ONE: “Lande na kekayɛ Bible?”
Ngande wayoyokadimola?
LO TSHENA PE
Kaanga mbele hatongaka mbala tshɛ dui dia wɔdu, wekelo wa Bible koka kokimanyiya dia wɛ ngɛnangɛnaka la lɔsɛnɔ pondjo pondjo. Tetemala ndjaɛkɛ le Jehowa, ko nde ayokofuta.
Ovuswelo
Lande na kele akambo wa mɛtɛ wa lo Bible ohomba le yɛ?
Ngande wakokayɛ “nshikikɛ akambo woleki ohomba”?
Lande na kahombayɛ nɔmba Jehowa dia kokimanyiya dia wɛ ntetemala la wekelo wa Bible?
SALA EYANGELO
Tɔsɛdingole toho tɔnɛi takakimanyiya anto efula dia nkamba la wenya awɔ la lomba.
“Woho wa nkamba dimɛna la wenya ayɛ” (Emɔ!, Ngɔndɔ ka hende 2014)
Tende woho wakakimanyiya Jehowa mama kɛmɔtshi kele omɛnde koshihodiaka welo wakandadjaka dia ngɛnyangɛnya Nzambi.
Enda woho wakakondja pami kɛmɔtshi wahɔ oma lo ekikelo kaki la wadɛnde.
Mbala mɔtshi, anto amɔtshi fundaka Ɛmɛnyi wa Jehowa ɔnɛ vɔ kakitolaka waa nkumbo. Ko onde dikambo sɔ diekɔ mɛtɛ?
“Onde Ɛmɛnyi wa Jehowa kakitolaka nkumbo ko kana vɔ ndjikakatanyaka?” (Sawo dia l’Ɛtɛrnɛtɛ)